Էթիկայի եւ բիզնեսի նրբությունները

ՎիվաՍել-ՄՏՍ-ը հյուրընկալել էր «Հայաստանի պատանեկան նվաճումների» ամառային ճամբարի «Բիզնես-առաջադրանք» մրցույթի հաղթողներին եւ ծրագրի մանկավարժներին: Տարբեր մարզեր ներկայացնող ուսուցիչները ծանոթացել են մարդկային ռեսուրսները կառավարելու Հայաստանի հեռահաղորդակցության առաջատար օպերատորի փորձին: Իսկ պատանիներն առավելապես հետաքրքրվել են ընկերության մարքեթինգային ռազմավարությամբ:

«Ժամանակակից աշխարհը ռազմավարական լուրջ գործիքներ է առաջարկում մարդկությանը: Դրանց կիրառման եւ արդյունավետ կառավարման համար, սակայն, հարկավոր է տիրապետել որոշ հմտությունների եւ գիտելիքների: Տեսականորեն այդ ամենը հեշտ է: Գործնականում, սակայն, կարեւոր մարտահրավեր է դառնում ոչ միայն շուկան` իր պահանջներով ու ներկայացրած խնդիրներով, այլեւ մարդկային ռեսուրսների կառավարումը: ՎիվաՍել-ՄՏՍ-ն առաջնորդվում է կառավարման քաղաքակիրթ, ճկուն եւ պատասխանատու մոտեցմամբ: Առաջարկում եմ մեր մասնագետների հետ ինտերակտիվ շփման միջոցով բացահայտել գործարար էթիկայի եւ պատասխանատու բիզնեսի նրբությունները»,-ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:

Դասընթացի արդյունքում պատանիներն արձանագրել են, որ շուկայի ուսումնասիրությունը, տեխնոլոգիապես արդարացված ռազմավարություն մշակելը, լուծումներ առաջարկելն ու դրանք կյանքի կոչելը բավարար չեն պատասխանատու բիզնես լինելու համար: Նրանք բացահայտել են, թե ինչու է հավասարապես կարեւորվում կոմերցիոն եւ սոցիալական արտադրանքը, թե ծրագիր մշակելիս ինչպես պետք է զարգացնել միտքը, գնահատել շուկայի եւ մրցակցության հնարավոր ազդեցությունը, դրսեւորել ազնիվ մրցակցություն եւ այլն: Պատանիների համար հետաքրքիր բացահայտում են եղել առաջարկվող ծառայության հիմքում սպառողի գոհունակությունը կարեւորելն ու սխալների հավանականությունը նվազագույնի հասցնելու մոտեցումը:

«Հայաստանի պատանեկան նվաճումներ» կազմակերպության հետ ՎիվաՍել-ՄՏՍ-ի համագործակցությունը կառավարման գործընթացում արդյունավետ լուծում է երիտասարդության համար: Տեսական գիտելիքները գործնական տիրույթում դրսեւորելու հնարավորությունը պատանիներին թույլ է տալիս զգալ որեւէ ծրագրի իրականացման անհրաժեշտ փուլերը, հնարավոր խոչընդոտներն ու դրանք հաղթահարելու ուղիները: