Բալասանյանն ինձ ոչինչ չի ասել ո՛չ ուղղակի, ո՛չ անուղղակի կերպով

Շիրակի մարզպետ Ֆելիքս Ցոլակյանը մեր հարցին, թե «աղետի գոտի» հասկացությունը ե՞րբ է վերանալու մարզից, ասաց, որ «աղետի գոտի» հասկացությունը մարդկանց միջից պիտի վերացվի, դա տնտեսական հարց չէ միայն:

- Երբ բազմաթիվ քաղաքացիներ դեռեւս տնակներում են ապրում, նրանց միջից ինչպե՞ս պիտի վերանա այդ հասկացությունը:

- «Աղետի գոտին» չի կարելի կապել տնակներում ապրելու հետ: «Աղետի գոտի» հասկացությունը նա է, որ երկրաշարժից տուժածների բնակարանային ապահովման խնդիրները լուծեն:

- Իսկ եթե այդ վնասը չի վերականգնվե՞լ:

- Ինչի՞ չի վերականգնվել, վերականգնվել է ավելի շատ: Երկրաշարժից առաջ համարյա էնքան բնակարան կար Գյումրիում, ինչքան հիմա կա:

- Հիմա մարզի բնակչության քանի՞ տոկոսն է, որ այդ տուժածների թվին է պատկանում, ու նրանց կրած վնասը մինչ այժմ չի վերականգնվել:

- 460-ին մոտ մարդ է, որոնք ցուցակում են, եւ նրանք բոլորն էլ հետագա ծրագրով բնակարանով ապահովվելու են: Կառավարությունը փողը հատկացրել է 2015-ի բյուջեով:

- Հիմա եթե այդ 460 հոգին էլ իրենց բնակարաններն ստանան, «աղետի գոտի» հասկացությունը կվերանա՞ նրանց գիտակցությունից, ըստ այդմ՝ նաեւ ամբողջ մարզից:

- Էդ հասկացությունն ավելի լայն ընդգրկուն հասկացություն է, չի կարելի «աղետի գոտի» ասելով հասկանալ՝ տուն կա՞, թե՞ չկա: Պետք է մի քիչ ավելի խորը մոտենալ այդ հարցին, որ աշխատատեղերի խնդիր կա, քաղաքի բարեկարգման խնդիր կա, որոնք երբ միասին լուծվեն, մենք կարող ենք շատ ազատ ասել, որ այդ խնդիրն այլեւս չունենք:

- Ինչպե՞ս են Ձեր հարաբերությունները Գյումրու քաղաքապետ Սամվել Բալասանյանի հետ, եւ գո՞հ եք նրա աշխատանքից:

- Ես բոլորի հետ նորմալ հարաբերությունների մեջ եմ, բոլոր քաղաքապետերի, համայնքապետերի, իմ համար տարբերությունը շատ քիչ է՝ Գյումրու քաղաքապետն է, Արթիկի քաղաքապետն է...

- Գյումրիում քաղաքապետերի հարցը միշտ են քննարկել, քանզի նախորդի ժամանակ ասում էին՝ Գյումրին կրիմինալ քաղաքի է վերածվել:

- Չկա նման բան, Գյումրին ավելի մշակութային քաղաք է, քան կրիմինալ: Սա միշտ պահեք Ձեր ուշադրության կենտրոնում:

- Իսկ դա Վարդան Ղուկասյանին ու նրա որդուն ինչո՞ւ չէիք ասում, որ մշակութային Գյումրին չդարձնեին կրիմինալ քաղաք:

- Ո՞վ, ե՞ս ասեի: Ինչի՞ համար ասեի, մարդը քաղաքապետ է եղել, աշխատել է, ինչի՞ մասին է խոսքը:

- Ավելի լավ է աշխատել, քան գործող քաղաքապե՞տը:

- Ես էդպիսի համեմատություն չեմ արել, հենց արեցի, որոշեցի, ես Ձեզ կասեմ:

- Գյումրեցիներն ասում են, որ «գլուխները հանգստացավ» Ղուկասյանի փոխվելուց հետո, որովհետեւ կրիմինալի էր վերածել ամբողջ քաղաքը:

- Էդ ո՞վ է ասում, գյումրեցինե՞րը: Որ գյումրեցի կլինես, նոր կասես, գործ չունես, իրենց ասածները մի՛ լսի, ուրեմն կեսին լսել ես, կեսին՝ չէ:

- Թե՛ գործող, թե՛ նախկին քաղաքապետը՝ երկուսն էլ զրահապատ մեքենայով են շրջում: Սա չի՞ նշանակում, որ վախենալու բան ունեն:

- Ունի հնարավորություն՝ շրջում է, ի՞նչ ա եղել: Իրեն հարցրեք՝ վախենո՞ւմ է, թե՞ չէ:

- Երբ Սամվել Բալասանյանը մասնակցում էր հանրահավաքին՝ ըստ էության, իր կուսակցության միջոցով բողոքելով իշխանությունների դեմ, անուղղակի կերպով, փաստորեն, նաեւ Ձեր դեմ էր բողոքում՝ որպես իշխանության ներկայացուցչի:

- Բողոքել է, թող գա ասի, ինձ ոչինչ չի ասել ո՛չ ուղղակի, ո՛չ անուղղակի կերպով, որ ինքը բողոքում է:

Վահե ՄԱԿԱՐՅԱՆ