Ես քո համար օբեխեզե՞ եմ
![Ես քո համար օբեխեզե՞ եմ](https://hraparak.am/uploads/images/c74bd4b971e751a9f5ddfa1fd8807539.jpg)
Գեներալ Սեյրան Սարոյանը չի ընդունում օրեցօր թռիչքային գնաճի պատճառով հանրության անհանգստությունը: «Մեծ աղջիկ էս, դու խի չգիտե՞ս, որ ամեն Նոր տարի էլ լինում ա ըտենց բան, հընչի ինչ նոր բան կա՞ որ, էլի կէժանանա»,- վրդովվեց նա:
Փորձեցինք բացատրել, որ գնաճը փոխարժեքի լողացող կուրսով է պայմանավորված, ինչպես նաեւ Ռուսաստանի անմխիթար վիճակով, այլ ոչ թե Նոր տարվա հանգամանքով, ուրեմն ի՞նչ խղճով կողմ քվեարկեցիք ԵՏՄ պայմանագրին: «Մազալու մարդիկ եք… լավին տեր ենք, վատին տե՞ր չենք: Հիմա բարեկամ մարդիկ ենք, էսօր վիճակներն այնքան էլ լավ չէ, էգուց լավ կլինի: Կօգնենք, հայ ենք, ոնց էլ լինի, կֆռցնենք, դուրս կգանք: Ռուսը, որ էդքան մտածեց, դուրս եկավ, մենք ավելի շուտ դուրս կգանք: Բայց մեր անվտանգությունը հերիք ա, որ ունենք: Պիտի լավատես լինենք, որ սկի հեչ լավ բան չլնի էդ միությունից, մեր ժողովուրդը կգնա Ռուսաստան, փող կաշխատի, դա արդեն մեծ բան ա: …Կվերադառնան, կվերադառնան, ճժեր, կնիկն էստեղ են»,- հանգստացնում է նա, որ Հայաստանը չի դատարկվի:
- Իսկ իշխանությունն ինչի՞ պիտի վատ աշխատի, մեզ մոտ աշխատատեղեր չստեղծի, նորմալ կյանք չստեղծի, որ մեր տղամարդիկ գնան խոպան:
- Ես ի՞նչ անեմ, գամ ձեր տուն աման-չամա՞ն լվամ, ի՞նչ անեմ, ձեր բոստան գամ փորե՞մ, ի՞նչ անեմ, ասա. ասում ես լավ աշխատի:
- Դուք պատգամավոր եք…
- Հա, պատգամավորն ի՞նչ պտի անի, ասա՛:
- Լավ օրենքներ ընդունեք, մի քիչ ժողովրդի մասին մտածեք:
- Բա հմի էս լավ օրեն չի՞ (նկատի ունի ԵՏՄ պայմանագիրը). խնդրեմ, լավի վրա խոսում եք, վատը խոսում եք, լավ, ես ի՞նչ անեմ, գամ ձեր տուն բոստա՞ն փորեմ:
- Լավ, հիմա շոշափելի գնաճ ունենք, Դուք տեղյա՞կ եք, թե ինչու են բոլոր ապրանքները թանկանում, ու ինչ պետք է անի ժողովուրդը:
- Նոր տարի ա, նոր տարի, ընգեռուհի, էսի խո առաջին տարին չի՞, ըտենց Նոր տարի էղե՞, որ չթանկանա, մի հատ հիշի: Առեւտրականի հոգեբանություն ա, երբեք չենք կարա փոխենք:
- Օրինակ Դուք Ձեր Նոր տարվա սեղանին գրեչկա՞ եք դնում, գիտե՞ք, անգամ հնդկաձավարն է թանկացել:
- Ինչի մենք քյասի՞բ ենք, ի՞նչ ենք, որ գրեչկա դնենք: Համ էլ ես ի՞նչ անեմ, գնացեք առեւտրականներին հարցրեք:
- Բա ժողովրդի կեսից ավելին անգամ էդ քյասիբի կերակուր գրեչկան չի կարողանում առնել:
- Ես ի՞նչ անեմ, ասա՛, ես ի՞նչ անեմ: Կեսը պտի հարուստ էղնենք, կեսը՝ ընենց:
- Իսկ դոլար-դրամ տատանումները, Ձեր կարծիքով, ինչո՞վ են պայմանավորված:
- Գնա բանկի կառավարիչին հարցրա:
- Կառավարության անդամներն ասացին, որ դա սպեկուլյացիա է, ո՞վ է անում նման բան:
- Ախչի ջան, ես ի՞նչ իմանամ, հլը դու ասա, ես քո համար օբեխեզե՞ եմ: Ես էկանամիստ չեմ, բանկիր չեմ, չեմ իմանում: Իշխանության ձեռն ի՞նչ կա, դոլար տպողն իշխանությո՞ւնն ա:
- Լավ, բա որ Դուք չգիտեք, ո՞վ գիտի՝ ի՞նչ անի ժողովուրդը:
- Պետք ա շատ աշխատի, մի բան ստեղծի, յոլա գնանք:
- Յոլա չեն գնում, ժողովուրդը լքում է երկիրը, դատարկվում է:
- Այ մարդ, սաղ տեղերից էլ լքում են, ընդից գնում են ընդե, ընդից՝ ընդե, Ուկրաինան նայի:
Կարծիքներ