Իսկ ինչ է՝ այդ մարդկանց ականջների հետ ինչ-որ բան եղե՞լ է

Վերջին օրերին Հայաստանում զանգվածային քաղաքական բռնությունների ալիք է սկսվել: Երեւանի փողոցներում նախ այրվեցին Նախախորհրդարանի 4-5 ներկայացուցիչների ավտոմեքենաները, հարձակում տեղի ունեցավ Նախախորհրդարանի անդամներից մեկի վրա: Մի քանի օր դադարից հետո ծեծի ենթարկվեցին երկու ազատամարտիկներ՝ Ազատամարտիկների դաշինքի անդամներ Մանվել Եղիազարյանն ու Ռազմիկ Պետրոսյանը: Երկու օր անց ծեծի ենթարկվեց նույն դաշինքի մեկ այլ անդամ՝ Սուրեն Սարգսյանը: Իսկ նախօրեի երեկոյան բռնություն կիրառվեց ՀԱԿ անդամ Արամ Մանուկյանի նկատմամբ: Բոլոր դեպքերի առնչությամբ հայտարարություններ եղան, վրդովմունքի ալիք բարձրացավ, որն ուղղվեց իշխանությունների դեմ, եւ հայտարարվեց, որ ռեժիմի դեմ պայքարից ահաբեկվածները հրապարակ են նետել կրիմինալ վարձկաններին: ՀՀԿ խմբակցության ղեկավար Վահրամ Բաղդասարյանը երեկ մեզ հետ զրույցում հայտարարեց, որ այս վիճակն ամենաշատը ձեռնտու չէ իշխանություններին:

- Պարոն Բաղդասարյան, Հայաստանում զանգվածային քաղաքական բռնության ալիքի ներթափանցումն ինչո՞վ կբացատրեք: Ընդդիմադիրները վստահ են, որ այսպիսով փորձում եք կանխել իրենց ստանձնած իշխանափոխության գործը:

- Նախ պետք է պարզել, թե այդ հրահրումներն ում կողմից են:

- Ինչ-որ կասկածներ ունե՞ք, որ մենք չգիտենք:

- Չէ, պիտի սպասենք իրավապահների հայտարարությանը, որ նոր ըստ այդմ հայտարարություններ անենք: Դուք չե՞ք կասկածում, որ բոլոր դեպքերում իշխանությանը ձեռք չի տալիս այս իրավիճակը, մենք մեր գործը շատ լավ կատարում ենք, ո՞վ հիմքեր ունի ընկնելու ցայտնոտի մեջ՝ միտինգ անողնե՞րը, որոնք աստիճանաբար մարում են, որովհետեւ ոչինչ չստացվեց իրենց մոտ: Բնականաբար, ինչ-որ բաներ պետք է արվեն, բայց ես առայժմ չեմ ցանկանում մեկնաբանություններ տալ:

- Պարոն Բաղդասարյան, տրամաբանական չէ, մազոխիստնե՞ր են, որ իրենք իրենց դեմ բռնություն կիրառեն:

- Իսկ ո՞վ է ասում՝ իրենք իրենց դեմ: Կարող է մի երրորդ ուժ, ինչ-որ մեկը հրահրում է նման բաներ, ինչ է, դուք ասում եք, որ բոլորը միասնակա՞ն են եւ բոլորը մի մարմի՞ն են, որ իրենց դեմ անեն:

- Այսինքն՝ եռյակի՞ց եք ինչ-որ մի ուժի կասկածում, թե՞ դրսի ուժ:

- Ես չեմ ուզում անալիզներ անել, իրավապահները կպարզաբանեն, կտարածեն հայտարարություն, դրա հիման վրա նոր մենք մեր մեկնաբանությունները կներկայացնենք:
Ես, իհարկե, դատապարտում եմ, անթույլատրելի է, բռունցքներով նման իրավիճակները չեն պարզաբանում, եթե մարդիկ ունեն խնդիրներ, պարզաբանումները պետք է քաղաքական տեսանկյունից լինեն, եթե անձնական խնդիրներ են, ապա իրավապահները պետք է լուծում գտնեն:

- Եթե ազատամարտիկների եւ Արամ Մանուկյանի պարագայում եռյակի հետ գործ ունենք, ապա ինչպե՞ս կմեկնաբանեք դրանից առաջ Նախախորհրդարանի ներկայացուցիչների նկատմամբ բռնության եւ ավտոմեքենաների այրման դեպքերը:

- Այ, դրա բացատրությունն էլ է մեզ համար հարկավոր, ուրեմն պիտի գտնենք այն մարդկանց, ովքեր ցանկություն ունեն հրահրել, անկարգություններ ստեղծել, տեսնենք, թե սա ում է ձեռնտու: Համենայնդեպս, դա իշխանությանը ձեռնտու չէ:

- Երկու դեպքերը՝ Սուրեն Սարգսյանի եւ Արամ Մանուկյանի, հաջորդեցին ոստիկանապետի տեղակալ Լյովա Երանոսյանի հայտնի հայտարարությանը, որ ով Սերժ Սարգսյանի դեմ խոսի, «ականջները կկտրեմ»: Սրանք է՞լ են պատահականություն: Չե՞ք պատրաստվում պատասխանատվության ենթարկել «օրենքի մարդուն»՝ բռնությամբ հարցեր լուծելու մասին հայտարարության համար:

- Նա հայտարարել է, որ եթե որեւէ մեկը պետականության եւ նախագահի դեմ բան խոսի, ես կպատժեմ, բայց դա չի նշանակում, որ ինքը հայտարարել է, որպեսզի պատժի: Դրանք տարբեր բաներ են: Ես էլ եմ նույնը կրկնում եւ հորդորում զերծ մնալ լկտի արտահայտություններից՝ երկրի դեմքերի եւ մեր պետականության վրա ոտնձգություններ չանեն: Իսկ ինչ է՝ այդ մարդկանց ականջների հետ ինչ-որ բան եղե՞լ է: Այո, շատ տհաճ եւ անցանկալի միջադեպ է, բայց նրա հայտարարությունների հետ մի կապեք: Նորից պետք է կրկնեմ, որ դեմ եմ բռունցքներով հարաբերություններ պարզելուն:
Իսկ կբացատրե՞ք, թե ինչ է նշանակում Լեւոն Զուրաբյանի հայտարարությունը, որը կատարվածը մեզ հետ է կապում: Ես էլ ասում եմ, որ իրենք են կազմակերպել, որպեսզի խոսելու նյութ ունենան: Կարելի՞ է նման արտահայտություն անել. եթե կարելի է, ես էլ կարող եմ:

- Դուք բացառո՞ւմ եք, որ իշխանության որեւէ թեւի ձեռքի գործը կարող է սա լինել, ի վերջո, իշխանությունն էլ միատարր չէ:

- Այո, բացառում եմ: