Ես կապրեմ իմ ամրոց երկրում
Ես կապրեմ իմ ամրոց երկրում
Ստի մեջ կոփվել ես իմ հույս,
Հառնի՛ր արևի շողերից,
Իմ երգող,երազող թռչուն
Մի՛ չվիր իմ տխուր երկրից:
Անհոգի կմախքի նման
Նայում են այս օրերը մեզ,
Վախենամ,թե այսպես գնա`
Վերածվենք կմախքի և մենք:
Սգի մեջ խեղճացած իմ լույս,
Թափանցի՛ր խավարի միջից,
Իմ երգող,երազող թռչուն
Մի՛ չվիր իմ տխուր երկրից:
Հեքիաթ էր, էլ հեքիաթ չկա`
Փորձում է չարիքն իմ երկրին,
Թե թույլ ես, վեր կաց ու գնա`
Ես կօգնեմ իմ ընկնող երկրին:
Ես կապրեմ իմ ամրոց երկրում,
Կտանեմ անցյալն ուսերիս,
Ներկաս է ավաղ վշտացնում,
Բայց իմն է ներկան այս անխիղճ:
Ստի մեջ կոփվել ես իմ հույս,
Հառնի՛ր արևի շողերից,
Սգի մեջ խեղճացած իմ լույս,
Թափանցի՛ր խավարի միջից:
2014
Ախ, այս ամենից ես շատ եմ հոգնում
Երբեմն ուզում եմ ոչինչ չասել,
Չլինել ներկա ոչ մի զրույցում,
Բայց չեմ էլ ուզում անիմաստ լռել.
Ախ,այս ամենից ես շատ եմ հոգնում:
Մեկ-մեկ ուզում եմ մի կուշտ արտասվել,
Բայց արցունքներս փակվում են խորքում,
Իսկ ես չգիտեմ,թե ինչպես վարվեմ.
Ախ,այս ամենից ես շատ եմ հոգնում:
Մեկ էլ կտեսնես ուզում եմ փրկվել,
Բայց ինչի՞ց,ումի՞ց ես չեմ հասկանում,
Բախտս դառնում է մի մեռնող թիթեռ,
Եվ այդ ամենից ես շատ եմ հոգնում:
Հանկարծ ուզում եմ մեկին ճանաչել
Եվ գիտեմ,թե ում`ինձ եմ որոնում,
Սակայն թվում է անձավ եմ մտել,
Որտեղ փակված եմ հնամյա պատով:
Ու մի բան միայն ես հստակ գիտեմ
Եվ իմացածս ցավով եմ ասում,
Ուզում եմ անվերջ դառնագին գոչել,
Որ այս ամենից ես շատ եմ հոգնում:
2014
Նամակում
Ամեն ինչ մնաց իմ հոգում`
Նամակում ոչինչ չասացի,
Ախ, երկա՜ր, երկա՜ր էի գրում,
Բայց ոչի՜նչ, ոչի՜նչ չասացի:
Եվ դու էլ երկար կարդացիր
Անքուն` առանց աչք թարթելու,
Ասացիր.- ոչինչ չասացիր
Այս երկար ու բարդ նամակում:
Եվ այդպես օրը թերթեցինք`
Թանաքն անիմաստ վատնելով,
Աստղերն ավելին ասացին
Պարզապես իրար նայելով:
2014
Քաոս
Նոր քաոս է հասունանում
Ու չկա վերջ այս արյունին,
Մենք ապրում ենք խենթանոցում
Ու փնտրում ենք հերոսներին:
Գուցե նրանք ցույց տան ուղին`
Կանաչ ճամփան խաղաղության,
Ու խորտակվեր առնետների
Կոյուղով մեկ ձգվող շղթան:
Բայց ծնվում են հերոսները
Խայտաբղետ մեր աշխարհում,
Թողնում իրենց կյանքի հետքը
Վերափոխված խենթանոցում:
Հին քաոսն է շարունակվում
Ու չկա վերջ այս արյունին,
Անկեղծ ոչինչ չի կատարվում`
Փառքն է դրված միշտ նժարին:
Կասկած չկա հերոսներն էլ`
Մեզնից վատն էին,մեզնից տկար,
Գուցե գիտեին այլ հնարքներ`
Մեզ հմայող,բայց մեզ օտար:
Եվ էստեղ են հառնում կրկին
Չակերտները իմաստության,
Վերցնում իրենց <<հերոսներին>>
Ջնջում ուղին խաղաղության:
Հին քաոսն է շարունակվում
Ու չկա վերջ այս արյունին,
Մենք ապրում ենք խենթանոցում
Ու չենք գտնում հերոսներին:
Կլակ
Կարծիքներ