Զուգահեռները մեր օգտին չեն
Առողջ հասարակության մեջ թույլին պաշտպանում են, լկտիներին կարգի հրավիրում, իշխանությանը քննադատում, ազնիվներին ու աշխատասերներին տեղ տալիս, ծույլերին պատժում։ Միայն անառողջ, խեղաթյուրված արժեքային համակարգ ունեցող հասարակությունն է մեծարում հաբռգածներին, ընկածին խփում, հարուստների առաջ գլուխ խոնարհում, աշխատողներին քննադատում, վերադասից վախենում ու քծնում։ «Օսկար 2016»-ի լավագույն ֆիլմ ճանաչված «Ուշադրության կենտրոնում» ֆիլմը տխուր մտորումների առիթ տվեց՝ զուգահեռներն ակնհայտորեն մեր օգտին չէին։ Հավատքի ու եկեղեցու նկատմամբ ակնածանքով լի ամերիկյան հասարակությունը, կինոարտադրողը անխնա բացահայտել է կաթոլիկ եկեղեցու արատները, խոսել պեդոֆիլ հոգեւորականների մասին։ Մեզանում ցանկացած նման փորձ պարսավանքի կարժանանար։ Այն լրատվամիջոցը, որ համարձակվում է Հայ առաքելական եկեղեցու գործունեության մեջ թերություններ գտնել, հայտնվում է հասարակության թիրախում, պիտակավորվում։ Եկեղեցին մեզանում անձեռնմխելի հայտարարված «սրբություններից» է, չնայած հայ հասարակությանը հավատացյալ չես կոչի։ Փոխարենը ինչպիսի՜ հարգանք կա լրագրողի եւ լրատվամիջոցների նկատմամբ ամերիկյան հասարակությունում։ Ինչպե՜ս է մեծարված այդ ԶԼՄ-ն՝ «Բոստոն գլոբը», որը համարձակվել է բացահայտել հանցագործ հոգեւորականներին։ Ի՜նչ հզոր իմաստ ու պետական քարոզչություն է դրված ֆիլմում, որտեղ լրագրողի աշխատանքը բացառապես դրական լույսի ներքո է ներկայացված։ Դուք կարծում եք ԱՄՆ-ում տգետ ու ծախված լրագրողներ, դեղին մամուլ չկա՞։ Կա եւ այն էլ ինչքան, բայց պետությունը կարեւորում է լրագրողի գործը եւ իր հասարակությանը դաստիարակում է այդ հարգանքի մթնոլորտում, այլ ոչ թե լրագրողներին փնովելու, դատապարտելու, արժեզրկելու ռեժիմում։
Կարծիքներ