Նոր մարզպետ, նոր ծրագրեր, հույս ունենք՝ նոր գաղափարներ. Մեղրիի քաղաքապետ

Համայնքների խոշորացման ծրագրի շրջանակներում Սյունիքի մարզի Ագարակ, Մեղրի և11 գյուղական համայնքների փոխարեն ստեղծվել է Մեղրի համայնքը, որտեղ սեպտեմբերի 18-ին ՏԻՄ ընտրությունների արդյունքում ղեկավար է ընտրվել Ագարակ քաղաքի նախկին քաղաքապետ Մխիթար Զաքարյանը: Վերջինիս խոսքով՝ միայն ինքն է եղել թեկնածու, այդ տարածքում նույնիսկ թեթև առարկություն հանձնաժողովներում, բողոք չի եղել. «Ընտրության մասնակացությունը եղել է 71 տոկոս, մասնակիցների՝ 97 տոկոսը կողմ է քվեարկել: Սկզբում մեկ թեկնածու էլ է եղել, հետո մենք որոշեցինք, որ մեր թիմով աշխատենք, հիմա մյուս թեկնածուն կաշխատի որպես տեղակալ: Թեկնածությունը իր կամքով է հանել՝ նախընտրական ծրագիրը լսելով, գտել ա, որ այդպես ավելի իրատեսական կլինի, նաև տարիքի առումով ավելի երիտասարդ ա, ավելի ճիշտ կլինի, որ մեր ծրագրերը համատեղ իրականացնենք, ինքը տեղակալի կարգավիճակում կլինի»:

-Մեղրի համայնքի ղեկավարն եք արդեն, նոր փոփոխություններ լինելո՞ւ են, ծրագրեր:

Բազմաբովանդակ ծրագրեր կան, մի տարի հետո դուք ինքներդ ականատես կլինեք: Բոլոր ճյուղերով  են աշխատանքները լինելու:

-Ինչպե՞ս եք համատեղելու և Ագարակ քաղաքը, և Մեղրին, և 11 գյուղական համայնքները:

Մենք ունենք աշխատունակ և պրոֆեսոինալ թիմ, նաև ձևավորում ենք: 12 հազար ազգաբնակչություն է, և տարիներ շարունակ Մեղրու շրջանը եղել է մեկ կենտրոնից, հիմա վերականգնվում է: Ես համենայնդեպս վստահ եմ, որ մեր բոլոր ծրագրերը հաջողությամբ իրականացվելու են: Իրավիճակը լարված չի, պայթունավտանգ չի:

-Մեղրիի քաղաքապետարանի գործունեությանը ծանոթացե՞լ եք, ի՞նչ բացթողումներ կան, որոնք պետք է լրացնեք:

Ծանոթացել ենք, հիմա մենք միջանկյալ, անցումային փուլում ենք, նոր աշխատակազմի կառուցվածքը ուղարկել ենք կառավարություն, սպասում ենք հաստատմանը, և նոյեմբերի 1-ից նոր աշխատակազմը կգործի: Համայնքի բոլոր ղեկավարներին լիազորությունները հիշեցրել եմ, բայց աշխատակազմերը մնացել են, ուսումնասիրել ենք, կարևորը առաջ նայենք, ոչ թե հետ: Թերությունները բացահայտել կամ ինչ որ էդպես միտում չունենք, պարզապես մի խոսուն թիվ կարող եմ ասել՝ մոտ 10 միլիոն դրամի երեք ամսվա պարտք ենք «ժառանգել»: 3 ամիս մոտ 150 հոգի աշխատող աշխատավարձ չի ստացել:

-Պարոն Զաքարյան, անդրադառնանք Սյունիքի մարզպետ Սուրիկ Խաչատրյանի հրաժարականին: Նրան փոխարինեց Վահե Հակոբյանը. նոր մարզպետի հետ ինչպե՞ս եք աշխատելու:

Շատ լավ, բայց ի՞նչ ա եղել, պետություն ենք չէ՞ մենք, պետական բոլոր ինստիտուտներն աշխատում են: Նոր մարզպետ, նոր ծրագրեր, հույս ունենք՝ նոր գաղափարներ: Հանրապետության վարչապետն էլ չէ՞ նշեց, որ հուսով ենք նոր մշակույթ կմտցվի տարածքային կառավարման բնագավառում:

-Սուրիկ Խաչատրյանի գնալը Ձեզ չվհատեցրե՞ց:

Չէ, ինչի՞ պետք ա վհատեցնի, բոլորս էլ մի օր պետք է հրաժեշտ տանք, իհարկե նրա հետ աշխատանքային տարիները եղել են արդյունավետ,համագործակցության տարիներ:

-Վահե Հակոբյանին մինչ մարզպետի պաշտոնի նշանակվելը ճանաչո՞ւմ էիք:

Անձամբ չեմ ճանաչում, բայց եթե ղեկավարել ա Հայաստանի ամենախոշոր ձեռնարկություններից Զանգեզուրի պղնձամոլիբդենային կոմբինատը, ինձ թվում է, որ դա արդեն հերիք ա, որ մենք հույս ունենանք, հավատանք, որ էդ մարդը կարող ա արդյունավետ ղեկավարի Սյունիքի մարզը:

-Պարոն, Զաքարյան, հնարավոր է նորից Խաչատրյանի համակիրներով նամակ գրեն, որպեսզի Սուրիկ Խաչատրյանը ետ վերադառնա:

Ես էլ եմ լսել նման բան, բայց ես Ձեզ հավատացնում եմ, որ նման բան չի եղել: ճիշտ է, մամուլում գրվեց այդ մասին, բայց ես տեղյակ չեմ, իմ ինֆորմացիան՝ նման բան չի եղել: Հետո կոլեգաներիս հարցրել եմ՝ ոչ մեկ տեղյակ չի եղել: