Գագիկ Ծառուկյանի անձնական միջոցներով մեր մարզիկները ստանում են բարձր արդյունքներ

Սպորտի և երիտասարդության նախարար Հրաչյա Ռոստոմյանին Հայաստանի նախավերջին խաղի՝ Հայաստան-Ռումինիա հանդիպման արդյունքները մտահոգում են և ոչ բավարար են, իսկ խնդիրները բազմազան են. «Ինչպես նշել էի, յուրաքանչյուր խնդիր, երբ սկսում է մտահոգել, մենք զբաղվելու ենք՝ անկախ նրանից դա ֆուտբոլ է, ըմբշամարտ է, ծանրամարտ է, և մեզ մոտ արդեն քննարկումներ կսկսվեն»:

-Ի՞նչ ուղղությամբ են քննարկումները սկսվելու:

Այս պահի դրությամբ քննարկումները դեռ չեն սկսվել, և չեմ կարող պատասխանել, թե ինչ ուղղությամբ: Իհարկե, մենք կհրավիրենք իրական ֆուտբոլի մասնագետներին:

-Ովքե՞ր են իրական մասնագետները:

Մենք կդիմենք, համապատասխան վարչությունը կզբաղվի և հրապարակային Ձեզ կներկայացնենք:

-Վարչապետը խոսեց ոլորտը ուսումնասիրելու, գումարները վերաբաշխելու մասին: Ի՞նչ եք կարծում, որտեղի՞ց կարելի է սկսել:

Իհարկե կան հասարակական տարբեր կազմակերպություններ, որոնց ֆինանսավորմամբ էֆֆեկտիվությունը պետք է ուսումնասիրել և տալ վերջնական արդյունքներ, մասնավորապես պետք է նշել, որ այն ՊՈԱԿ-ները, մարզադպրոցները, որ չունեն բազաներ, չունի դահլիճ, որ մարզվի, պետք է խոշորացվեն, վերախմբավորվեն:

-Գագիկ Ծառուկյանի ֆինանսական միջոցները այդ գործընթացում կներգրավվե՞ն:

Պարոն Ծառուկյանի անձնական միջոցները 2006 թ.-ից ներգրավված են, մասնավորապես մեծ սպորտում, այն բարձր արդյունքները, որ մեր մարզիկները ստանում են, հիմնականում այդ անձնական միջոցի շնորհիվ է:

-Հնարավո՞ր է ձեր նշանակումը դրանով է պայմանավորված:

Առանց մեկնաբանության:

-Հասարակական կազմակերպություններին տրվող գումարների հետ կապված չարաշահումնե՞ր էր նկատել վարչապետը, որ հանձնարարեց ուսումնասիրել:

Հանձնարարել ա ուսումնասիրել, ուսումնասիրենք՝ կպատասխանենք, բայց այս պահի դրությամբ կուսումնասիրենք օգտակար գործողության գործակիցը, երբ մենք հասկանանք այդ ամեն ինչը որտեղ է ծախսվել և ինչ օգուտ ա տվել:

Աննա ՊԱՊԻԿՅԱՆ