Միթե՞ Հայաստանը ճգնաժամի մեջ է
«Ինչպես դուրս գալ ճգնաժամից» հոդվածում, հարգելի Արամ Աբրահամյանը, թեպետ ճիշտ ու հանրահայտ բաների մասին է ասում, բայց, գուցե, չի պատկերացնում, որ արմավենին, օրինակ, մերձարևադարձային գոտում է աճում: Հիմա, ուզում ես երկու կես եղիր, միևնույն է՝ Հայաստանում արմավենի չի կարող աճել: Մեկ այլ այլաբանություն: Եթե մարդը չի կարողանում հարթ տեղանքում ավտոմեքենան նորմալ վարել, որտեղ գրեթե ավտոմեքենաներ չեն երթևեկում, ապա ինչպե՞ս կարող է դա անել ոլորաններում, խիստ թեք ճանապարհին՝ ինտենսիվ երթևեկության պայմաններում:
1994 թվականից ի վեր, Հայաստանը գտնվում էր նշված հարթ տեղանքում: Այս առումով, կարելի է համաձայնել հոդվածագրի հետ. «ռազմական պարտությունը, որքան էլ այն լինի ներկա իշխանության ապաշնորհության արդյունք, «նախապատրաստվում էր» երկար ժամանակ՝ ինձ թվում է, 1994 թվականից սկսած. ոչ մի իշխանություն չկարողացավ ռազմական հաջողություններն ամրապնդել կայուն, միջազգայնորեն ամրագրված խաղաղությամբ»: Ավելին, այսօրվա իշխանությունների կարկառուն երիտասարդները «կոփվել» են «հեղափոխությանը» նախորդող տասնամյակում՝ հիմնականում ուսանողական խորհուրդներում:
Այլ հարց է, թե ինչու՞ այդպես ստացվեց: Եթե համառոտ, ապա «մշակութային շոկի» պատճառով: Արժեքներն այլևս սերմանվում են համացանցի կամ օտարերկրյա այն կազմակերպությունների միջոցով, որոնք ֆինանսավորում են ազգային արժեհամակարգերը փլուզող ծրագրեր: Ուսուցիչները, դասախոսները, ծնողները, ընդհանուր առմամբ՝ ավագ սերունդը, այլևս հեղինակություն չեն երիտասարդներից շատերի համար: Խախտվել է սերունդների հաջորդափոխությունը (приемственность), որի շնորհիվ դարեր շարունակ, սերնդեսերունդ փոխանցվել ու կուտակվել են ազգային արժեքները՝ ցանկացած ժողովրդի ինքնության ապացույցները:
Ցավալիորեն, ներկայում ՀՀ քաղաքացի հանդիսացող անձանց մեծ մասը ենթարկվել է մշակութային շոկի: Նրանց որևէ բան բացատրելն անիմաստ է: Ճիշտ է, այսօր էլ ՀՀ-ում ապրողներին անվանում են հայ ժողովուրդ, բայց դա այն նույն ժողովուրդը չէ, ինչ 30-40 տարի առաջ էր:
Եթե այս դատողությունները հիմնազուրկ են, ապա հայ ժողովուրդ կոչվածն ինչպե՞ս է հանդուրժում օտաերկրյա զորքերի ներխուժումն իր պետության ինքնիշխան տարածք, ինչպե՞ս է հանդուրժում թշնամի երկրի ղեկավարի նվաստատացուցիչ հոխորտանքները: Դե, իսկ Արցախի մասին ավելորդ է խոսել, քանզի այն, մշակութային շոկ ապրած ժողովրդի համար, ընդամենը հող էր՝ դժգույն բնակավայրերով:
Գավառականությամբ տառապող հայ ժողովուրդը կարծել է, թե արհեստականորեն ընդօրինակելով զարգացած երկրներում արմատավորված արժեհամակարգերը, հնարավոր է զարգանալ: Այդ ապարդյուն ջանքերն ընդամենը տարակուսելի, նույնիսկ, ծիծաղելի դրսևորումներ են ունեցել: Այդ սխալ ճանապարհով չգնալու համար, գուցե, արժե՞ր հայցքով շրջվել դեպի Արևելք: Ինչո՞վ զարգացած չեն Չինաստանը, Ճապոնիան կամ Հարավային Կորեան: Բայց, այդ երկրների ժողովուրդների վրա չի ազդել մշակութային շոկը, նրանք սրբորեն պահպանել են իրենց ազգային արժեհամակարգերը:
Բավական դիպուկ օրինակ է բերել հոդվածագիրը, Ֆինլանդիայի օրինակը: Հոդվածում նշվել է 1994 թվականը: Կրկին նշենք այդ տարեթիվը, երբ, կորցնելով շուկաները նախկին ԽՍՀՄ-ում, Ֆինլանդիայի կառավարությունը սահմանեց ազգային ռազմավարությունը՝ «Դեպի ֆիննական տեղեկատվական հասարակություն»: Վերափոխվեց երկրի տնտեսությունը՝ նոր տեխնոլոգիաները կլանելու համար: Մշակող արդյունաբերության, էներգիայի և բնապահպանական, շինարարական, գյուղատնտեսական տեխնոլոգիաներին, շուկայական գիտելիքներին ֆինները միավորում են տեղեկատվական և կենսատեխնոլոգիաները: Փոխկապված՝ այս տեխնոլոգիաները դառնում են մրցունակ և ապահովում սիներգիկ արդյունքներ:
Արդեն 20 տարի է, ինչ ՀՀ կառավարությունը ՏՏ-ն հայտարարել է գերակայություն, իսկ արդյունքները դեռ իրենց սպասեցնել են տալիս: 18-20 տարում՝ շնորհիվ հարավկորեական «չեբոլների» (օլիգարխների)՝ Հարավային Կորեան տնտեսական թռիչք ունեցավ: Բայց այդ երկրները չունեին մեզ նման գոյատևելու խնդիր, չէին գտնվում պատերազմական վիճակում: Այդ երկրները ձգտում էին ապահովել մարդկանց համընդհանուր բարեկեցությունը, բարձրացնել կյանքի որակը:
Իսկ թե ինչով զբաղվեցին մեր օլիգարխները, հայտնի է բոլորին: Խնդիրն այստեղ ուրիշի փողերը հաշվելու մեջ չէ (տնտեսագիտությունից քիչ, թե շատ տեղյակները գիտեն, որ տեղի է ունեցել կապիտալի նախասկզբնական կուտակում, ինչի արդյունքում, տրամաբանորեն, առաջացել են խոշոր սեփականատերեր), այլ նրանում է, որ որևէ կառավարություն չփորձեց, չկարողացավ, թե չցանկացավ «կառավարել» օլիգարխներին, որոնք տևական ժամանակ «կառավարում» են պետությունը:
Անցած երեք տասնամյակների և հատկապես վերջին երեք տարիների փորձը միթե՞ կարող է ինչ-որ մեկին հույս ներշնչել, թե հնարավոր է ճգնաժամից դուրս գալ:
Զարմանալի է, որ 8-րդ գումարման ԱԺ-ում քննարկումները չեն հուշել Արամ Աբրահամյանի նման անկեղծ ու ազնիվ մտածելակերպով մարդկանց, որ ժամանակն է հրաժարվել հայ ժողովրդի բացառիկության վերաբերյալ չափազանցված կարծիքից: Այլապես, պարոն Աբրահամյանը չէր խոսի որոշակի քայլերի մասին. «…առաջին քայլն …ընդհանուր ազգային համաձայնությունն է այն մասին, որ երկիրը գտնվում է ճգնաժամի մեջ»:
Հուլիսի 20-ին «ընդհանուր ազգային համաձայնություն» ձեռք բերվեց, որ Հայաստանում ոչ մի ճգնաժամ էլ չկա: Կան մանր-մունր խնդիրներ, ինչպիսին, օրինակ, Սևան լճից ջրառի խնդիրն է, որն էլ լուծվեց իշխող քաղաքական ուժի և ընդդիմության կառուցողական քննարկումների արդյունքում: «Ինչ-որ» Գորիս-Կապան ճանապարհի մասին է, որը կլուծեն ռուս խաղապահները…
Հ.Գ. Ամերիկացի կենսաբան եւ փիլիսոփա Ջարեդ Դայմոնդի գիրքը թեպետ արժեքավոր աշխատություն է, այդուհանդերձ, նրանում տեղ գտած երաշխավորությունները կիրառելի չեն մշակութային շոկում հայտնված հասարակություն ունեցող երկրում:
Հ.Գ. Հռետորական հարցեր երեք նախագահներին (հուսանք, որ Հայաստանը չորրորդ ձևական նախագահի նման նախագահներ այլև չի ունենա). Ի՞նչ է պատահել «Օրբիտա», «Սապֆիր», «Հրազդանմեքենա», «Հայէլեկտրամեքենա», «Նաիրիտ», «Մարս» ու նման բազմաթիվ այլ գործարանների հետ: Կարո՞ղ է թուրքերն են մեղավոր. 30 лет коту под хвост! Ասում են, թե ներկա ԱԺ-ի պատգամավորները 100 հազար դոլարից էժան ավտոմեքենաներով «գործի» չեն գնում: Միևնույն է՝ ազգովի «քյասիբ» ենք. մի խաբվեք ձեր տների ու ավտոմեքենաների մեծությամբ: Ցավալիորեն, ոչ միայն քյասիբ ենք, այլև անթասիբ:
Գագիկ Վարդանյան
Կարծիքներ