Երկու անգամ ձախողվել են, հիմա երրորդ փորձն են անում
Նախորդ տարեվերջին՝ Կոռուպցիայի կանխարգելման հանձնաժողովի անդամների ընտրության խայտառակ տապալումից հետո Հանձնաժողովի թափուր պաշտոնները մինչ օրս մնում են չհամալրված: Խոսքը ԿԿՀ նախագահի եւ անդամի պաշտոնների մասին է: Հիշեցնենք, որ ՔՊ-ն մերժեց նախկին նախագահ Հայկուհի Հարությունյանին եւ Հանձնաժողովի անդամի թեկնածու Նարինե Ավետիսյանին։ Թափուր պաշտոնները համալրելու համար ԱԺ Մրցութային խորհուրդը տարեսկզբից մի քանի անգամ թեկնածուների ընտրության մրցույթ է հայտարարել՝ հունվար, փետրվար ամիսներին, սակայն կան տեղեկություններ, որ առաջին անգամ առաջադրված թեկնածուները չեն համապատասխանել պաշտոնի համար պահանջվող չափորոշիչներին, թեեւ չի բացառվում, որ նրանցից որեւէ մեկի առաջադրումը «ճշտված» չի եղել իշխող թիմի հետ` անակնկալ առաջադրումներ են եղել, ուստի փորփրել եւ հայտնաբերել են «անհամապատասխանություններ»։ Երկրորդ անգամ հայտարարված մրցույթին առաջադրումներ չեն եղել: Հիմա հերթը երրորդ փորձինն է, որի վերաբերյալ իշխանական թիմում խորհրդավոր լռություն են պահպանում՝ չգաղտնազերծելով թեկնածուներին:
Մրցույթը հայտարարվել է այս տարվա մարտի 19-ին, վերջնաժամկետը ապրիլի 8-ին էր։ Երեկ մենք փորձեցինք խորհրդարանից տեղեկանալ՝ ովքե՞ր են առաջադրվել սույն պաշտոնների համար, քանի թեկնածու է գրանցվել, սակայն ԱԺ-ից փոխանցեցին, որ Մրցութային խորհուրդը առաջիկայում հանդես կգա հայտարարությամբ եւ կպատասխանի բոլոր հարցերին։
Կան տեղեկություններ, որ 2-3 թեկնածու է առաջադրվել: Արդյո՞ք այդ առաջադրումները համաձայնեցված են իշխանական թիմի հետ, թե՞ կրկին անակնկալ առաջադրումներ են, պարզ կդառնա առաջիկայում, երբ Մրցութային խորհուրդը հանդես գա պարզաբանմամբ, սակայն արդեն ուշագրավ է, որ 5 օր է առաջադրումների ժամկետն ավարտվել է, բայց խորհուրդը դեռ հանդես չի եկել հայտարարությամբ։ ԿԿՀ անդամի պաշտոնում ինքնաառաջադրված թեկնածուներին ընտրելու է Մրցութային խորհուրդը, որը կազմված է Վարչապետի աշխատակազմի, Մարդու իրավունքների պաշտպանի, ԲԴԽ, եւ Փաստաբանների պալատի կողմից նշանակված ներկայացուցիչներից: Այս խորհրդի անդամ է նաեւ ՔՊ-ական պատգամավոր Արուսյակ Ջուլհակյանը։
Կոռուպցիայի կանխարգելման մասին ՀՀ օրենքի համաձայն՝ մրցույթն անցկացվում է 3 փուլով, որոնցից առաջինը փաստաթղթերի ամբողջականության եւ համապատասխանության ստուգման փուլն է, երկրորդը՝ թեստավորման, իսկ երրորդը՝ հարցազրույցի: Մրցույթին մասնակցելու հավակնություն ունեցող անձը, ի թիվս այլ անհրաժեշտ փաստաթղթերի, ներկայացնում է նաեւ բարեվարքության վերաբերյալ լրացված հարցաթերթիկ, որում ներկայացված տվյալները ստուգում է Կոռուպցիայի կանխարգելման հանձնաժողովը։ Հարցազրույցի փուլի գնահատման արդյունքներով ամենաբարձր հանրագումարային միավորներ ստացած մասնակիցները ընդգրկվում են մրցույթում հաղթող ճանաչվածների ցուցակում, որը Մրցութային խորհուրդը ներկայացնում է ԱԺ նախագահին՝ ցուցակի հրապարակմանը հաջորդող երեք աշխատանքային օրվա ընթացքում: ԿԿՀ անդամներին ընտրում է խորհրդարանը:
Կարծիքներ