Ոչ ոք չպետք է խուսափի արդար հատուցումից․ Պուտին
Ռուսաստանի նախագահ Վլադիմիր Պուտինը պատմել է, թե ինչպես է ընթանում մարտի 22-ին մերձմոսկովյան «Կրոկուս»-ի համերգասրահում տեղի ունեցած ահաբեկչության հետաքննությունը։ Այս մասին հայտնի է դարձել անվտանգության հարցերով բարձր ներկայացուցիչների 12-րդ միջազգային հանդիպման մասնակիցներին ուղղված՝ պետության ղեկավարի տեսաուղերձից։
«Ռուսաստանի հատուկ ծառայությունները և իրավապահ մարմինները շարունակում են պարզել և ուսումնասիրել այս ստոր հանցագործության բոլոր մանրամասները՝ բացահայտելով դրա մասնակիցներին, այդ թվում՝ պատվիրատուներին, հովանավորներին և կազմակերպիչներին։ Նրանցից ոչ մեկը չպետք է խուսափի արդար հատուցումից»,- ընդգծել է նախագահը, նրա խոսքերը մեջբերված են Կրեմլի պաշտոնական կայքում։
Ռուսաստանի ատաջնորդն ընդգծել է, որ միջազգային ահաբեկչությունը մնում է այս դարի ամենալուրջ սպառնալիքներից մեկը։ Պուտինը հիշեցրել է, որ տարբեր երկրներում ահաբեկչական հարձակումների նպատակը ազգամիջյան և միջկրոնական ատելություն սերմանելն է։ Նրանց թիկունքում, ըստ Կրեմլի ղեկավարի, ոչ միայն արմատական խմբավորումներն են, այլեւ պետական հետախուզական ծառայությունները։
Նա հավելել է, որ հանցագործների մեթոդները ամեն անգամ ավելի ու ավելի «բարդ ու բարբարոսական» են դառնում։
Կարծիքներ