«Արյուն կթափենք», «աչքերը կհանենք, կուտացնենք». Սպառնալիքները կշարունակվեն

Իջևանյան դեպքերի կապակցությամբ երեկ վարչապետ Նիկոլ Փաշինյանը հայտարարեց, թե կառավարության հետ ոչ ոք շանտաժի լեզվով չի կարող խոսել և ոստիկանության հետ ընդհարումների մեղավորները պետք է պատժվեն: Սակայն ջինը շշից վաղուց դուրս է եկել: Կառավարությունը վաղուց ցույց է տվել, որ «ժողովուրդը» կարող է ամեն ինչ անել: Օրինակ, մեկ տարի փակել հանքի ճանապարհները և անգամ դատարանի որոշումից հետո՝ չբացել, իսկ կառավարությունը «չի նկատում» դա: Ընդ որում «ժողովուրդ» ասելով նկատի ունեն ոչ բոլորին, այլ միայն նրանց, ովքեր ակտիվ են, բարձր են գոռում եւ խլացնում են մյուսների ձայնը:

Այսինքն, մի դեպքում 20 հոգին էլ կարող է ժողովուրդ լինել, իսկ, օրինակ, Իջևանում 500 հոգին «ժողովուրդ» չէ, այլ փայտի բիզնես անողների կողմից հրահրված, նախկինների կողմից ֆինանսավորվող խմբակ, որոնց դեմ կարելի է զորք ուղարկել, կարելի է կալանավորել, քրեական գործեր հարուցել, մի խոսքով՝ «ասֆալտին փռել»:

Բայց այ ֆեյսբուքում «բոլոլա» անող քաղակտիվիստների շատ ավեի փոքրաթիվ խումբը կառավարությանը, օրենսդիրի ներկայացուցիչներին սպառնալու էքսկլյուզիվ իրավունք էլ ունի:
Ամուլսարի ճանապարհները փակած խմբի անդամը Իջևանի դեպքերի հաջորդ օրը սպառնում է, ակնարկելով, թե իրենք էլ ոստիկաններին կծեծեն: «Արյուն կթափենք», «աչքերը կհանենք, կուտացնենք», այս բառապաշարով է իշխանական պարգամավորի կազմակերպած ֆեյսբուքյան հարցման տակ սպառնում Ամուլսարի դեմ հանդես եկող մեկ այլ ակտիվիստ: Հատկանշական է, որ այս նույն ակտիվիստը անցյալ տարի Ջերմուկում հրապարակային սպառնաց, որ «զենքով խփելու է» հանքը շահագործելու դեպքում:  

Մեր տեղեկություններով մեկ տարի առաջ Լիդիանը հաղորդում է ներկայացրել այս սպառնալիքների կապակցությամբ, սակայն ոստիկանությունը այդպես էլ միջոցներ չի ձեռնարկել: Իսկ անպատժելիությունը նորանոր դրսեւորումներ ունենալու հակում ունի:

Ստացվում է Իջևանում ճանապարհ փակել չի կարելի, իսկ Ամուլսարի դեմ պայքարողները կոչ են անում Երևանում այնպիսի փողոցներ փակել, որ «նորմալ մռմռա», եթե կառավարությունը համարձակվի Ամուլսարի փորձաքննության՝ ակտիվիստների հարմար անընդունելի արդյունքներ հրապարակի: Ընդ որում մեծահոգաբար տեղեկացնում է, որ իրենք ոստիկան չեն ծեծելու:
Մի բան ակնհայտ է, որ երկրում կարգ ու կանոն հաստատելու հարցում կառավարությունը խիստ ուշացել է, Իջևանի դեպքերը ցույց տվեցին, որ կառավարությանը շարունակում են սպառնալ, այդ թվում՝ բռնության անթաքույց կոչերով: Եվ ի դեպ, դարձյալ՝ անարձագանք: Ու նման միջադեպերը առաջիկայում էլի կկրկնվեն։