Հայաստանի հավաքականի նկատմամբ անհարգալից կլինի, եթե թիմը գլխավորի Ալեքսանդր Գրիգորյանը

Երեկվանից լուրեր են շրջանառվում, թե հայազգի մարզիչ Ալեքսանդր Գրիգորյանը, որը վերջերս լքեց «Տամբովը», նշանակվելու է Հայաստանի հավաքականի գլխավոր մարզչի պաշտոնում։

Հայնտի ֆուտբոլային գործակալ Դմիտրի Սելյուկը, որը վերջերս կազմակերպեց նաև Էրիկ Վարդանյանի տեղափոխությունը  «Փյունիկից» «Սոչի», «Արմֆուտբոլի» հետ զրույցում անդրադարձել է Ալեքսանդր Գրիգորյանի` Հայաստանի հավաքականը գլխավորելու հնարավորությանը։

«Գրիգորյանին լավ եմ ճանաչում, նրա հետ շփվել եմ: Նրա ոճի մեջ է գալ որևէ մեկի մոտ, «ինչ-որ տեղ մտնել» և սկսել գովել ինքն իրեն… լավ լեզու ունի: Բոլորին ասում է այն, ինչ այդ մարդիկ ուզում են լսել, բայց երբ ժամանակ է անցնում, մարդիկ տեսնում են նրա սուտը: Ցույց տվեք, թե նա որտեղ է հաջողության հասել։ Այո միայն կանանց ֆուտբոլում։ Հայաստանի հավաքականի գլխավոր մարզիչ կանանց ֆուտբոլից մարդու նշանակելն անհարգալից վերաբերմունք կլինի ազգային ընտրանու  խաղացողների նկատմամբ։

Հասկանում եմ, որ հիմա ՀՖՖ-ն ցայտնոտում է առաջիկա երկու խաղերի պատճառով: Բայց այդ երկու խաղերում ի՞նչ կարող է հավաքականին տալ Գրիգորյանը: Ասեմ ինչ: Նա թիմի հետ կմեկնի Իտալիա, կլուսանկարվի իմ լավ ընկեր Ռոբերտո Մանչինիի ու այդ հավաքականի ֆուտբոլիստների հետ, իսկ հետո ամենուր պատմելու է, որ նրանց հետ է խաղացել: Բայց չի հիշատակի, թե ինչպես նրան վռնդեցին «ԲՄԱ Խաբարովսկից», «Տամբովից» ու այլ ակումբներից։ Գրիգորյանը հարցազրույց էր տվել, որում ասել էր, որ շատ լավ է ճանաչում հայկական ֆուտբոլը: Եթե նա այդքան լավ ծանոթ է` ինչո՞ւ եմ ես Էրիկ Վարդանյանին տեղափոխում «Սոչի» »,-նշել է Սելյուկը։