Ես գող չեմ ու որևէ մեկին չեմ թալանել, դրանք իմ փողերն են եղել․ Սամվել Բաբայան

Վերաքննիչ քրեական դատարանում այսօր շարունակվեց Հայաստան «Իգլա» տեղափոխելու եւ փողերի լվացման մեղադրանքով 6 տարվա ազատազրկման դատապարտված Լեռնային Ղարաբաղի պաշտպանության բանակի նախկին հրամանատար Սամվել Բաբայանի գործով վերաքննիչ բողոքի քննությունը:



Դատաքննության սկզբում լրացուցիչ ելույթի իրավունք տրվեց ամբաստանյալ Սանասար Գաբրիելյանին: Գաբրիելյանը նշեց, որ ստեղծված իրավիճակի հիմքում ինքն է կանգնած և Արմեն Պողոսյանն էլ իր խնդրանքով է փորձել վաճառվող զենք գտնել: «Արմենին շատ գրագետ կնիկ ունի ու ուզում էինք, որ ՕՐՕ դաշինքի միջոցով պատգամավոր դառնա: Սա է պատճառը, որ տրուբի մոտ ՕՐՕ դաշինքի նկար է եղել»,-նշեց Սանասար Գաբրիելյանը:



Դատարանը Գաբրիելյանին զգուշացրեց, որ պետական գաղտնիք պարունակող ինֆորմացիա չտրամադրի և եթե նման ինֆորմացիայի մասին է խոսելու՝ նիստը դարձնեն դռնփակ: Գաբրիելյանն ասաց, որ չի տրամադրելու գաղտնի ինֆորմացիա: «Ես զինվորական եմ , կոչումով փոխգնդապետ և առաջին օրից շարժման մեջ եմ: Ես Բելոռուսիայից քառասունմեկ միավոր զենք եմ տեղափոխել պատերազմի ժամանակ, որով կռվել են իմ տղաները:Ես քսան տարվա ծառայության թոշակս թողել եմ էս պետությանը, դա մոտավորապես, այս պահին, մի քսան միլիոն դրամ կկազմի: Ուզում եմ ասեմ, որ կան հաj տղերք, որոնք սիրում են այս ազգը: Հրթիռը նվիրելու էի բանակին»,-նշեց Գաբրիելյանը: Խոսքի մեջ Գաբրիելյանը նկատեց. «Բաբայան Սամոն միայն զենքի պիտանելիությունն էր գնահատելու»:



«Բաբայան Սամո չի, Գաբրիելյան, այստեղ պետք չի ցույց տալ, թե ինչ աստիճանի վրա են Ձեր ընկերական հարաբերությունները:Ոչ թե Բաբայան Սամո, այլ գեներալ-լեյտենանտ Սամվել Բաբայան։»,-ամբաստանյալին ընդհատեց նախագահող դատավոր Սևակ Համբարձումյանը:



Մեղադրող դատախազ Արամ Արամյանը իր խոսքում նշեց, որ վերաքննիչ բողոքը չհիմնավորված է և ենթակա է մերժման, քանի որ ոչ մի հիմնավորում չկա: Դատախազը նշեց, որ «Իգլան» ձեռք է բերվել Սամվել Բաբայանի ցուցումով և այն բոլորովին էլ բանակին նվիրաբերելու համար չէր:



Անդրադառնալով փողերի լվացման դրվագին՝ դատախազը նշեց, որ դրանք գողացված թղթադրամներ են եղել: «Ես գող չեմ ու որևէ մեկին չեմ թալանել: Դրանք իմ փողերն են եղել, ու ես բազմաթիվ անգամ միջնորդել եմ քննել նաև այն մարդուն, ով ինձ պարտք էր»,-ընդգծեց Սամվել Բաբայանը:



Ըստ մեղադրանքի՝ Սամվել Բաբայանը դրդել է մի խումբ անձանց` նախնական համաձայնությամբ ապօրինի կերպով ռազմամթերք հանդիսացող «Իգլա» տեսակի դյուրակիր զենիթահռթիռային համալիր ձեռք բերելուն, փոխադրելուն եւ պահելուն, ինչպես նաեւ փոխարկման արդյունքում ձեռք է բերել հանցավոր ճանապարհով ստացված գույք: Հանցավոր ճանապարհով ստացված գույքն օրինականացնելու (փողերի լվացում), ինչպես նաեւ ապօրինի կերպով ռազմամթերք ձեռք բերելու, պահելու եւ փոխադրելու գործով 7 մեղադրյալ կար, որոնց վերաբերյալ դատարանը դատավճիռ կայացրեց նոյեմբերի 28-ին: Արմեն Պողոսյանին մեղադրանք էր առաջադրվել ՀՀ քրեական օրենսգրքի 235-րդ հոդվածի 2-րդ մասի հատկանիշներով. նա դատապարտվեց 2 տարվա ազատազրկման: Անդրանիկ եւ Կարեն Քոչարյանին, Ժորա Զաքարյանին եւ Դավիթ Հարությունյանին դատարանը մեղադրանք էր առաջացրել ՀՀ քրեական օրենսգրքի օրենսգրքի 38-190-րդ հոդվածի 1-ին մասի հատկանիշներով:



Ըստ այդմ, Կարեն Քոչարյանը դատապարտվեց 2,5 տարվա ազատազրկման, սակայն դատարանը որոշեց պատիժը պայմանականորեն չկիրառել՝ սահմանելով փորձաշրջան 2 տարի ժամկետով։ Անդրանիկ Քոչարյանը դատապարտվեց 2 տարվա ազատազրկման, սակայն պատիժը չկիրառվեց. Դատարանը սահմանեց փորձաշրջան 2 տարի ժամկետով։ Ժորա Զաքարյանը դատապարտվեց 2 տարվա ազատազրկման, սակայն պատիժը պայմանականորեն չկիրառվեց. սահմանվեց փորձաշրջան 2 տարի ժամկետով։ Դավիթ Հարությունյանը դատապարտվեց 2 տարվա ազատազրկման, սակայն պատիժը պայմանականորեն չկիրառվեց. սահմանվեց փորձաշրջան 2 տարի ժամկետով:



**Աննա Պապիկյան**