Ընդդիմությունը ողջունում է Կարապետիչին

«Միայն կարելի է ուրախանալ, որ նորանոր մարդիկ ընդգրկվում են բռնապետության դեմ պայքարում»,- իշխանության շրջանակներում շրջանառվող խոսակցությունների առթիվ, թե  Կարապետիչը Լեւոն Տեր-Պետրոսյանի, Կոնգրեսի չափ մարդ է հավաքում, երեկ մեզ հետ զրույցում հայտարարեց ՀԱԿ համակարգող Լեւոն Զուրաբյանը: Մեր դիտարկմանը, թե ընդդիմության հարթակն իրենք չեն օգտագործում, ուստի օգտագործվում է Կարապետիչի կողմից, ՀԱԿ համակարգողը հայտարարեց. «Մենք ողջունում ենք ցանկացած նախաձեռնություն, որն ուղղված է այս բռնապետության դեմ պայքարն ուժեղացնելու գործին: Սա հենց մեր ուզածն է: Ցանկացած նախաձեռնություն, որն ուղղված է անարդարության դեմ, ժողովրդավարական ազատությունների հաստատմանը, բռնապետության տապալմանը, մենք ողջունում ենք, եթե դա անկեղծ է, եւ եթե այդ ամեն ինչի հիմքում իսկապես դրված են հենց այդ նպատակները»:



«Որքանո՞վ անկեղծ են Կարապետիչի ակցիաները եւ որքանո՞վ դրանք չեն օգտագործվի իշխանությունների կողմից» հարցին Լեւոն Զուրաբյանը պատասխանեց. «Հենց օգտագործվեն, միանգամից պարզ կլինի ժողովրդի համար, թե ինչի հետ գործ ունենք: Էնպես որ, նման մտահոգություն չկա: Ինչպես անցյալում, հիմա էլ ցանկացած նման նախաձեռնություն կամ ապացուցում է իր անկեղծությունը եւ դառնալու է մեր դաշնակիցը պայքարում, կամ, մտնելով իշխանության հետ գործարքների մեջ, միանգամից վարկաբեկվելու է ժողովրդի առջեւ»:



Այսինքն, Դուք ողջունում եք Կարապետիչի գործունեությունը՝ հարց ուղղեցինք ընդդիմության ներկայացուցչին: «Ես ասացի՝ մենք ողջունում ենք ցանկացած նախաձեռնություն, որն ուղղված է բռնապետության դեմ, եւ ցանկացած նման նախաձեռնություն համարելու ենք մեր դաշնակիցը»: Հետաքրքրվեցինք, թե ՀԱԿ-ը չի պատրաստվո՞ւմ ավելի ինտենսիվ դարձնել հանրահավաքային պայքարը:



«Ավելի ինտենսիվ ասելով ի՞նչ ի նկատի ունեք: Մենք բավական ինտենսիվ չե՞նք հանրահավաքներ անցկացնում: Անցյալ տարի 7 համապետական հանրահավաք ենք անցկացրել, դեկտեմբերի 10-ին անցկացրել ենք երթ: 3 հանրահավաք անցկացրել ենք դեկտեմբերի 17-ին, ու համարում եք, որ դա բավականաչափ ինտենսիվ չէ՞»,- հարցին հարցով պատասխանեց Զուրաբյանը: Ըստ նրա՝ ՀԱԿ մարտավարությունը փոխվելու է քաղաքական իրավիճակի թելադրանքով: Երեկ Կարապետիչը սպառնացել է միանալ ՀԱԿ-ին, եթե իշխանությունը չընդունի իր պահանջը, ուստի ՀԱԿ համակարգողին հարցրինք, թե իրենք ընդունելո՞ւ են Կարապետիչին:



«Կոնգրեսը կուսակցությունների բաց ալյանս է: Բոլոր նրանք, ովքեր ընդունում են Կոնգրեսի հռչակագրի հիմքում ընկած նպատակները, կարող են միանալ ՀԱԿ-ին»,-պատասխանեց Զուրաբյանը: Ինչ վերաբերում է մեկ այլ քաղաքական ուժի՝ «Ժառանգության» ակտիվությանը, ապա վարչության նախագահ Արմեն Մարտիրոսյանի խոսքերով՝ «Ժառանգությունն» ամենից ակտիվն է. «Չեմ կարծում, որ որեւէ քաղաքական ուժ ավելի ակտիվ է եղել, քան «Ժառանգությունը» այս ընթացքում, եւ մենք մեր ակտիվությունը շարունակելու ենք: Ինչ վերաբերում է այլ ուժերին, ես բարի ճանապարհ եմ մաղթում բոլորին, բայց պետք է նշեմ, որ ցանկացած քաղաքական ուժ պետք է հանդես գա այն դիրքերից, որում իրականում կա, հակառակ պարագայում կեղծ խաղերը միանշանակ անընդունելի են լինելու»:



Բայց չէ որ ընդդիմությունը հարթակը դատարկ է թողել, ուստի Կարապետիչն է գնում այնտեղ՝ Արմեն Մարտիրոսյանը պատասխանեց. ««Ժառանգությունն» արդեն իր հարթակն ունի, դա խորհրդարանն է: Կարծեք թե բոլոր քաղաքական ուժերը պայքարում են, որ խորհրդարան մտնեն, որ այդ հարթակն ունենան: Մատենադարանի հարթակը, եթե անհրաժեշտություն գտնենք օգտագործելու, մենք, իհարկե, կօգտագործենք: Ինչ վերաբերում է հարթակի դատարկ լինելուն, ես կարծում եմ՝ ընդդիմությունն իրական աշխատանքի կարիք ունի, եւ միայն հարթակում լինելով չէ, որ կարելի է քաղաքական ուժին ակտիվ կամ պասիվ դիտել: Այս պահին տեսանելի է, որ Կարապետիչի միտինգների մասնակիցներն այնքան էլ միանշանակ ընդդիմության ընտրազանգվածը չեն: Այնտեղ, կարծում եմ, իշխող կուսակցություններին, մասնավորապես ԲՀԿ-ին ձայներ տվող մարդիկ են: Եվ Տիգրան Կարապետիչն այս պահին իշխանական այդ ռեսուրսի մի մասն է կարծես թե փորձում վերցնել: Ինձ համար ընդդիմություն չի Տիգրան Կարապետիչը»: