«Ես գնում եմ հաղթելու»

Էրեբունի համայնքի մի մասն ընդգրկող թիվ 12 ընտրատարածքում  հետաքրքիր պայքար է սպասվում: Նախ այս շրջանն արդեն հայտնի է նախորդ ընտրությունների աղմկոտ պատմություններով, համայնքի նախկին ղեկավար Մհեր Սեդրակյանի (Թոխմախի Մհեր) ղեկավարությամբ, ապա՝ սա այն հազվադեպ ընտրատարածքներից է, որտեղ 4 ընդդիմադիր թեկնածու է առաջադրվել, որտեղ չկա ՀՀԿ թեկնածու:  ՀԱԿ-ի կողմից առաջադրվել է Տիգրան Տեր-Պետրոսյանը, «Ժառանգությունից»` Անահիտ Բախշյանը, ՕԵԿ-ից` Ռոբերտ Մասումյանը, ՀՅԴ-ից` Կառլեն Գեւորգյանը, լրագրող Գոհար Վեզիրյանը եւ ԲՀԿ-ից Լյովա Խաչատրյանը: Հիշեցնենք, որ Ապարանից մի քանի անգամ Աղվան Հովսեփյանի հովանավորությամբ պատգամավոր ընտրված Լ. Խաչատրյանն այս անգամ նույն ընտրատարածքում չառաջադրվեց, որովհետեւ նրա փոխարեն որոշվեց պաշտպանել Վրեժ Մարկոսյանի թեկնածությունը: Եվ ահա, օրեր առաջ տեղեկություններ տարածվեցին, որ ՀՀԿ-ն որոշել է այս ընտրատարածքը «հանձնել» ոչ թե կոալիցիոն գործընկերոջը՝ ԲՀԿ թեկնածուին, այլ ընդդիմադիր Տիգրան Տեր-Պետրոսյանին: Բանն այն է, որ ՀՀ գլխավոր դատախազ Աղվան Հովսեփյանի հետ ունեցած տարաձայնությունների արդյունքում Լ. Խաչատրյանը վերջին շրջանում մի թեթեւ քննադատեց կառավարության գործունեությունը: Իսկ Տիգրան Տեր-Պետրոսյանը վատ  հարաբերություններ չունի համայնքի եւ թաղային հեղինակությունների, համայնքի նախկին ղեկավարության հետ:



Զրուցեցինք երկու թեկնածուների հետ՝ պարզելու այստեղ տիրող իրավիճակը: Ի դեպ, Անահիտ Բախշյանը մեզ հետ զրույցում ասաց, որ ոչ մի սցենարի մասին չի ուզում լսել: «Ում են որոշել հանձնեն, իրենք գիտեն, բայց ես գիտեմ իմ գործը, իմ արածը, իմ ցանած սերմերը եւ համոզված եմ, որ իմ բերքը շատ բերքառատ է լինելու, մնացածներինը չգիտեմ: Ես գիտեմ, որ որպես ընդդիմադիր թեկնածու՝ ընդունված եւ ճանաչված եմ այդ տարածքում եւ 8 տարի ես այդ տարածքում այնքան սերմ եմ ցանել, ջրել, խնամել»,- ասաց Բախշյանը:



Տիգրան Տեր-Պետրոսյան, 35 տարեկան, Լեւոն Տեր-Պետրոսյանի եղբորորդին:



- Դուք երբեւէ հրապարակային գործունեություն ծավալե՞լ եք, Ձեր մասին որեւէ բան չի գրվել, միայն հայտնի է, որ Դուք բիզնես ունեք: Ի՞նչը դրդեց Ձեզ առաջադրել Ձեր թեկնածությունը, եւ արդյոք գիտակցո՞ւմ եք պատգամավորի աշխատանքի լրջությունը:



- Իհարկե գիտակցում եմ պատգամավորի աշխատանքի լրջությունը: Մի մոռացեք, որ ես 2002-ին ընտրվել եմ որպես համայնքի ավագանի, 2005-ին վերընտրվել, հետեւաբար բավականին տեղյակ եմ խնդիրներից եւ ծանոթ գործի նրբություններին: Այս առումով որեւէ խնդիր չեմ տեսնում, որ կարող եմ այդ աշխատանքն իրականացնել: Երբ Հայ ազգային կոնգրեսը որոշում կայացրեց բոլոր 41 ընտրատարածքներում թեկնածուներ առաջադրել, իսկ քանի որ ես ՀԱԿ Էրեբունու կառույցի ղեկավարն եմ, պատրաստակամություն հայտնեցի համայնքն ընդգրկող ընտրատարածքներից մեկում առաջադրել իմ թեկնածությունը:



- Բայց Դուք դեռ բավականին երիտասարդ եք, անփորձ, ինչո՞ւ եք համոզված, որ կարող եք զբաղվել օրենսդիր գործունեությամբ:



- Եթե նայում ենք, թե ովքեր են այսօրվա ԱԺ պատգամավորները, ապա ես վստահեցնում եմ, որ կարող եմ բոլորից լավ այդ գործով զբաղվել: Եվ հետո չեմ ընդունում Ձեր ձեւակերպումը, որ քաղաքականության մեջ նոր անուն եմ, նոր մարդ: Ես ծնվել եմ քաղաքականության մեջ. 10-11 տարեկան էի, երբ սկսվեց 88-ի շարժումը: Այն ժամանակ բոլորը ընտանիքով գնում էին հրապարակներ, եւ մեր ընտանիքը չէր կարող չլինել: Ես 10-11 տարեկանից մեծացել եմ Ազատության հրապարակում, եւ քաղաքականությունն ինձ համար առօրեական դպրոց է եղել, որը ես անցել եմ: 2007-ին, համաժողովրդական շարժման սկզբում էլ արդեն ես հասուն տարիքում էի, մեծ տղամարդ եւ այդ շրջանում էլ ավարտեցի քաղաքականության համալսարանը, լսեցինք ուժեղ քաղաքական գործիչների դասախոսություններ: Ես Ձեզ ասեմ, վստահ եմ, որ ոչ միայն ես, այլեւ յուրաքանչյուր երիտասարդ, ով այս տարիներին Ազատության հրապարակում է եղել, կարող է ասել, որ ինքը քաղաքական գործիչ է, եւ վստահեցնում եմ, որ նրանք կարող են այսօրվա ԱԺ պատգամավորներից յուրաքանչյուրից լավ զբաղվել այդ գործով:



- Իսկ օրենսդիր աշխատանքն ինչո՞ւ եք գերադասում բիզնես գործունեությունից:



- Արդեն շուրջ 5 տարի է, որ ես, կարելի է ասել, մոռացել եմ բիզնես գործունեությունը: 2007-ից սկսած, այսինքն համաժողովրդական շարժման սկսվելու առաջին իսկ օրերից մոռացել եմ բիզնես գործունեությունս եւ մտել քաղաքականություն: Ինչու, որովհետեւ այդ օրվանից սկսեց մի շարժում, որը կարող էր փոփոխություն բերել երկրում…  Չեմ ժխտում, որ զբաղվել եմ, հիմա էլ ունենք ընտանեկան բիզնես, որով ես չեմ զբաղվում, ունենք հյուրանոցային համալիր՝ «Մուսա լեռ» է:



- Բայց վերջին հինգ տարվա ընթացքում Դուք երբեւէ աչքի չեք ընկել, հրապարակային գործունեություն չեք ծավալել:



- Իմ կարծիքով, պարտադիր պայման չի հրապարակային գործընթացներում ակտիվ լինելը, այսինքն՝ միայն ղեկավար կազմով չի, որ պետք է փոփոխությունների հասնել: Ու պարտադիր չի բեմում լինես, հարթակում լինես, այլ գործեր էլ կան, որոնցով ես եմ զբաղվել, եւ երեւի ստացվել է, որ այսօր իմ առաջադրմանը հավանություն են տվել:



- Իրականում խոսակցություններ կան, որ Դուք լավ կապեր ունեք Ձեր համայնքի թաղային հեղինակությունների, գողականների հետ, Ձեր հույսը նրանք են:



- Ինչ է նշանակում թաղային հեղինակություն, «գողական» ասածը չեմ ընդունում: Իրականում բոլոր թաղերում էլ կան մեծ հեղինակություն ունեցող մարդիկ, հիմա ես էլ ունեմ ընկերներ, որոնք ունեն մեծ շրջապատներ, դա չի նշանակում, որ այդ մարդիկ թաղային հեղինակություններ են: Բացի դրանից, չեմ ընդունում, որ թաղային հեղինակությունները պիտի ինչ-որ մեկին պաշտպանեն, որ նա դառնա թաղապետ, պատգամավոր կամ չգիտեմ ուրիշ բան:



- Ներկայիս թաղապետի հետ էլ լավ հարաբերություններ ունեք:



- Իմ՝ ավագանի եղած տարիներին ինքն աշխատում էր թաղապետարանում, ես նրան միայն այդտեղից գիտեմ:



- Օրեր առաջ մամուլը հրապարակեց Ձեր եւ Էրեբունու նախկին թաղապետ, ՀՀԿ-ական Մհեր Սեդրակյանի՝ Թոխմախի Մհերի հանդիպման մասին, որից հետո խոսակցություններ տարածվեցին, որ թիվ 12-ը «հանձնելու» են Ձեզ: Ի՞նչ հարաբերություններ ունեք Սեդրակյանի հետ:



- Չեմ ընդունում այդ «հանձնել»-ը: Իշխանությունների սեփականությունը չէ այդ տարածքը, ժողովուրդը պիտի որոշի ում ձայն տա: Իսկ Սեդրակյանի հետ հանդիպումը, արդեն առիթ ունեցել եմ պարզաբանելու, որ եղել է բացառապես իր նախաձեռնությամբ, քննարկեցինք, որպեսզի ընտրություններին ապօրինություններ չլինեն տարածքում, քանի որ նախորդ բոլոր ընտրություններին այս համայնքն աչքի է ընկել սկանդալային միջադեպերով:



- Իր շահագրգռվածությունն ինչո՞վ էր բացատրում:



- Ասեմ Ձեզ, ես էլ եմ շահագրգռված, որ խնդիրներ չառաջանան: Ի վերջո ընտրությունը լինում է մեկ օր, բայց այդ նույն թաղի բնակիչները հաջորդ 4-5 տարիներին իրար հետ խնդիրներ են ունենում՝ սա այս մարդու թիմն է, նա՝ այն: Հիմա այս հանդիպումն էլ նախեւառաջ համայնքի բնակիչների շահերից էր, որպեսզի իրենց հարաբերություններն այս ընտրությունների պատճառով չլարվեն եւ ոչ թե տարիներ շարունակ իրար թարս նայեն: Վերջը դուռ-դռան ապրում ենք, անկախ նրանից՝ ես ուրիշ թիմ եմ, Մհեր Սեդրակյանը՝ ուրիշ:



- Մհեր Սեդրակյանն այդ հանդիպման վերաբերյալ հայտնել էր, որ ինքը շատ կուզենար, որ թիվ 12-ում հաղթի համայնքի մարդը, եւ Ձեր անունն էր նշել: Գուցե Սեդրակյանը Ձեր թեկնածությունն աջակցելու հավաստիացումներ էլ է տվել:



- Ոչ, նման բան չի եղել, մենք տարբեր թիմերում ենք, եւ ճիշտ չի նայվի, որպեսզի սատարի հակառակորդ թիմի թեկնածուին: Թեպետ այդ հարցը կարող եք տալ հենց Սեդրակյանին:



- Ձեր ընտրատարածքում առաջադրված թեկնածուներից ո՞ւմ եք համարում Ձեր մրցակիցը:



- Բոլոր թեկնածուներն էլ իմ համար մեկ են, սա մրցապայքար է, եւ բոլորն էլ առաջադրվել են հաղթելու համար: Հետեւաբար բոլորը միասին մեկ մրցակից են ինձ, ես գնում եմ հաղթելու, ես չեմ գնում մտածելով, որ այս կամ այն թեկնածուից ձայն փախցնեմ կամ խանգարեմ ինչ-որ մեկին: Ես չեմ ուզում մտածել որեւէ թեկնածուի մասին եւ մեկնաբանել նրանց ասածները:



- Այս ընտրատարածքում միաժամանակ 4 ընդդիմադիր թեկնածու կա, դժվար չի՞ լինի պայքարը, եւ ճի՞շտ եք համարում միասնական թեկնածու չունենալու փաստը:



- Դե գիտեք ինչ, բոլորն էլ թող փորձեն իրենց հնարավորությունները, իմ համար խնդիր չէ, բացի դրանից, ես ընդդիմադիրներից առաջինն եմ այս ընտրատարածքում հայտ ներկայացրել:



- Փաստը, որ առաջին նախագահը Ձեր հորեղբայրն է, Ձեզ կօգնի՞, թե՞ կվնասի:



- Վնասելու որեւէ խնդիր չեմ տեսնում, իհարկե կօգնի, բայց նպատակը ինձ, կոպիտ չհնչի՝ ընտրել տալն է, եւ Ձեր ասած փաստը հաստատ չի դառնա մեր քարոզչության հիմնաքարերից:



- Իսկ Ձեր կարծիքով, այս ընտրատարածքում ընտրախախտումներ, ընտրակեղծիքներ կլինե՞ն, որովհետեւ այստեղ ՀՀԿ-ն թեկնածու չի առաջադրել, իսկ մյուս ուժերի հետ էլ Դուք ընտրությունների վերահսկման նպատակով ընդհանուր փաստաթղթի տակ եք ստորագրել:



- Ես կողմ եմ արդար ընտրություններին, եւ այդ փաստաթուղթը մեզ չի սահմանափակելու: Եթե որեւիցե մեկի կողմից տեսնենք ապօրինություն, կանխելու ենք: …Մինչ օրս ոչ մի խոչընդոտ չի եղել,  ընտրակաշառքների մասով ասեմ, որ բավականին հետեւողական ենք, հետեւում ենք, որպեսզի բացահայտենք եւ կանխենք նման դեպքերը:



 



ՀԳ. - Հարցազրույցը այս տարածքի մյուս թեկնածուի՝ Լյովա Խաչատրյանի հետ կարդացեք մեր հաջորդ համարում