Այդպես ավելի հեշտ չէ՞ր լինի Երեւանի գրավումը
hraparak
24 Ապրիլ 2013 | 05:41
0
ՀՀԿ փոխնախագահ Գալուստ Սահակյանը հայտարարել էր, որ եթե անգամ ընդդիմադիրը դառնա Երեւանի քաղաքապետ, չի կարողանա խնդիրներ ստեղծել իշխանությունների համար, որովհետեւ «աղբահանություն անելու համար ինչո՞ւ պիտի կառավարության հետ հակադրվի»: Շատ է արծարծվել, որ նման մոտեցման նպատակն ավագանու ընտրություններին ժողովրդին պասիվության մղելն է: Մամուլում այլ մոտեցումներ էլ են եղել, բայց ինձ հետաքրքիր էր Տարոն Մարգարյանի մոտեցումը, արձագանքը, որը չեղավ: Ստացվում է, որ Տարոն Մարգարյանն աղբահանությա՞մբ է միայն զբաղվում: Կամ լավագույն դեպքում լիֆտերի վերանորոգմամբ… Շատ եկամտաբեր գործ է, եթե հաշվի առնենք նրա ունեցվածքի գույքագրված մասը: Ընդդիմադիր թեւը փորձում է լրջացնել քաղաքապետի գործառույթը, ասել է թե՝ Տարոնի գործը: Քաղաքապետի պաշտոնն այնքան են լրջացնում ու քաղաքական դարձնում, որ զարմանում ես՝ բա որ այդքան լուրջ, քաղաքական պաշտոն է, ինչո՞ւ նախագահի թեկնածուները չեն պայքարում այդ տեղի համար: Տարոնն ի՞նչ գործ ունի այդտեղ…
Հանրությունն ավելի քան կկարեւորեր քաղաքապետի քաղաքական գործառույթը, եթե, ասենք, Գագիկ Ծառուկյանը կամ Րաֆֆին քաղաքապետի տեղի համար պայքարեին: Ուժերն ավելի կմոբիլիզացվեին… Ի՞նչն էր խանգարում նրանց դա անելու: Չէ՞ որ նրանք ՀՀ նախագահ չեն եղել, եւ այդ տեսանկյունից լրիվ դրական կընկալվի այդ տեղի համար նրանց պայքարը: Ինչո՞ւ քաղաքական այդ պաշտոնի համար կուսակցություններն առաջին դեմքով հանդես չեն եկել: Այդպես ավելի հեշտ չէ՞ր լինի Երեւանի գրավումը:
Հասմիկ ԲԱԲԱՋԱՆՅԱՆ
Կարծիքներ