Ասաց՝ ինձ «վայենի» շորերով կթաղեք. Սողոմոն Քոչարյանը մահացավ

Ցմահ ազատազրկման դատապարտված, 21 տարի անազատության մեջ գտնվող եւ միայն վերջերս ազատություն ստացած հետախույզ Սողոմոն Քոչարյանը մահացել է: Այս մասին Hraparak.am-ի հետ զրույցում ասաց նրա մայրը՝ Զինա Քոչարյանը:

Նա նշեց, որ որդին մահացել է գիշերը 0115-ին  «Սուրբ Գրիգոր Լուսավորիչ» հիվանդանոցում: Զինա Քոչարյանն ասաց, որ դիակը դեռ դիահերձարանում է, օրվա ընթացքում կորոշեն հոգեհանգստի եւ հուղարկավորության ժամն եւ վայրը:

«Չորս օր է՝ տանջվում էր, ցավերի մեջ, կոկորդը խեղդում էր, երեկ մահացավ, ասաց՝ ինձ վայենի շորերով կթաղեք ու վերջ, ընկերները արդեն բերել են վայենի շորերը, չգիտեմ՝ կարող է Եռաբլուր տանեն, կորոշվի էսօր»,-ասաց Սողոմոն Քոչարյանի մայրը:

Նշենք, որ Սողոմոն Քոչարյանն 2 ամիս է, ինչ ծանր վիճակում հիվանդանոցում էր: Նա տառապում էր սրտի իշեմիկ հիվանդությամբ՝ 4-րդ աստիճանի սրտային անբավարարությամբ (իշեմիկ կարդիոմիոպաթիա), ունի հետինֆարկտային քրոնիկ անեւրիզմա, հիվանդ էր նաեւ կանգային թոքաբորբով։ 

Հիշեցնենք, որ Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Մնացական Մարտիրոսյանը  որոշում է կայացրել, համաձայն որի` իրանահպատակ ադրբեջանցու սպանության համար ցմահ ազատազրկման դատապարտված, ազատամարտիկ Սողոմոն Քոչարյանը հիվանդության հիմքով վաղաժամ ազատ արձակվեց:

Նա մահապատժի էր դատապարտվել 1995-ին` Իրանի Իսլամական Հանրապետության քաղաքացուն Հայաստանում սպանելու համար, սակայն հետո պատիժը փոխարինվել էր ցմահ ազատազրկման։

Պատժի կրման ընթացքում Սողոմոն Քոչարյանի կինը մահացել է ծանր հիվանդությունից, աղջիկը 19 տարեկան հասակում ինքնասպանություն է գործել: