Լրջագույն օրակարգով են աշխատում

ԵԽԽՎ հայկական պատվիրակությունը, խոսելով լրատվամիջոցների կողմից որոշ «անզգույշ» հրապարակումների մասին, որտեղ նշված էր, որ ԵԽԽՎ հայկական պատվիրակությանը կարող են ձայնի իրավունքից զրկել, դիմել է հայաստանյան լրատվամիջոցներին. «Հարգելի՛ գործընկերներ, այս օրերին, երբ մեզ համար անչափ կարեւոր միջազգային հարթակում՝ Եվրոպայի խորհրդի խորհրդարանական վեհաժողովում, մենք լրջագույն օրակարգով մեր աշխատանքն ենք անում, լրագրողական, ուզում ենք հավատալ, մի անզգույշ եւ անփույթ հրապարակում դարձել է ոչ միայն հայաստանյան լրատվամիջոցների եւ քաղաքական շրջանակների քննարկման թեման, այլ նաեւ նշյալ ապատեղեկատվությունը գերագույն հաճույքով տիրաժավորում է ադրբեջանական մամուլը։ Մինչդեռ քիչ թե շատ պատասխանատվությունը հուշում էր, որ հատկապես այս օրերին, երբ մենք միասին՝ քաղաքական գործիչներ, լրատվամիջոցներ, քաղաքացիական հասարակություն, մեկ ընդհանուր խնդիր ունենք լուծելու, անհրաժեշտ էր յուրաքանչյուր տեղեկատվություն հրապարակելուց առաջ առավել պրոֆեսիոնալ աշխատել ԵԽԽՎ փաստաթղթերի հետ։

Փաստն այն է, որ Հայաստանի եւ հայկական պատվիրակության հանդեպ որեւէ պատժամիջոցի մասին այս նստաշրջանի որեւէ զեկույցում, այդ թվում՝ բյուրոյի առաջընթացի զեկույցում, խոսք չի եղել եւ չէր կարող լինել։ Մինչդեռ անզգույշ մեկ հրապարակումը դարձավ ադրբեջանական եւ, ցավոք, նաեւ հայաստանյան որոշ լրատվամիջոցների թեժ թեման, ինչը, հատկապես այս օրերին, բացարձակ անընդունելի է։ ԵԽԽՎ պատվիրակության բոլոր անդամները միշտ պատրաստ են ցանկացած հարցի վերաբերյալ սպառիչ պարզաբանումներ տալ լրատվամիջոցների մեր գործընկերներին՝ նման ապատեղեկատվություններից խուսափելու եւ բացառապես ճշգրտված, իրականությանը համապատասխանող տեղեկատվություն փոխանցելու համար»։ Ի դեպ, վերջին խոստումը թերեւս տեսական է, քանի որ պատվիրակության անդամներից մեծ մասի հետ կապ հաստատել այս օրերին չի հաջողվում։