Հիմա Շիրակի մարզպետը խաղադրույք կատարե՞լ է, թե՞ ոչ

Երեկ ընթանում էր Եվրոպայի ֆուտբոլի առաջնության կիսաեզրափակիչ խաղը։ Մրցում էին Գերմանիայի և Ֆրանսիայի հավաքականները։ Գյումրիից մեր աղբյուրները հայտնում են, որ երեկ՝ խաղից առաջ՝ երեկոյան 7-8-ի սահմաններում, Շիրակի դաշնակցական մարզպետ Հովսեփ Սիմոնյանին նկատել են «Վիվառո» բույքմեյքերական գրասենյակ մուտք գործելիս։ Ըստ երևույթին՝ մարզպետը որոշել էր խաղադրույք կատարել։ Մեր աղբյուրը նախ ճանաչել է մարզպետի մեքենան՝ 027 LL 55 պետհամարանիշով սև Toyota Prado ամենագնացը, հետո տեսել է նաև մարզպետին ու վարորդին՝ մեքենայից իջնելիս և «Վիվառո» մտնելիս։

Hraparak.am-ը զանգահարեց մարզպետ Սիմոնյանին՝ պարզելու, թե ո՞ր թիմի երկրպագու է և ի՞նչ խաղադրույք է կատարել։

«Բայց ուժեղ եք ասում... ընդհանրապես ես էդ ֆուտբոլը չեմ նայել, էդ ժամին էլ քնած եմ եղել՝ շատ խորը ու բավական հոգնած։ Էդ ինչ- որ ասում ես, ես չգիտեմ՝ էդ ում է վերաբերվում, ինչի ես ասում դա»,-ասաց նա։

-Գյումրիում մեր աղբյուրը նկատել է Ձեր մեքենան «Վիվառոյի» գրասենյակի մոտ, Դուք էլ վարորդի հետ իջել եք մեքենայից ու մտել «Վիվառոյի» գրասենյակ։

-Ու՞մ մեքենան էր, կարո՞ղ եք իմ մեքենայի համարն ասել։

-Այո՝ 027 LL 55։

-Հա, Դուք մտածում եք, որ ես եղել եմ «Վիվառոյի» դուռը, հա՞։

-Ոչ թե մտածում եմ, այլ մեզ այդպես փոխանցեցին Գյումրիից։ Դուք, առհասարակ, ֆուտբոլային հետաքրքրություններ ունե՞ք։

-Ոչ,ոչ։

-Բայց պետհամարանիշը ճի՞շտ ասացինք՝ 027 LL 55:

-Այո, բա մարզպետի պետհամարանիշը չգիտենա՞ք, ինչ է։ Էդ մեքենան, ընդհանրապես, ես որ գալիս եմ տուն, ինքը կանգնում է։

-Այդ դեպքում ու՞մ մեքենան է եղել այդ պետհամարանիշով։

-Ես չգիտեմ՝ ում մեքենան է եղել, չգիտեմ՝ ինչի մասին է խոսքը։

Վահե ՄԱԿԱՐՅԱՆ