ԲՀԿ-ն Գյումրիում պահանջելու է վերահաշվարկ

ԲՀԿ-ական պատգամավոր Միքայել Մելքումյանի խոսքով՝ երեկ կայացած ՏԻՄ ընտրություններին իրենց ուշադրությունը հիմնականում կենտրոնացած է եղել Գյումրիի վրա, որովհետև նախ Գյումրին ամենաշատն է տուժել վերջին 30 տարում. բնակչության թիվը 3 անգամ կրճատվել է՝ 240 հազարից հասել է մինչեւ 80 հազար. «Գյումրիում Բարգավաճը լուրջ ծրագրեր ուներ անելու, Գյումրիի մասին մենք օրենքը ունեինք, լավ կառույց ունեինք և Վարդևան Գրիգորյանն էլ շատ արժանավոր թեկնածու էր: Ամենամեծ ուշադրությունը, ամենամեծ քարոզարշավը մեր քաղաքական թիմով՝ ես, Նաիրա Զոհրաբյանը, Լյովա Խաչատրյանը, Վահան Կարապետյանը, Վահե Էնֆիաջյանը միշտ եղել ենք այնտեղ: Գյումրիում մենք գոհ ենք մեր արդյունքներից կուսակցական առումով, պարզ է՝ բացարձակ հաղթանակ պետք է լիներ, բայց 21 տոկոսը լուրջ թիվ է, և ուզում եմ շեշտեմ, որ Բարգավաճի համար սեպտեմբերի 18-ից հետո սա լուրջ քննություն էր, որ նոր պայմաններում, երբ մեզանից անջատված կան այլ ձևավորված քաղաքական ուժեր, որոնք դառնում են հենց մեր քաղաքական մրցակիցները, այսինքն՝ կրկնակի, եռակի ավելի բարդանում է: Մենք կարողացանք ցույց տալ նրանց, որ հաղթահարեցինք այդ ամեն ինչը, այնպես որ Գյումրիում, մենք գոհ ենք հարաբերականորեն, բացարձակ քաղաքապետ չունենք, բայց լրջագույն, շատ պատկառելի ձայներ ունենք:

Ինչ վերաբերում է Վանաձորին, այնտեղ մենք հաղթահարել ենք 6 տոկոսանոց արգելքը, բայց արդյունքերից դժգոհ ենք, որովհետև այնտեղ կառույցի հետ կապված, թեկնածուի հետ կապված, որը նոր էր, այսինքն՝ այս ամեն ինչը պետք է վերաիմաստավորել, քննարկման լուրջ խնդիրներ ունենք, բայց շատ տեղերում, գյուղական համայնքներ կան, օրինակ` Գեղարքունիքի երեք համայնքում, հաղթել ենք, այլ համայնքներում ունենք նաև անկուսակցականներ, որոնց աջակցել ենք, մենք կարանք ձևակերպենք, որ արդյունքից գոհ ենք, բայց հաշվի առնելով բոլոր սահմանափակումները, խնդիրները: Մենք փաստորեն նվազագույն ռեսուրսներով լուրջ արդյունքների ենք հասնել»:

-Արդյունքերի հետ կապված բողոքարկելո՞ւ եք, պահանջելո՞ւ եք վերահաշվարկ կատարել:

Քիչ առաջ խոսում էինք Վարդևան Գրիգորյանի հետ, անպայման Գյումրիի դեպքում բողոքարկելու ենք, համոզված ենք՝ այնտեղ իրավիճակ է փոխվելու: Այժմ դիտարկում ենք, քննարկում ենք այդ հնարավորությունը այլ տեղերում անելու, բայց այժմ կոնկրետ Գյումրիի մասին է: Արձանագրություններ կան տարբեր տեղամասերից, որ պրոբլեմ կա, և այդ գործընթացը կսկսվի այսօր:

-Պարոն Մելքումյան, երեկ թե Գյումրիի, թե Վանաձորի տեղամասերից ահազանգեր էին լինում բազմաթիվ ընտրախախտումների մասին:

Ես երեկ ինքս եղել եմ ամբողջ օրը Գյումրիում, պետք ա ասեմ՝ ոնց երկրի վիճակն ա, տենց է ընտրությունների վիճակն ա, միշտ ասել եմ՝ եթե երկրում շատ պրոբլեմներ կան, չի կարա ընտրական գործընթացը կատարյալ լինի: Եղել են խախտումներ, մենք էլ ենք արձանագրել. 25 դպրոցի ընտրատեղամասում մեկը քվեարկել ա վարորդական իրավունքով, 2-րդ դպրոցում վեճ ա եղել, իհարկե կուտակումներ կային, 50 մետրի շառավիղով հեռավորությունը չի պահպանվել: Այն բնորոշ բաները, որոնք միշտ եղել են…, կառավարությունը ընդունեց, որ երկրի վիճակը ծայրահեղ վատ ա, մի քիչ հասկանալի չի, որ երկրի ծայրահեղ վիճակը վատ ա ու մարդիկ քաղաքական մեծամասնությանը ձայն են տալիս: Ես կարող եմ ասել, որ դա երկու պատճառ ունի, հիմնական պատճառն այն է, որ միգուցե ընտրությունները չեն դիտարկվում քաղաքական, այսինքն՝ ՏԻՄ ընտրությունները չեն կապում իրենց վիճակի հետ, քաղաքապետին չեն ընկալում քաղաքական անձ, այլ որպես տեղական, համայնքային: Երկրորդը, որ ոչ իշխանական ուժերը վերաիմաստավորելու կարիք ունեն իրենց գործունեությունը, հատկապես պատկերը պարզ դարձավ նոր ի հայտ եկած մարդ-կուսակցությունների առումով, չեմ ուզում անվանական ասել, որոնք որ մի տոկոս էլ չհավաքեցին, կյանքը ցույց տվեց, որ դոշ ծեծելով, որ անընդհատ քննադատում են, դա չաշխատեց: