«Խղճի բանտարկյալին» հաց հասցրին (ֆոտոշարք)

«Արթուրն ուղղակի լուռ, առանց խոսելու մեզ պես, ուղղակի մարդն իր խղճի պարտքը կատարեց ու իր կյանքը, անվտանգությունը, առողջությունը վտանգեց, գիտեք, որ առողջական խնդիրներ ունի: Արթուրը հանցագործ չէ, նա խղճի բանտարկյալ է».- նշում է Դավիթ Սանասարյանը, ով կազմակերպել էր «Հէակցիան:
Այսօր Էրեբունի թանգարանի մոտ հավաքվել էին մի խումբ մարդիկ, ովքեր իրենց հետ սնունդ էին բերել: Այդ սնունդը նրանք փոխանցեցին Արթուր Սարգսյանին, ով գտնվում է Նուբարաշեն քրեակատարողական հիմնարկում՝ անազատության մեջ:

Լրագրողների հետ մի փոքրիկ զրույց ունեցավ Արթուր Սարգսյանի հայրը՝ Ռոբերտ Սարգսյանը, ով հազիվ էր թաքցնում հուզմունքը: Նա նշեց, որ այս պահին միայն իր որդու ազատությունն է ցանկանում. «Նա երեք հիվանդություն ունի ծանր, պատերազմի վիրավոր, հաշմանդամ է, պորտի գրիժա ունի, ողնաշարը փշրված է, օպերացիա արած: Այդպիսի մարդուն մի ժամ չի կարելի բռնել, մի ժամ: Պատերազմի ժամանակ զենքեր էր տանում մեքենաներով: Դեռ կինն էլ կռվում էր, ասում էր՝ մի տար, քեզ որ չեն տանում պատերազմ, ինչի՞ ես գնում: Էդ էլ եղավ պատճառ, որ ընտանիքը քայքայեց, հայրենիք էր պաշտպանում, ի՞նչ հայրենիք, պաշտպանում էր, որ սենց օրն ընկնե՞ր»:

Դավիթ Սանասարյանն էլ պատմեց, որ Արթուր Սարգսյանին բանտում շատ դրական են ընդունել, այնտեղ նա հարգանք է վայելում. «Որովհետև բոլոր սոցիումներում էլ խիղճ ունեցող մարդուն գնահատում են ու հարգում են: Սա մեր խղճի պարտքն է, որ Արթուրին... բազմաթիվ դռներ ծեծեցինք քաղաքացիներով՝ «Կարմիր խաչ» և այլն, ՄԻՊ, բոլորի միջոցով փորձեցինք «Սասնա ծռերին» հաց հասցնել, և որևիցե մեկը չկարողացավ այդ հարցում մեզ օգտակար լինել: Ի՞նչ է նշանակում մարդուն զրկել սնվելու իրավունքից, Արթուրն ուղղակի լուռ, առանց խոսելու մեզ պես, ուղղակի մարդն իր խղճի պարտքը կատարեց ու իր կյանքը, անվտանգությունը, առողջությունը վտանգեց: Արթուրը հանցագործ չէ, նա խղճի բանտարկյալ է, և մենք այս ամիս հատկապես մի շարք ակցիաներ ենք իրականացնելու և անելու ենք ամեն ինչ, որ Արթուրն ազատության մեջ լինի: Ես կրկնում եմ, որ խղճի համար մարդը պետք է բանտարկության մեջ չլինի: Արթուրն ունի շատ համակիրներ, շատերը իրենց աջակցությունը տարբեր ձևերով ցուցաբերում են»:

Էրեբունի թանգարանի մոտից թվով երեսուն մարդիկ քայլերթով շարժվեցին դեպի քրեակատարողական հիմնարկ` իրենց ձեռքին ունենալով «Արթուր Սարգսյանը խղճի բանտարկյալ է ու պիտի ազատ լինի» պաստառը: «Նուբարաշեն» ՔԿՀ-ում մարդիկ բաժանեցին սնունդն ու մի մասն էլ ուղարկեցին Հայկ Հովհաննիսյանին, Արման Մխիթարյանին, Նարեկ Սարգսյանին, Ալբերտ Ավագյանին, ովքեր նույնպես գտնվում են անազատության մեջ Սարի թաղի դեպքերից հետո:

Հիշեցնենք, որ Արթուր Սարգսյանին, ով օգոստոսի 2-ին ՊՊԾ գնդում գտնված «Սասնա ծռերի» անդամներին սնունդ էր հասցրել, նույն մեղադրանքն էր առաջադրվել, ինչ խմբի մյուս անդամներին՝ ՀՀ քրեական օրենսգրքի 218-րդ հոդվածի 3-րդ մասի 1-ին կետով (պատանդ վերցնելը) և 235-րդ հոդվածի 3-րդ մասով (ապօրինի զենք զինամթերք ձեռք բերել, իրացնել, պահել, փոխադրել): Այնուհետեւ նրա մեղադրանքը փոխվեց, այժմ նա մեղադրվում է այդ հոդվածներով նախատեսված արարքներին օժանդակելու մեջ: