Եկեք դադարենք մտածել, որ եթե հայ ենք, ուրեմն պիտի միայն տանջվենք. Երևանում նախապատրաստվում են Հելոուինին
Հոկտեմբերի 31-ին գրեթե ողջ Եվրոպայում նշվում է Հելոուինը: Տոնն ունի կելտական ծագում եւ կապված է հին կելտերի ժամանակի պատկերացման հետ: Կելտերը տարին 2 ժամանակահատվածի էին բաժանում՝ լուսավոր եւ մութ: Հելոուինը մութ ժամանակի խորհրդանիշն է, որի ընթացքում երկրային եւ անդրշիրիմյան աշխարհների սահմանները թուլանում են, եւ հոկտեմբերի 31-ին անդրշիրիմյան աշխարհի ուժերը հայտնվում են երկրի վրա:
Վերջին տարիներին Հելոուինը մեծ տարածում է գտել նաեւ Հայաստանում: Հոկտեմբերի 31-ին գրեթե անհնար է քայլել մայրաքաղաքի փողոցներում եւ չտեսնել գունեղ դիմակներով, վամպիրների հանդերձանքով երիտասարդների: Տոնի՝ տարեցտարի ավելի լայն զանգվածներով տարածումը հանգեցնում է Հայ Առաքելական Եկեղեցու անհանգստությանը: «Ցավալի է, բայց ամեն տարի այս օրերին ականատես ենք լինում անցանկալի մի երևույթի, որի անունը Հելոուին է: Շատերի կողմից այն նկատվում է իբրև անմեղ և գեղեցիկ տոն, բայց իրականում լրիվ այլ բան է: Հելոուինն անմեղության քողի տակ թաքցնում է հեթանոսական մի տոն, որ կարող է լուրջ բացասական հետևանքներ ունենալ մեր հոգևոր, գիտակցական ընկալումների վրա: Զարմանալի է, թե ինչպես են մի շարք տեղեկատվական և քարոզչական հարթակներ մեծ եռանդով քարոզում և գովերգում այս օտարածին տոնը, որի միջոցով բազմաթիվ բիզնես ընկերություններ գումարներ են վաստակում»,- նշում է Տեր Համբարձում քահանա Դանիելյանը:
Տեր Համբարձում քահանան զարմանում է, թե ինչպիսի ջանք ու եռանդով ենք նշում մի տոն, որի արմատները գալիս են տարեմուտին կատարվող կելտական գիշերային խրախճանքներից, որոնք ուղեկցվում էին գինարբուքներով և անբարո տեսարաններով` հավատալով, որ այդ կերպ վերանում է ողջերի և մեռյալների աշխարհը բաժանող սահմանը: «Այս տոնակատարությունը ուղեկցում է մեզ դեպի դիվապաշտություն: Տոնի համար պատրաստվում էին հատուկ զգեստներ՝ չարը խորհրդանշող տարբեր դիմակներով ու գազանների մորթիներով: Ստացվում է` մեր հոգիները զարդարելու և Աստծուն մերձենալու փոխարեն մենք մեծ ժամանակ ենք տրամադրում այդ դիվական տոնին նվիրված հագուստների ձևավորման և կերպարանափոխության համար: Վստահ եմ, որ այս տոնի խորհրդի կամ բովանդակության մասին տոնողների մեծ մասը, եթե չասենք բոլորը, չգիտեն, այլապես երբեք չէին տրվի նման գայթակղության և կմերժեին չարիք մարմնավորող այս երևույթը»:
«Մեր երիտասարդներին պետք է խնդրենք և հորդորենք հեռու մնալ օտարամուտ նման տոներից, որոնք վնասաբեր են և ամեն կերպ հարվածում են մեր հոգևոր արժեքներին: Այդ դիվական տոնի բովանդակությունը մեզ ոչ թե մերձեցնում է Աստծուն, այլ դառնում պատճառ՝ չարին սիրաշահելու»,- նշում է Տեր Համբարձում քահանա Դանիելյանը:
Մինչ Հայ Առաքելական Եկեղեցին հորդորում է չմասնակցել այս «սատանայապաշտ» տոնին, հայ երիտասարդներից շատերը արդեն իսկ սկսել են պատրաստվել տոնակատարությանը:
Կարեն Մնացականյանը, ով ամեն տարի մեծ ոգեւորությամբ է նախապատրաստվում Հելոուինին, նշում է, որ տոնը հնարավորություն է տալիս ունենալ այնպիսի զգացողություններ, որոնք որեւէ այլ տոնի ընթացքում չես կարող ունենալ: «Մեզնից յուրաքանչյուրը կարող է իր միջի սեւ մարդուն ազատ թողնել եւ դրանից հաճույք ստանալ»:
Կարենի կարծիքով՝ պետք է շատանան այն տոները, որոնք մարդուն ազատ լինելու հնարավորություն կտան:
Տիկին Սվետան, ով եւս ամեն տարի մասնակցում է Հելոուինին, այնքան էլ համամիտ չէ այն կարծիքին, որ տոնը միայն երիտասարդներին է հաճույք պատճառում: «Մեզնից որեւէ մեկը չպետք է բաց թողնի լիցքաթափվելու եւ կյանքից հաճույք ստանալու հնարավորությունը: Եկեք դադարենք մտածել, որ եթե հայ ենք, ուրեմն պիտի միայն տանջվենք»:
Նարե Գեւորգյան
Կարծիքներ