Կառաջադրեն՝ լավ, չեն առաջադրի՝ էլի լավ
ԱԺ ՀՀԿ խմբակցության պատգամավոր Հրանտ Գրիգորյանից հետաքրքրվեցինք՝ կմասնակցի՞ հաջորդ խորհրդարանական ընտրություններին, թե՞ ոչ։ Գրիգորյանը, հիշեցնենք, ՀՀԿ-ական մեկ այլ պատգամավոր՝ գեներալ Մանվել Գրիգորյանի եղբորորդին է, ծնունդով՝ Էջմիածնի շրջանի Արշալույս գյուղից։ Պատգամավոր է ընտրվել թիվ 20 ընտրատարածքից՝ մեծամասնական ընտրակարգով։ Գրիգորյան պատգամավորները, սակայն, այնքան էլ մտերիմ հարաբերությունների մեջ չեն՝ որպես բարեկամներ, ավելի շուտ, կարելի է ասել, ոխերիմ «բարեկամներ են»։ Եվ հիմա, եթե որոշվի, որ Գրիգորյաններից երկուսն էլ կրկին առաջադրվելու են ռեյտինգային ընտրակարգով նույն ընտրատարածքում, դե յուրե բարեկամների միջեւ թեժ մրցակցություն է գնալու։ Բայց Հրանտ Գրիգորյանը դեռ տեղյակ չէ, թե ինչ որոշում կկայացվի իր մասով։ Թեեւ, եթե մի փոքր ողջամտություն կա ՀՀԿ-ում, ոչ գեներալը պետք է առաջադրվի, ոչ նրա եղբորորդին՝ խորհրդարանը նրանց տեղը չէ։
«Իմ մասնակցելով չէ, ես կուսակցական մարդ եմ, կուսակցությունը պիտի առաջադրի, իմ մասնակցելո՞վ է»,-մեր հարցին ի պատասխան՝ զարմացավ նա։
- Իսկ Դուք ուզո՞ւմ եք։
- Որ ասեմ՝ չեմ ուզում, կհավատա՞ս։
- Դե, մարդ կա, օրինակ, հոգնել է, չի ուզում, հասկանում է՝ ծանր բեռ է կրում իր ուսերին այդ մանդատով, որի տակից դժվարանում է դուրս գալ․․․
- Չէ․․․ երեւի անելու բան կա, որ առաջադրեն, կաշխատենք։
- Ի՞նչ եք արել այս չորս տարիների ընթացքում՝ որպես պատգամավոր։
- Ինչ կարողացել, արել եմ, ուժս ինչքան որ պատել է։
- Դժվար չի՞ լինի ռեյտինգային կարգով ընտրապայքարը Ձեզ համար, քանզի շատ են դժգոհում այդ համակարգից։
- Օրը կգա, բարին՝ հետը։ Չորս անգամ ընտրվել եմ, օրը կգա, բարին՝ հետը, ի՞նչ ասեմ։
- Այսինքն՝ վստահություն ունե՞ք, որ նորից կընտրվեք։
- Կարող է։ Եթե կառաջադրի կուսակցությունը, կփորձեմ։
- Ձեր տարածքում նաեւ Ձեր հարազատներն են լինելու (Մանվել Գրիգորյանի ու նրա զավակների մասին է խոսքը), որոնք մրցակցության մեջ կմտնեն Ձեզ հետ․․․
- Չեմ կարող ասել՝ ով որտեղ կլինի, ժամանակից առաջ չընկնենք։
- Եթե Սերժ Սարգսյանը չցանկանա, որ առաջադրվեք, ի՞նչ եք անելու, ինչո՞վ կզբաղվեք։
- Ոչ մի բան, ի՞նչ պիտի անենք։ Իսկ զբաղվելու շատ բան կա։ Էլի եմ ասում՝ օրը կգա, բարին՝ հետը։
- Բարին ո՞րը կլինի, որ Ձեզ նորի՞ց առաջադրեն։
- Չէ, էդ իմաստով չեմ ասում։ Կառաջադրեն՝ լավ, չեն առաջադրի՝ էլի լավ, խնդիր չկա։
Վահե ՄԱԿԱՐՅԱՆ
Կարծիքներ