Շունը, առհասարակ, երբ ուզում ես բռնել, փախչում է. «Յունիգրաֆ Իքս» ՍՊԸ

«Հաղթանակ» զբոսայգու հարակից տարծքների բնակիչները վաղուց է, ինչ ապրում են այգում թափառող շների ոհմակների վտանգավոր հարևանությամբ: Մանավանդ ձմռան օրերին քաղցած կենդանիները հարձակվում են ամեն ինչի վրա, որ շարժվում է: Այգի մտնել չի լինում, պատահում է` ոհմակով հարձակվում են նաև այգին եզրափակող մայթերով քայլող միայնակ անցորդների ու երեխաների վրա:

Խմբագրություն այցելած քաղաքացու խնդրանքով դիմեցինք քաղաքապետարանի մրցույթների «բազմակի հաղթող» «Յունիգրաֆ Իքս» ՍՊԸ-ին, որտեղից մեզ ուղղակի շշմեցուցիչ պատասխան տվեցին. «Դուք առաջինը չեք, որ այդ հարցով դիմում եք մեզ»: Իսկ ՍՊԸ-ի տնօրեն Գագիկ Գևորգյանի հետ զրույցից էլ հասկացանք, որ նաև վերջինը չենք: Նա մեզ տեղեկացրեց, որ այգին իրենց ուշադրության կենտրոնում է. «Մեր աշխատակիցները պարբերաբար այցելում են այգի, հիվանդ կենդանիներին քնեցնում ենք, իսկ առողջներին էլ, եթե հաջողվում է բռնել` ստերիլացնում»:

Հետաքրքիր է, որ հենց ծառայության ղեկավարը մեզ ասաց, որ 21-րդ դարում իրենց ունեցածը ցանցերն են, որոնք, երբ գետինը սառած է, և ծառայության աշխատակիցները չեն կարողանում լավ վազել, այնքան էլ էֆեկտիվ չեն:

Հարցրեցինք` լավ, իսկ ո՞րն է ելքը: Տնօրենը կրկնեց իր նախորդ միտքը, որ այգին իրենց ուշադրության կենտրոնում է, և աշխատակիցները պարբերաբար այցելում են:

-Պարոն Գևորգյան, լավ է, որ ձեր աշխատակիցները պարբերաբար այգի են այցելում, բայց ի՞նչ են անում նրանք այգում, որ շները պակասելու փոխարեն շատանում են:

- Եթե կարողանում են` բռնում են, եթե չեն կարողանում` չեն բռնում,- եղավ պատասխանը, իսկ հետո նա մեզ լուսավորեց, որ շունն առհասարակ շարժուն կենդանի է:

Տնօրենի տրամադրությունը չփչացնելու համար հարցրեցինք.

-Ե՞րբ կարող ենք ձեր որևէ աշխատակցի կամ աշխատակիցների տեսնել այգում, աշխատանքի մեջ` ցանցերով կամ առանց ցանցերի:

-Հենց գնան, ձեզ իմաց կտանք, հեռախոսի համար ասեք,- թեթևակի սպառնալիքով ասաց տնօրենը:

Սիրով փոխանցեցինք մեր հեռախոսահամարը: Հուսանք` առաջիկայում կզանգահարեն և մեզ կհաջողվի հասկանալ, թե, առհասարակ, ինչով է զբաղված մայրաքաղաքում թափառող շների պոպուլյացիան վերահսկող այս կազմակերպությունը, որի անվան մեջ թերևս ամենաբնութագրականը «X» տառն է:

Էդիկ Անդրեասյան