Վլադիմիր Գասպարյանին հարգում է, բայց նրա սանիկը չէ

ՊՎԾ պետի տեղակալ Արգիշտի Քյարամյանն այսօր լրագրողների հետ զրույցում անդրադարձավ մամուլի հրապարակումներին, թե ինքը նախկին ոստիկանապետ Վլադիմիր Գասպարյանի սանիկն է և որ Էդուարդ Աղաջանյանի ջանքերով հավակնում է նշանակվել ՊՎԾ ղեկավար Դավիթ Սանասարյանի փոխարեն։ Նա ասաց, որ ինքը որևէ մեկի հետ իր ազգակցական, արյունակցական, քավոր-սանիկական կապերից չի ամաչում և չի թաքցնում․ բարոյական էլ չի համարում նմանատիպ կապերը թաքցնել:

Իսկ ինչ վերաբերում է Վլադիմիր Գասպարյանի հետ իր հարաբերություններին, ասաց․ «Ես փոխադարձ հարգանքի հարաբերություններ ունեմ պարոն Գասպարյանի հետ, սակայն որևէ քավոր-սանիկական հարաբերություններ մենք չունենք, եթե ունենայի էդպիսի հարաբերություններ, մեծ սիրով կբարձրաձայնեի»:

Hraparak.am-ի հարցին, թե որտեղից են ձևավորվել այդ փոխադարձ հարգանքը, և ինչ շփում ունի Գասպարյանի հետ, Քյարամյանն ասաց․ «Ես աշխատել եմ ոստիկանությունում, աշխատել եմ Քննչական կոմիտեում, աշխատել եմ դատախազության տարբեր մարմիններում, և շփումը նաև այդ համատեքստում է տեղի ունեցել»։

Իսկ ինքը մտադի՞ր է զբաղեցնել ՊՎԾ ղեկավարի պաշտոնը, Քյարամյանն ասաց, որ ինքը շատ բարձր է գնահատում Դավիթ Սանասարյանի դերը մեր պետականաշինության գործում, շատ հարգում է նրան, և Սանասարյանն այս պահին դեռ շարունակում է մնալ ՊՎԾ ղեկավար։ «Եվ էս պահին, քանի որ նա այդ ծառայության ղեկավարն է, իսկ մենք՝ աշխատակիցներս, մեծ հույս ունենք, որ պարոն Սանասարյանը հետ կվերադառնա և կղեկավարի այս կառույցը, հետևաբար, ես այս համատեքստում որևիցե բան չեմ կարող ասել»,-ասաց նա։

Մանրամասն՝ տեսանյութում։