Ի՞նչ գործակալներ են փնտրում սորոսականները

Հայաստանում որոշ արեւմտամետ կուսակցություններ եւ հասարակական-քաղաքական գործիչներ հանդես են եկել համատեղ հայտարարություն-կոչով: Այդ հայտարարությունը նրանք անվանել են. «Հայաստանի ժողովրդավարական ուժերի հայտարարությունը երկրի ինքնիշխանության, քաղաքակրթական ընտրության եւ անվտանգային միջավայրի մասին»: Հայտարարության նախաձեռնողներն իրենց զորակցությունն են հայտնել Ուկրաինային եւ ՀՀ կառավարությանը ներկայացրել են չորս պահանջ, որոնք հեռու են ժողովրդավարական կոչվելուց.

1. Գործուն ջանքեր գործադրել Ռուսաստանի առաջնորդած անվտանգային կառույցից՝ ՀԱՊԿ-ից դուրս գալու եւ արեւմտյան մեր բարեկամ երկրների հետ դաշնակցային հարաբերությունների կայացման ուղղությամբ։

2. Հրավիրել եւ տեղակայել ՄԱԿ խաղաղարար ուժեր Հայաստան-Ադրբեջան սահմանին։

3. Մաքրել Հայաստանի պետական համակարգն օտար պետությունների հատուկ ծառայությունների գործակալներից։

4. Հայաստանի տարածքում արգելափակել պատերազմ եւ այլատյացություն քարոզող ռուսաստանյան լրատվամիջոցների հեռարձակումը:
Այս հայտարարություն-կոչը ստորագրել են Բեւեռը, Արման Բաբաջանյանի կուսակցությունը, ԱԻՄ-ը, Տիգրան Խզմալյանի Եվրոպական կուսակցությունը, հայտնի եւ անհայտ անհատ գործիչներ, արեւմտամետներ, սորոսականներ: Մենք զրուցել ենք ԱԻՄ նախագահ Պարույր Հայրիկյանի հետ:

- Դուք կառավարությունից պահանջում եք՝ Հայաստանի տարածքում արգելափակել պատերազմ եւ այլատյացություն քարոզող ռուսաստանյան լրատվամիջոցների հեռարձակումը: Լրատվամիջոց փակելու պահանջ ներկայացնելը ժողովրդավարական արժեքներին չի՞ հակասում: Ինչո՞ւ եք ցանկանում Հայաստանում արգելափակել ռուսական լրատվամիջոցները:

- Ժողովրդավարություն՝ նշանակում է ժողովրդավարություն: Այն ներառում է մարդու նկատմամբ խտրական վերաբերմունքի բացառում: Եթե որեւէ լրատվամիջոց իրեն թույլ է տալիս ատելություն ու խտրական վերաբերմունք քարոզել որեւէ մեկի նկատմամբ, ապա դա իրավամբ դեմ է ժողովրդավարական բոլոր արժեքներին: Ժողովրդավարությունն ինքն իրեն պետք է կարողանա պաշտպանել հակաժողովրդավարական դրսեւորումներից: Այդ հայտարարության իմաստը հենց սա է: Այդ կետի նախաձեռնողը ես չեմ, սակայն լիովին հասկանում եմ նախաձեռնողին եւ կիսում նրա մտահոգությունները: Ես ուրախությամբ ողջունել եմ նախաձեռնությունը:

- Եթե կիսում եք այդ մտահոգությունը, վստահ եմ, որ առանձնացրել եք կոնկրետ լրատվամիջոցներ, որոնք, Ձեր պնդմամբ, ժողովրդավարությանը դեմ են: Ո՞ր լրատվամիջոցներն են, ըստ Ձեզ, այդպիսին:

- Բոլոր նրանք, որոնք ասում են՝ ուկրաինացիներն էս են, էն են, վայրենի են ու չգիտես ինչ են…. եւ արդարացնում են ռուսական զորքերի արարքը:

- Հայաստանում բավականին ծանր իրավիճակ է: Մի՞թե մեր խնդիրը հիմա Ուկրաինան պետք է լիներ:

- Եթե Ձեր մտահոգությունն առողջ է, ապա Դուք հասկանում եք, որ աշխարհի մաս եք կազմում: Եթե ուկրաինացիներն անհանգստանային Արցախի համար եւ ասեին, որ ուժի միջոցով հարցեր լուծել չի կարելի, ի՞նչ կլիներ, եթե շատերն էլ Ուկրաինայում կարծեին, որ Արցախը կարեւոր չէ…. պետք է հասկանանք, որ եթե մի տեղ ուժի միջոցով հարցեր լուծելն ընդունելի է դառնում, վաղն էլ նույն խնդիրը կարող է մեր առաջ կանգնել:

- Դուք նաեւ նշել եք, որ պետք է մաքրել Հայաստանի պետական համակարգը օտար պետությունների հատուկ ծառայությունների գործակալներից: Ուշագրավ է, որ այս պահանջը ներկայացնում են այնպիսի գործիչներ, ինչպիսիք են` Արա Պապյանը, Տիգրան Խզմալյանը, Լեւոն Բարսեղյանը, որոնց որոշ շրջանակներ մեղադրում են սորոսական, այլ երկրների գործակալ եւ այլն լինելու մեջ:

- Եկեք վերացական բաները բաց թողնենք: Խոսքն ուղղված է պետությանը: Ես առհասարակ վերջին 30 տարվա ընթացքում այն բոլոր կոչերին, թե պետք է գործակալների ձերբակալեն, հումորով եմ վերաբերվում: 30 տարի շարունակ որոշները ճիգեր են գործադրում գործակալներին բացահայտել, եւ դա շատ ծիծաղելի է: Մաֆիա խաղալն եմ այս մասին խոսելիս վկայակոչում: Նման պահանջ ներկայացնելը Քրեական օրենսգրքի պահանջ է, արտառոց ոչինչ չկա: Հայաստանի Հանրապետության Քրեական օրենսգրքով՝ լրտեսությունը ծանր հանցագործություն է:

- Ամեն դեպքում, եթե ստորագրում եք նման պահանջի տակ, ուրեմն Դուք եւս որոշներին գործակալ լինելու մեջ եք կասկածում: Կասե՞ք մի քանի ենթադրյալ գործակալի անուն:

- Ես անգամ որոշ դեպքերում համոզված եմ, որ ոմանք գործակալ են, սակայն դա կլինի քաղաքական հայտարարություն, իսկ լուծումը ես տեսնում եմ իրավական տիրույթում: Իրավական փորձը ցույց է տալիս, որ անհատի կանխազգացումով արված հայտարարությունները հիմք չեն:

- Լեւոն Բարսեղյանին, Արա Պապյանին ուրիշ մի խավ գործակալ է համարում: Կիսո՞ւմ եք այդ տեսակետը:

- Ովքեր նման հայտարարություններ անելու իրավունք են իրենց վերապահում, պետք է նաեւ կարողանան հիմնավորել իրենց ասածները:

- Օրինակ, Արա Պապյանը երբեմն-երբեմն պրոթուրքական հայտարարություններով է հանդես գալիս, սա հանրության շրջանում կարող է կասկածի տեղիք տալ:

- Եկեք հասարակության անունից չխոսենք, դա շատ բարդ բան է: Դրա համար հատուկ գիտական ուսումնասիրություններ պետք է կատարվեն: Ինչ-որ խմբերի գնահատականներ չի կարելի դիտարկել որպես հանրային կարծիք: Ամբողջ խնդիրն այն է, որ եթե կան լրտեսներ, այս կոչն ուղղված է բոլոր տեսակ լրտեսներին, անկախ նրանից, թե դրանք ովքեր են: Այնպես որ, ձյան մեջ մազ փնտրել պետք չէ: Պետք է փաստերով ապացուցել, որ ոմանք ոչ թե կոնկրետ գաղափարների են ծառայում, այլ` հանձնարարականների: Օրինակ, երբ որեւէ պետական պաշտոնյա հայտարարում է, որ չունի ծրագիր, ապա նշանակում է, որ նա գործակալ է եւ ծրագրեր հետո պետք է ստանա:

- Դուք հանդիպում եք խորհրդարանական ընդդիմության հետ, մասնակցում տարբեր հակաիշխանական քննարկումների, սակայն այժմ համագործակցում եք այնպիսի ուժերի հետ, որոնք համակրում են օրվա իշխանություններին: Օրինակ` նույն Պահպանողական կուսակցության նախկին նախագահ Միքայել Հայրապետյանը, Լեւոն Բարսեղյանը եւ այլք: Ինչպե՞ս ստացվեց Ձեր եւ ծպտյալ իշխանականների համագործակցությունը: Հայտնի է, որ նրանք առանձնակի ատելություն են տածում խորհրդարանական ընդդիմության նկատմամբ:

- Ատելություն ասվածն ինձ համար չէ: Տվյալ հարցում ես եւ նրանք համակարծիք ենք: Մարդն ամբողջ կյանքի ընթացքում համախոհների է փնտրում: