Իր արտաքինի խնդիրը չի, այլ պարզապես ուրիշ խնդիրներ կան երկրի հետ կապված․ Գոհար Հարությունյան

,Աղմկահարույց «Միսս Արմենիա 2017» գեղեցկության մրցույթին հաղթող ճանաչված Լիլի Սարգսյանը, նոյեմբերի 18-ին Չինաստանի Սանյա քաղաքում «Միսս աշխարհ 2017» գեղեցկության միջազգային մրցույթում չանցավ եզրափակիչ փուլ։



**Չեն ցանկանում խոսել**



«Միսս Արմենիա 2017» մրցույթի կազմակերպիչ Գոհար Հարությունյանը նշում է, որ Լիլին Հայաստանում է, սակայն իրենք դեռ չեն հանդիպել․ «Նա նոր է վերադարձել, ես էլ չեմ խոսել իր հետ։ Մենք հիմա հարցերի չենք պատասխանում մինչեւ ես կզրուցեմ իր հետ, կհասկանամ՝ ոնց ա, ինչ ա եղել նոր»։



Այն հանգամանքը, որ Լիլի Սարգսյանը եզրափակիչ փուլ չի անցել, շա՞տ է տխրեցրել իրեն, Գոհար Հարությունյանը տվեց բացասական պատասխան․ «Բացարձակ ոչ, ես նման սպասումներ չունեի, պետք է ռեալ գնահատել երկրի մասնակցություն։ Այստեղ իր արտաքինի խնդիրը չի, այլ պարզապես ուրիշ խնդիրներ կան երկրի հետ կապված, մասնակցության առաջին անգամ»։



**-Ի՞նչ խնդիրներ։**



-Ես հետո կպատասխանեմ Ձեր հարցերին։



**-Մեր մասնակիցը ինչո՞վ էր զիջում մյուս գեղեցկուհիներին։**



-Ես այս պահին չեմ կարող հարցերին պատասխանել։



**Ընդդեմ «Միսս Արմենիայի»**



Ինչպես արդեն հայտնի է, «Միսս Արմենիա» հիմնադրամի դեմ քրեական գործ է հարուցվել՝ ապրանքային նշանն ապօրինի օգտագործելու համար։ Հանցագործության մասին հաղորդումն իրավապահ մարմիններին տվել է «Միսս Հայաստան-Ազգային գործակալություն» հիմնադրամը` Կարեն Արիստակեսյանի ղեկավարությամբ, այս մասով նախաքննությունը դեռ շարունակվում է։



Մրցույթի հետ կապված եւս երկու հայց էլ քննվում է դատարանում։ Հայցվոր կողմի փաստաբան Հարություն Հարությունյանը մեզ հետ զրույցում ասաց․ «Առաջինի դեպքում քաղաքացիական գործ է, որով խնդրում ենք պարտավորեցնել հրապարակայնորեն հայտարարել, որ ապրանքային նշանը պատկանում է «Միսս Հայաստան-Ազգային գործակալություն»-ը, երկրորդ պահանջը՝ մամուլի միջոցներով հրապարակվի դատական ակտը ամբողջությամբ։ Վարչական դատարանից պահանջում ենք «Միսս Արմենիա» մշակութային հիմնադրամի գրանցումն անվավեր ճանաչել։ Փաստաբանը նաեւ նշեց, որ գործերով նախնական դատական նիստ է նշանակված։



**Աննա Պապիկյան**