Կան 6 տարին լրացած երեխաներ, որոնք չեն հաճախում դպրոց․ Աշոտ Արշակյան
ԿԳՆ հանրակրթության վարչության պետ Աշոտ Արշակյանն այսօր հրավիրած մամուլի ասուլիսում անդրադարձավ 12-ամյա պարտադիր կրթությանը։ Նա նշեց, որ սեպտեմբերի 1-ից ուժի մեջ է մտնում օրենսդրական պահանջը՝ 12-ամյա կրթության պարտադիր լինելու մասին։
«Սա նշանակում է, որ արդեն 9-րդ դասարանն ավարտելուց հետո մեր աշակերտները շարունակելու են կրթությունը պարտադիր՝ դա կլինի ավագ դպրոցներում, արհեստագործական ուսումնարաններում, ինչպես նաեւ միջին-մասնագիտական ուսումնական հաստատություններում»,- ասաց նա։
Աշոտ Արշակյանը հիշեց նաեւ վեց տարին լրացած, սակայն դպրոց չհաճախած երեխաներին։ Լոռու մարզում նախարարությունն իրականացրել է փորձնական ծրագիր եւ հայտնաբերել 200 երեխաների, որոնք տարբեր պատճառներով չեն հաճախել դպրոց։
Ինչ վերաբերում է 12-ամյա պարտադիր կրթությանը, ապա ԿԳՆ պաշտոնյան նշեց, որ մինչեւ 2025թ․ անցում է լինելու ներառական կրթության։
«Հատուկ դպրոցները, որոնք հիմա Հայաստանում 21-ն են, վերակազմակերպվելու են եւ դառնալու են բժշկամանկավարժական աջակցություն ցուցաբերող կենտրոններ»,- ասաց նա։
Ծրագրային փոփոխություններ ավագ դպրոցում դեռ չկան, բայց նախատեսված են՝ իրազեկեց ԿԳՆ պաշտոնյան։ Փոփոխվում է դպրոցների ֆինանսավորման ձեւը։
Ըստ Աշոտ Արշակյանի՝ կլինեն դպրոցներ, որոնք կֆինանսավորվեն նոր բանաձեւով, որպեսզի ֆինանսավորումը կախված չլինի միայն աշակերտների թվից։ Նա հիշեցրեց, որ գյուղական դպրոցները, կախված աշակերտների թվաքանակից, ունենում են խնդիրներ։
Կարծիքներ