Գյումրեցի կինը խնդրում է՝ իրեն եւ իր փոքրիկներին դուրս բերել անմարդկային պայմաններից

Գյումրու Երևանյան խճուղու՝ առավել հայտնի Ստրոյմաշ կոչվող տարածքում տեղակայված 147/134 խղճուկ տնակում են բնակվում 25- ամյա Գոհար Ավոյանն իր երկու անչափահաս փոքրիկների եւ ամուսնու հետ: Հույս ունեին, որ մի օր ամեն ինչ փոխվելու է՝ դեպի լավը, բայց երկրի վիճակի վատանալուն զուգահեռ իրենց վիճակն էլ ավելի վատթարացավ: «Տղաս՝ Վահանը, 1.6 ամսական է, աղջիկս՝ Մարիամը 5 ամսական: Շատ փոքր են, իմ խնամքին, թե չէ մի աշխատանք կփնտրեի: Ամուսինս ձեռքով տղա է, բայց հիմնական գործ չունի, օրավուր հացն հազիվ է վաստակում»,-պատմում է երիտասարդ կինը՝ մատնացույց անելով տնակի տանիքը, որն արդեն փտել է:

Գոհարն հենց այս տնակ էլ հարս է եկել: 5 տարի է՝ ամուսնացած է, անօթևանի կարգավիճակ չունեն. պատմությունը փոքր-ինչ խճճված է: Երկրաշարժից հետո ամուսնու ծնողներն հաստատվել են այդ տնակում: Մեծացրել են երեք որդիներին, քանի որ բազմանդամ էին, երկրաշարժին կորցրած հայրական տան դիմաց պետությունը հատկացրել է միայն մեկ բնակարան, որն էլ բաժին է հասել միջնեկ տղային: «Ցուրտը մի կերպ հաղթահարում ենք, բայց սարսափելին առնետներն են, հիմա երեխաների համար եմ անհանգստանում, փոքրիկ են, հնարավոր է վնասեն»,-ասում է Գոհարը՝ օրհնելով վերջերս Ռուսաստան մեկնած հարևանին, որ տան իրերը վաճառելու փոխարեն իրեն է տվել: «Նույնիսկ տան փալասն ինձ տվեց, երեխաներիս հագուստ, բավական գույք տվեց , շնորհակալ եմ, որ դեռ նման մարդիկ կան, ինչ ասեմ: Բայց դե տեսնում եք, պայմաններս անմարդկային են, խնդրում եմ՝ գոնե ժամանակավորապես օգնեք, դուրս գանք այս վիճակից»,-խնդրանքով մեզ է դիմում երիտասարդ կինը:

Հ. Գ. Գոհար Ավոյանին եւ նրա ընտանիքին օգնել ցանկացողները կարող են զանգահարել նրա հեռախոսահամարին ՝ 094505793։ 

Արևիկ Հակոբյան