Աստվածածին եկեղեցին դարձել է Կյանքի Խոսքի հավաքատեղի՞

«Պահանջում ենք կաթողիկոսի հրաժարականը» քաղաքացիական նախաձեռնության անդամները Քանաքեռում, Խաչատուր Աբովյանի տուն թանգարանից  ոչ հեռու գտնվող Սուրբ Աստվածածին եկեղեցու տարածքում, բացահայտել են մի անհավատալի տեսարան:



Սուրբ Աստվածածին եկեղեցին, որը միջնադարյան մի քանի պահպանված եկեղեցիներից մեկն է Երևանում, Հայ Առաքելական Եկեղեցու անգործության արդյունքում երբեմնի հայկական սրբավայրից դարձել է Կյանքի Խոսքի հավաքատեղի:



Ըստ բնակիչների՝ նրանք վաղ առավոտյան և ուշ երեկոյան ժամերին հայ առաքելական եկեղեցու բակում իրենց բարձրաձայն աղոթքն են հնչեցնում՝ խանգարելով բնակիչների հանգիստը:  Եկեղեցու շրջակայքի բնակիչները բազմիցս դիմել են տարբեր պետական մարմիններին՝ նկարագրելով եկեղեցու լքված վիճակը և դրա անհավատալի հետևանքները:



Ի հավելումն, լքված և անտարբերության մատնված եկեղեցու շրջակայքը, բնակիչների պնդմամբ, դարձել է սիրային հանդիպումների ու  գործողությունների  վայր, ինչպես նաև կռվատեղի  թաղի երիտասարդների համար: Եկեղեցին շրջապատող միջնադարյան տապանաքարերի տարածքը վեր է ածվել աղբանոցի: Շնորհիվ տեղացի մի բնակչուհու եկեղեցին ունի դուռ (թեև անարվեստ) և կողպեք. իսկ լքված եկեղեցու ներսում տեղացիները իրենց տներից բերել են սրբապատկերներ, ի դեպ մեծ թիվ են կազմում ռուսական սրբապատկերները:



Այս  իրավիճակի պատասխանատուն ամենայն հայոց կաթողիկոս Գարեգին Բ-ն և Հայ Առաքելական Եկեղեցու Արարատյան թեմն են: Այս իրավիճակը ընդամենը  մեկն է հարյուրավոր դեպքերից և կարծումենք կաթողիկոսի հրաժարականը պահանջող մարդկանց համար չի կարելի ի ցույց դնել ավելի խոսուն պատճառներ:



Նախաձեռնող խումբը կոչ է անում լրատվամիջոցներին և շահագրգիռ անձանց հետևողական լինել և հասնել հարցի արդարացի լուծմանը: