Տիգրանակերտի տարածքում սարկոֆագ է հայտնաբերվել

Տիգրանակերտի այս տարվա պեղումների ամենահետաքրքիր արդյունքն է հավանաբար երկրորդ, իսկ ժամանակագրական առումով առաջին եկեղեցին: karabakh-open.info-ի փոխանցմամբ, այն հայտնաբերվել է միջնադարյան բազիլիկայից ոչ հեռու` կազմելով սալահատակված բակի շարունակությունը: Նորահայտ եկեղեցին չափերով զիջում է ավելի վաղ հայտնաբերվածին` 8.5 մ լայնություն եւ մոտ 17 մ երկարություն ունի: Առաջին եկեղեցին, որ Կովկասի ժամանակի ամենամեծ բազիլիկան է համարվում, ունի 11.5 մ լայնություն, մոտ 29 մ երկարություն:

Արցախի հնագիտական արշավախմբի ղեկավար Համլետ Պետրոսյանի խոսքով՝ նոր եկեղեցին, հավանաբար, ավելի վաղ շրջանի կառույց է: Զույգ եկեղեցիների բակում խարիսխի հիմք է հայտնաբերվել, նաեւ խաչակիր սյան մնացորդներ: Ըստ հետազոտողների՝ այդ ամենը հուշում է, որ վաղ միջնադարյան Տիգրանակերտի քաղաքային հրապարակն է հայտնաբերվել, որը պաշտանմունքային նշանակություն ուներ:

Նորահայտ եկեղեցուն կից տապանաբակ կա, որտեղ սարկոֆագ է հայտնաբերվել: Տիգրանակերտի սարկոֆագն առաջինն է, որ Արցախում բացվում է հնագետների կողմից, ու թեեւ քրիստոնեական թաղումները հնագիտական հարուստ նյութով չեն առանձնանում, այս դեպքում սարկոֆագը յուրահատուկ նշանակություն է ստանում՝ կազմելով մեկ ընդհանուր հուշարձանի մի մասնիկը:

Հաշվի առնելով, որ հանգուցյալը թաղվել է եկեղեցու պատին կից, մասնագետները կարծում են, որ նա հասարակ քաղաքացի չի եղել: