Մաքսային Միությունն ընտրելը ոչ միայն ստորաքարշություն է, այլև՝ խելագարություն

Ազատության հրապարակում ԱԻՄ առաջնորդ Պարույր Հայրիկյանը «ՈՉ Մաքասային միությանը» կարգախոսով հանրահավաք էր անցկացնում։ Չնայած ծագած խնդիրներին և եղանակային վատ պայմաններին հանրահավաքին 50-ից ավելի մարդիկ էին  մասնակցում, ովքեր վեր էին պարզել «Վիլնյուս կամ հրաժարական», «Ոչ, պարտադրող ՄՄ-ին» գրությամբ պաստառներ:

ԱԻՄ առաջնորդը իր ելույթում նշեց, որ ոչ մի երկիր ինքնուրույն չի ապրում, իշխանությունը պետք է խելացի քայլ կատարեր և ընտրեր Եվրամիությունը։ «Դեռ չձևավորված Մաքսային միությունը խոսում է արդեն հայերին ռուսականացնելու մասին, իսկ Եվրամիությունը հնարավորթյուն էր տալու լինել իրենց հովանու ներքո, բայց անկախ»։ Նրա կարծիքով՝ Եվրամիությունից հրաժարվելը և Մաքսային Միությունն ընտրելը ոչ միայն ստորաքարշություն է, այլև՝ խելագարություն։

Քաղաքական գործիչ Դավիթ Շահնազարյանի պնդմամբ էլ՝ չպետք է թույլ տալ, որ Հայաստանը բռնակցվի Ռուսաստանին` դառնալով ռուսական կայսրության մաս։

Հանրահավաքին ներկա էր նաև «Ժառանգություն» կուսակցության անդամ Դավիթ Սանասարյանը։ «1920 թ․-ի դեկտեմբերի 2-ին Ռուսաստանը Հայաստանին զրկեց անկախությունից, Պուտինը հատուկ այդ օրն է ընտրել, քանի որ մեկ անգամ ևս ուզում է զրկել մեզ անկախությունից»,- ասաց Սանասարյանը՝ մեջբերելով հայտնի ռուսական արտահայտությունը՝ мечтать не вредно։