Իմ ութը տարվա փորձն ուզեցի թղթին հանձնեմ
Մայրաքաղաքային իշխանությունը մայիսին ձեւավորվեց կեղծված ընտրությունների հետեւանքով, իսկ ընտրություններից 2 ամիս անց «նորընտիրը» հայտարարեց ներքաղաքային ուղեվարձի սակագնի թանկացման մասին, որը հասարակությունը չհանդուրժեց: Ընդդիմացավ մեկ մարդու նման, տապալեց ծրագիրը: Քաղաքային իշխանության ոլորտում մյուս ձեռքբերումն ընդդիմության ներկայությունն էր ավագանիում, որն իսկական փորձություն էր Տարոն Մարգարյանի եւ մյուս ՀՀԿ-ականների համար, ովքեր ստիպված եղան աշխատել ու մանրազնին ուսումնասիրել տարբեր փաստաթղթեր, ծրագրեր, վերանայել իրենց վարքն ու բառապաշարը, որը տարեվերջյան նիստին արդեն նկատելիորեն բարելավվել էր: Բայց տարվա գլուխգործոցը Տարոն Մարգարյանի գիտական աշխատանքն էր՝ դիսերտացիան, որի պաշտպանությունն ուղեկցվեց սկանդալով (էջ 3): Հենց դրանից էլ սկսեցինք տարեվերջյան մեր զրույցը քաղաքապետի հետ:
- Տարին ինչպիսի՞ն էր Ձեզ համար, ի՞նչ ձեռքբերումներ, կորուստներ ունեցաք:
- Կորուստների մասին եկեք չխոսենք, ձեռքբերումներ կան, բայց դրանով չպետք է բավարարվենք եւ պետք է ամեն օր աշխատենք, դրանով չբավարարվենք:
- Այս տարվա ձեռքբերումներից մեկն էլ կարծես Ձեր գիտական գործունեությունն է: Ձեր ինչի՞ն էր պետք գիտությունների թեկնածուի գիտական աստիճանը: Մի՞թե մայրաքաղաքի ղեկավարն այդքան ազատ ժամանակ ունի, որ հասցնում է գիտական աշխատանք կատարել:
- Ճիշտ եք ասում` ես շատ ծանրաբեռնված եմ, բայց եկեք չմոռանանք` 8 տարի շարունակ ես եղել եմ տեղական ինքնակառավարման համակարգում եւ 8 տարվա իմ փորձն ուզեցել եմ թղթին հանձնեմ ու ես չէի կարծի, որ ես մտել եմ ուրիշ դաշտ, դա իմ դաշտում ա` Երեւանի սոցիալ-տնտեսական զարգացման մասով ա, այդ մասով եմ փորձում պաշտպանեմ ու իմ փորձը` 8 տարվա, հանձնեմ թղթին: Երբ որ 17 տարի տեղական ինքնակառավարման մարմինների հիմքը դրվել է, 17 տարուց ես իմ 8 տարին այդ ճանապարհին եմ անցել, ունեմ զգալի փորձ եւ ուզեցի դրա մասին գրեմ:
- Դո՞ւք եք գրել թեկնածուական թեզը:
- Այո:
- Դուք Ձեր փորձը գործնականում դրսեւորելու, կիրառելու շատ լավ հնարավորություն ունեք՝ քաղաքապետ եք, ի՞նչ կարիք կար գիտական կենսագրություն կերտել այդ փորձով:
- Ես համաձայն չեմ դրան, ես չեմ տառապում նման մոլուցքով, ես էլի եմ կրկնում. ես իմ փորձն ունենալով` ուզեցի թղթին հանձնեմ:
- Իսկ անգլերեն կամ այլ օտար լեզու սովորե՞լ եք, «Թոյֆլ» հանձնե՞լ եք եւ որտե՞ղ:
Քահ-քահ ծիծաղում է։
- … Իսկ Դո՞ւք:
- Եթե քաղաքապետ չլինեիք, եւ տնտեսագիտականի ռեկտոր Կորյուն Աթոյանն էլ Ձեզ չաջակցեր, կկարողանայի՞ք պաշտպանել կամ, ընդհանրապես, թեզ գրել:
- Եթե 8 տարի տեղական ինքնակառավարման մարմիններում չաշխատեի` պատասխանատու պաշտոններում, համոզված եղեք, ես չէի առաջադրի:
- Այս տարվա ձեռքբերումներից էր ավագանու կազմում ընդդիմության` «Բարեւ, Երեւանի» ներկայությունը, իսկ Ձեզ համար ինչպիսի՞ն էր այդ փոփոխությունը:
- Շատ լավ, աշխույժ ա անցնում, հետաքրքիր ա անցնում… (ծիծաղում է):
- Այդ դեպքում ինչո՞ւ եք լարված, թշնամաբար տրամադրված, երբեմն վիրավորում եք ընդդիմադիրներին:
- Ոչ, նման կարծիք թող չձեւավորվի, ես ոչ մեկի նկատմամբ էլ թշնամանքով չեմ, իմ գործընկերներն են, առողջ մթնոլորտում առողջ քննարկումներ են լինում: Նորմալ է:
- Նախորդ ավագանու հետ համեմատած, որտեղ չկար ընդդիմություն, ի՞նչ տարբերություններ կարող եք նշել այս ավագանիում:
- Ոչ մի տարբերություն չեմ տեսնում, բոլոր ավագանիների հետ համերաշխ համագործակցել ենք, աշխատել ենք, քննարկել ենք հանուն Երեւանի եւ երեւանցիների համար: Այսօր էլ մենք պատրաստ ենք քննարկել թե «Բարգավաճ» խմբակցության, թե «Բարեւ, Երեւանի» հետ: Հանուն մեր Երեւանի համար պատրաստ ենք:
- Տարին Ձեր ծանր էր: Ուղեվարձի սակագնի անօրինական որոշման հայտարարությունից հետո, հաջորդ օրվանից, կարելի է ասել, հեղինակազրկվեցիք: Չե՞ք փոշմանել այդ որոշման համար:
- Ես իմ վերջին ելույթի ժամանակ հայտարարել եմ` ես ինչ դժվարությամբ կայացրեցի այդ որոշումը, որն անօրինական չի, օրինական ա, ընդամենը կասեցված է, ես էլի եմ կրկնում` ես նշեցի, թե ինչ դժվարությամբ կայացրեցի էդ որոշումը:
- Եթե այդքան դժվարացել էիք, հետո ուրախացա՞ք, որ քաղաքացիական հասարակության ջանքերով այն ձախողվեց:
- Եթե մի բանը վերաբերում է մեր բնակիչների սոցիալական խնդրին, բնականաբար, այդ որոշում կայացնելն ինձ համար շատ-շատ դժվար էր, երեւի առաջին որոշումն էր, որ այդքան դժվարությամբ կայացրել եմ: Բայց քննարկումները շարունակվում են, հանձնաժողովը որոշումը կկայացնի: Իսկ ինչ մնում է հեղինակության հետ կապված, ես էդ կարծիքին չեմ, ընդամենը քաղաքացիներին հարցրեք: Ես համաձայն չեմ ձախողման հետ կապված, ես դա չեմ համարում ձախողում, քանի որ կար սոցիալական մեծ զանգված, ովքեր խնդիրներ ունեն, իրականում պետք է նրանց հարցն ուսումնասիրել ու հնարավորություն տալ այդ ընտանիքներին, քաղաքացիներին, որ կարողանան գոնե մատչելի ձեւով օգտվել տրանսպորտից, բայց չմոռանան, որ դա շատ վատ վիճակում է գտնվում, եւ ինձ համար առաջնայինն այդ անվտանգության խնդիրն է, նոր հետո` սպասարկման որակը:
- Ինչո՞ւ այդ առաջնահերթությամբ չառաջնորդվեցիք: Նախ անվտանգությունն ապահովեիք, ապա մտածեիք ուղեվարձի գնի մասին:
- Ես այն ժամանակ էլ, հիմա էլ եմ հաշվի առել, էլի եմ կրկնում` անվտանգության խնդիր կա: Աստված չանի` մի միկրոավտոբուսի հետ մի բան պատահի, ո՞վ ա պատասխան տալիս, դո՞ւք:
- Քաղաքապետարանը:
- Դրա համար քաղաքապետարանը, գիտակցելով, որ պատասխանատվություն է կրում, քայլեր է ձեռնարկում այդ անվտանգությունն ապահովվի, մեզ համար կարեւորը քաղաքացու անվտանգությունն է:
- Քաղաքացու գրպանը մտնելո՞վ պետք է խնդիրը լուծեք:
- Ոչ մեկ չի մտել քաղաքացու գրպանը, բայց անվճար տրանսպորտ չկա:
- 100 դրամն անվճա՞ր եք համարում:
- Բոլորը նաեւ կոչ էին անում, որ դառնա անվճար: Մարդիկ եղան՝ մամուլում առաջարկեցին. երթուղի տվեք` սպասարկենք, մեկ երթուղու տեղն ամբողջը տրամադրեցինք, էլի հրաժարվեցին, բա ինչի՞ չեկան սպասարկեին:
- Հուլիսից մինչեւ հիմա շարունակում եք քննարկումները, ի՞նչ հաջողվեց որոշել անվտանգության ապահովման առումով:
- Հիմա մենք արտասահմանյան փորձագետների հետ ենք աշխատում, մոնիտորինգ ենք պատվիրել՝ ուղեւորահոսքի վերլուծություն, մոտակա ժամանակները կտան արդյունքները, նոր կքննարկենք: Ես համաձայն չեմ նաեւ այն տարբերակին, որ ապահովեինք՝ նոր թանկացնեինք, իսկ ո՞վ է ապահովելու, քաղաքապետարանն այդ հնարավորությունը չունի:
- Եթե Երեւանի միջոցառումներին է խոսքը վերաբերում, միլիոններ եք ծախսում` շքեղ ու ճոխ միջոցառումներ կազմակերպում, ինչո՞ւ այս դեպքում նույնը չարեցիք:
- Երեւանի միջոցառումները, այո, շքեղ են, երեւանցիների համար պատրաստ եմ խնդիրները լուծել, բայց անհամեմատելի են, եթե «Էրեբունի-Երեւանին» 200 միլիոն դրամ է ծախսվում, ապա տրանսպորտի համար տասնյակ միլիարդներ են հարկավոր: Եթե իմանանք, որ 200-ով կլուծենք, համեստ կանենք միջոցառումները:
- Աշխարհի զարգացած քաղաքներում ավտոկայանատեղերը մասնավորի կառավարման են, մենք էլ, զարգացած քաղաքների նման, հանձնեցինք մասնավորին, քանի որ մեծ ներդրումներ էին հարկավոր, որի հնարավորությունը քաղաքապետարանը չուներ:
- Մեր զրույցի ողջ ընթացքում թվարկում եք Ձեր աշխատանքների, հաջողությունների մասին, եթե հաջորդ ընտրություններին այս աշխատանքներով ներկայանաք ընտրողին, ի՞նչ եք կարծում՝ կընտրվե՞ք: Եթե, իհարկե, կեղծիքներ չարվեն:
- Ձեր կարծիքով, հիմա կեղծիքո՞վ ենք անցել:
- Բազմաթիվ փաստեր արձանագրվեցին, դատարաններում հայցեր ներկայացվեցին:
- Ընդհանրապես փաստեր չեղան, Դուք սխալվում եք, որ էդ կարծիքին եք:
Գայանե ՍԱՐԻԲԵԿՅԱՆ
Կարծիքներ