Ֆելիքս Ցոլակյանի հեռանալու դեպքում համայնքապետերը սպառնում են պաշտոնաթող լինել
Երեկ Գյումրու Մ. Նալբանդյանի անվան պետական մանկավարժական ինստիտուտը խորհրդի նիստում միաձայն խորհրդի նախագահ ընտրեցին Շիրակի մարզպետ Ֆելիքս Ցոլակյանին: Ինստիտուտի ռեկտոր Վարդևան Գրիգորյանն ու խորհրդի անդամներն իրենց այս քայլով թերևս փորձում են համոզել, որ Ֆելիքս Ցոլակյանը ամենապատասխանատուն է պաշտոնի հարցում: Ֆելիքս Ցոլակյանի վերընտրվելը հետաքրքիր է հատկապես նրա մոտալուտ հեռանալու լուրերի ֆոնին:
Որքան էլ տարօրինակ է, մոտ ապագայում Ֆելիքս Ցոլակյանի՝ մարզպետի պաշտոնին հրաժեշտ տալու լուրերը ծանր են տանում հատկապես համայնքապետերը: Մարզի գրեթե բոլոր համայնքների ղեկավարները կամ անկուսակցական են, կամ ՀՀԿ-ական: Նոր՝ ՀՅԴ-ական մարզպետ ունենալու հավանական վարկածը խուճապ է առաջացրել նրանց մոտ:Շիրակցիների խոսքերով, իրենց հիշողություններում դեռ վառ է պահվել նախկին ՀՅԴ-ական մարզպետ Ռոմիկ Մանուկյանի կառավարման տարիները, երբ ամենուր գործում էին դաշնակների օրենքները: Շրջանառվող լուրերի համաձայն՝ նախկին մարզպետը չի վերադառնա, փոխարենը մեկ ուրիշ թեկնածուի անուն է շրջանառվում:
Խոսքը ԱԺ ՀՅԴ-ական նախկին պատգամավոր, ՀՀ գյուղատնտեսության նախարարության ջրային տնտեսության պետական կոմիտեի նախագահի տեղակալ Հակոբ Մաթիլյանի մասին է: Սակայն համայնքապետերին այս տարբերակն էլ չի գոհացնում: «Մեր Ցոլակյանը լավն է, հետը խոսել, համաձայնության գալ է լինում...»,-ասաց համայնքապետերից մեկը: Ի դեպ, Ֆելիքս Ցոլակյանի հեռանալու դեպքում համայնքապետերից շատերը սպառնում են պաշտոնաթող լինել ՝ սեփական դիմումների համաձայն:
Հիշեցնենք, որ Շիրակի մարզպետի պաշտոնը լքելու մասին խոսակցությունները նոր թափ առան, երբ ՀՀԿ-ն եւ ՀՅԴ-ն որոշեցին կոալիցիա կազմել: Ֆելիքս Ցոլակյանը 2013թ մարտին հրաժեշտ տվեց ԱԱԾ տնօրենի տեղակալի պաշտոնից եւ նշանակվեց Շիրակի մարզպետ:
Արևիկ Հակոբյան, Գյումրի
Կարծիքներ