Ռեստորանները մեկ օրով կփակվեն՝ ի նշան բողոքի

Հայաստանի ռեստորանների միությունը հայտարարություն է տարածել, որով տեղեկացնում է, որ իրենք պատրաստ են մեկ օրով փակել իրենց դռները՝ ի նշան բողոքի։ Նշենք, որ նրանք տևական ժամանակ է, ինչ նամակներ են գրում վարչապետին, ՊԵԿ-ին, հայտարարություններ տարածում՝ դժգոհելով նոր հարկատեսակներից, որոնք դժվարությունների առաջ են կանգնեցրել նրանց՝ ազդելով գների բարձրացման վրա։

Բայց պատկան մարմինների հետ որևէ կոմպրոմիսի չեն կարողանում հանգել, քանի որ ՊԵԿ-ը մնում է անդրդվելի։ Նոյեմբերի 24-ին տեղի է ունեցել ռեստորանների միության նախաձեռնող խմբի հերթական հանդիպումը։ «Խումբը հերթական նամակը հղեց ՀՀ Վարչապետ պ-ն Նիկոլ Փաշինյանին, Ռեստորանների ներկայացուցիչները կայացրեցին ևս մեկ կարևոր որոշում` բոլոր ռեստորանները, նախնական զգուշացումով, մեկ օրով կփակեն իրենց դռները` ի նշան անհամաձայնության նոր հարկային համակարգի հետ»,-հայտարարել էին նրանք։

Վերջում նաև ավելացրել, որ իրենց այս որոշումը բացարձակ զերծ է քաղաքական երանգներից և արտահայտում է միայն բիզնես շահեր եվ տնտեսության բնականոն զարգաման վտանգի ահազանգ։ Միության խոսքով՝ այս որոշումը դրդված է հետևյալ պետական մարմինների անգործությունից` ՀՀ պետական եկամուտների կոմիտե, ՀՀ ֆինանսների նախարարություն։ Նրանք նաև առաջարկներ են ներկայացրել ՀՀ տնտեսական զարգացման և ներդրումների նախարարություն։