«Չեմ կարում նստեմ, որովհետեւ զառացանք ա, ձեռ են առնո՞ւմ». Բաբայանի գործով իրավիճակը լարվեց․ տեսանյութ

Երեւանի ընդհանուր իրավասության դատարանի Շենգավիթի նստավայրրում շարունակվում է ԼՂՀ ՊԲ նախկին հրամանատար Սամվել Բաբայանի եւ մյուսների գործով դատական նիստը:

Հիշեցնենք՝ թավշյա հեղափոխությունից հետո Վճռաբեկ դատարանը գործն ուղարկել էր առաջին ատյանի դատարան՝ վերաքննության: 

Այսօրվա նիստում ուսումնասիրվում է գործում առկա գրավոր ապացույցները: Նիստին ամբաստանյալներից Սանասար Գաբրիելյանը բարկացավ, քանի որ համաձայն չէ մեղադրողի ներկայացրածի հետ: 

«Չեմ կարում նստեմ, որովհետեւ զառացանք ա, ես էլ նստեմ, լսե՞մ, ձեռ են առնո՞ւմ: Իյա չեմ նստում, սիրտս վատ ա»,-նշեց նա:

Դատավորը անընդհատ փորձում էր հանգստացնել Գաբրիելյանին, վերջինս էլ ասում էր, որ իրեն վատ է զգում: Դատավորը ասաց, որ կարող է հետաձգման միջնորդություն ներկայացնել, ինչը սակայն պաշտպանական կողմը չարեց:

Հիշեցնենք, որ առաջին ատյանի դատարանը Սամվել Բաբայանին մեղավոր էր ճանաչել Քրեական օրենսգրքի 38-235-րդ հոդվածի 2-րդ մասով (մի խումբ անձանց կողմից ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) և 190-րդ հոդվածի 1-ին մասով (Հանցավոր ճանապարհով ստացված գույքն օրինականացնելը (փողերի լվացում) և դատապարտել 6 տարվա ազատազրկման։ 

Ըստ մեղադրական եզրակացության՝ Սամվել Բաբայանը դրդել է մի խումբ անձանց` նախնական համաձայնությամբ ապօրինի կերպով ռազմամթերք հանդիսացող «Իգլա» տեսակի դյուրակիր զենիթահրթիռային համալիր ձեռք բերելուն, փոխադրելուն և պահելուն, ինչպես նաև՝ փոխարկման արդյունքում ձեռք է բերել հանցավոր ճանապարհով ստացված գույք: Գործով որպես ամբաստանյալ անցնում են նաև Սանասար Գաբրիելյանը, Արմեն Պողոսյանը, Կարեն և Անդրանիկ Քոչարյանները, Ժորա Զաքարյանն ու Դավիթ Հարությունյանը: