Ես էն պատգամավորներից եմ, որ ակնհայտորեն իր քաղաքական կապիտալն ավելացրել է էս ընթացքում

ԱԺ «Իմ քայլը» խմբակցության պատգամավոր Գեւորգ Պապոյանից հետաքրքրվեցինք՝ Ընտրական օրենսգիրքը փոխելու են, նո՞ր գնան հունիսի 20-ին ընտրությունների, թե՞ նախկինով են գնալու։ «Էդ ամեն ինչը կախված է քաղաքական դաշտում տեղի ունեցած կոնսենսուսից եւ, իհարկե, Վենետիկի հանձնաժողովի կարծիքից։ Այսինքն՝ որեւէ պարագայում չենք առաջնորդվելու էն տարբերակով, որ, այ, էս կամ էն տարբերակը մեզ հարմար է։ Առաջնորդվելու ենք առաջին հերթին իրավական ընթացակարգերով, այնուհետեւ՝ քաղաքական կոնսենսուսով եւ վերջում՝ նաեւ Վենետիկի կարծիքով»,- ասաց Պապոյանը։

- Վենետիկի կարծիքը երբվանի՞ց է ձեզ համար կարեւոր դարձել, նախկինում, երբ ձեզ պետք էր սահմանադրական փոփոխություններ իրականացնել, Վենետիկի կարծիքը հաշվի չէիք առնում, մեղադրում էիք կոռուպցիայի մեջ։

- Ես համաձայն չեմ, ես նման կարծիք չեմ հայտնել։

- Ձեր խմբակցության պատգամավորներից Վահագն Հովակիմյանն է՝ սահմանադրագետ, նման կարծիք հայտնել։

- Խնդիրն այն է, որ ամենաառաջինը քաղաքական կոնսենսուսի հարցն է։ Այսինքն, եթե պիտի միայնակ մենք քվեարկենք այդ նախագծի օգտին, ես կարծում եմ՝ պետք չէ դա անցկացնել։

- Իսկ քաղաքական կոնսենսուս, օրինակ, ձեր իշխանության սորոսական հատվածի հետ պե՞տք է լինի, թե՞ ոչ։

- Ես նման գնահատական չէի տա ու չգիտեմ, էլի, էդ սորոսական-ոչ սորոսական եւ այլն, խմբակցությունում բոլորն «Իմ քայլի» պատգամավոր են։

- Բայց, ըստ մամուլի տեղեկությունների, ձեր իշխանության մեջ «փայ ունեցող», այսպես կոչված, սորոսական հատվածը, այսինքն՝ այն պատգամավորները, որոնք Սորոսի հիմնադրամին այս կամ այն կերպ առնչվել են, դեմ են, որ նախկինների ընդունած օրենսգրքով գնաք ընտրության։

- Տեսեք, առաջին մասում էնպիսի մեկնաբանություն եք տալիս, որ, իրականում, նման բան չկա՝ փայ ունեցող, բան․․․ Բայց խնդիրը հետեւյալն է․ արժեքային դաշտում ամբողջ խմբակցությունը համարում է, որ մեր դավանած արժեքները, մեր ծրագիրը, մեր գաղափարախոսությունն էնպիսին է, որ, այո, պետք է լինի 100 տոկոսանոց համամասնական ցուցակ։ Այսինքն՝ տարածքային ցուցակ չպետք է լինի։ Նաեւ մեր նախընտրական խոստումն է եղել դա։

- Հիմա պահելո՞ւ եք ձեր նախընտրական խոստումը, թե՞ ոչ։

- Իհարկե, պահում ենք մեր նախընտրական խոստումը, դրա համար նախագիծ ենք դրել շրջանառության մեջ, եւ էդ նախագիծը, եթե հասցրեց Ազգային ժողովը, եւ, միեւնույն ժամանակ, գա Վենետիկի հանձնաժողովից դրական կարծիք, մենք դա ընդունելու ենք։ Բայց խնդիրը հետեւյալն է. որպեսզի խաղի կանոնները, քաղաքական դաշտի մյուս խաղացողների համար չփոխվեն, դրա կիրառումն այս գալիք ընտրություններում կլինի, թե չի լինի, դա կախված է հետեւյալից․ եթե քաղաքական կոնսենսուս լինի խորհրդարանի ներսում, մենք, բնականաբար, կգնանք այդ քայլին։ Բայց մենք միայնակ դրան չենք գնա։

- Եթե դուք չհասցնեք փոխել Ընտրական օրենսգիրքն ու հնով գնաք հունիսի 20-ին ընտրության, կստացվի, որ ձեր իշխանությունը, որը խոստացել էր փոխել ԸՕ-ն, երկրորդ անգամ ընտրություն է կազմակերպում նախկիններից ժառանգություն մնացած այդ «վատ օրենսգրքով» եւ «վատ ռեյտինգային համակարգով»։

- Ձեր հարցը բաժանենք 2 մասի․ առաջին անգամ մենք ենք նախաձեռնել այդ փոփոխությունը, եւ դա չի ընդունվել ԱԺ-ում, որովհետեւ ՀՀԿ-ն չի աջակցել։ Հիմա ներկայում մենք ի՞նչ ենք ասում, որ մենք պրոցեսներով հերթականությամբ գնալու ենք առաջ եւ կհասցնենք-չենք հասցնի, դա ժամանակը ցույց կտա։ Բայց մենք քաղաքական կամք դրսեւորել ենք, օրենքը գրել ենք, շրջանառել ենք, ուղարկել ենք Վենետիկի հանձնաժողով, եւ դրական կարծիքի դեպքում պրոցեսը սկսվելու է՝ առաջին ընթերցում, երկրորդ ընթերցում, հետո՝ նախագահ եւ այլն։ Մենք չգիտենք՝ կհասցնե՞նք, թե՞ ոչ։ Բայց հնարավոր է, օրինակ, էստեղ ինչ-որ արագացված ընթացակարգ, չէ՞, բայց ԸՕ փոխել արագացված ընթացակարգով, էն էլ ընտրություններից առաջ, մի դեպքում է քաղաքականապես ճիշտ, երբ որ քաղաքական դաշտում կա դրա շուրջ կոնսենսուս։

- Բայց դուք փորձ ունեք մեկ գիշերվա մեջ Սահմանադրություն կամ սահմանադրական օրենքներ փոխելու, ԸՕ-ն ի՞նչ է ձեզ համար, որ չփոխեք արագացված կերպով։

- Սահմանադրական փոփոխությունը պետք էր ժողովրդին, ժողովուրդը պահանջում էր, արեցինք։

- Բայց դուք հանրաքվե չարեցիք, որ իմանաք՝ ժողովուրդը պահանջո՞ւմ է, թե՞ ոչ։

- Չկարողացանք՝ քովիդի պատճառով։ Ես՝ ինքս, շատ կողմ էի եւ ուզում էի, որ հանրաքվե լիներ։ Իսկ Ընտրական օրենսգիրքը, այո, ընդհանուր առմամբ ժողովրդին է վերաբերում, բայց նաեւ վերաբերում է առանձին քաղաքական կուսակցություններին եւ քաղաքական դաշտի միավորներին։ Եվ տեսեք, էսօր ես տարբեր հայտարարություններ եմ լսում, որ հիմնականում ուզում են համամասնական, կարծում եմ՝ կլինեն նաեւ ռեյտինգայինի կողմնակիցներ, ինչը նորմալ է, բայց, որքան գիտեմ, «Լուսավոր Հայաստանի» ղեկավարն ասել է, որ իրենց համար, օրինակ, բաց համամասնական համակարգն է նախընտրելի։

- Ի՞նչ եք կարծում, եթե նորից գնանք ռեյտինգային համակարգով ընտրությունների, Դուք, որ մոտ 4 հազար ձայն էիք ստացել 2018-ին, Ձեր ընտրատարածքում, Ձեզ կհաջողվի՞ նորից, ինչպես Ձեր կուսակիցներից մեկն էր նկատել, Նիկոլ Փաշինյանի հեղինակության հաշվին հավաքել այդքան ձայն․․․ նաեւ ձեզ համեմատել էին ուսապարկերի հետ, որ «Փաշինյանի ուսապարկն էլ լիներ, այդքան ձայն կհավաքեր»։

- Գիտե՞ք, հիմա անհաջող մեկնաբանություն է եղել, եկեք դա անընդհատ չհոլովենք։

- Գուցե միամտաբար ճշմարտությո՞ւնն է ասել՝ թեկուզ անհաջող։

- Էսպես ասեմ՝ ես, կարծում եմ, էն պատգամավորներից եմ, որ ակնհայտորեն իր քաղաքական կապիտալն ավելացրել է էս ընթացքում, եւ ես հիմա շատ ավելի վստահ եմ գնալու ռեյտինգային ընտրակարգով ընտրություններին։

- Բայց Ձեր իշխանության օրոք Արցախը հանձնվեց թուրքին, Սյունիքի սահմանները վտանգված են, հազարավոր զոհեր ունենք, տնտեսության վիճակը շատ վատ է։

- Հիմա Դուք տալիս եք գնահատականներ, որոնց հետ ես համաձայն չեմ, եւ, ըստ էության, էդ գնահատականը՝ Ձեր տված, դեռ կտեսնենք՝ ժողովուրդն ինչպիսի կարծիք ունի էս ամեն ինչին։

- Կարծում եք՝ ժողովրդին դո՞ւր էր գալիս Արցախը հանձնելն ու այսքան զոհ տալը։

- Ժողովուրդը հունիսի 20-ին կպատասխանի՝ իրականում Արցախը հանձնողներն ովքեր էին, տնտեսությունն էս վիճակին հասցնողներն ովքեր էին, եւ ասում եմ, որ ժողովուրդը շատ լավ էդ հարցերի պատասխանը գիտի, եւ հունիսի 20-ին Դուք կտեսնեք այդ հարցերի պատասխանը։

- Գուցե ժողովուրդն արժանի է այն իշխանությանը, որին ընտրել է, բայց, ամեն դեպքում, ժողովրդի մեջ կա նաեւ առողջ հատված, որը դեմ է ձեր իշխանությանը։

- Ժողովրդի առողջ հատվածը կողմ է մեր իշխանությանը։

- Կարծում եք՝ ժողովրդի առողջ հատվա՞ծն էր կողմ, որ Արցախը հանձնեինք եւ հազարավոր զոհեր ունենայինք։

- Ոչ, ժողովրդի առողջ հատվածը շատ լավ գիտի՝ որն ինչպես է տեղի ունեցել, երբ, ինչի հետեւանքով։