Փաշինյանի ֆենոմենը
Մարդու ֆենոմենալությունը, ի տարբերություն կենդանի աշխարհի մյուս ներկայացուցիչների, պայմանավորում է նրա բանականությունը, սոցիալական և կենսաբանական փոխկապվածությունը:
Դասական ռացիոնալիզմի ներկայացուցիչ Դեկարտն աֆեկտները և կրքերը դիտարկել է որպես ազդեցություն՝ բանական հոգու վրա, որոնք, քանի դեռ չեն պարզվել բանականության համար, մեր մեջ առաջացնում են մտքի մոլորություններ, որոնց արդյունքը չար արարքներն են:
Հետևաբար և, հավանաբար, Փաշինյանի արարքների և վարքի վրա մեծ ազդեցություն ունեն աֆեկտներն ու կրքերը: Նրա ֆենոմենի ինքնատիպությունն այն է, որ բացակայում է սոցիալական և կենսաբանական փոխկապվածությունը: Նրան նպատակահարմար է դիտարկել կենսաբանական տեսանկյունից՝ առանց սոցիալականի հետ փոխկապվածության, հետևաբար բացառվում է նրա ֆենոմենի մեկնաբանումը քաղաքագիտական տեսանկյունից: Խոսքը, փաստորեն, վերաբերում է կենսաբանական ֆենոմենին: Մարդկային տեսակի մեջ այդպիսի ֆենոմենները հազվագյուտ են, ուստիև դժվար ըմբռնելի՝ բանականությամբ, սոցիալական ու կենսաբանական փոխկապվածությամբ առանձնացող մարդկային տեսակի համար:
Մարդը, գիտակցաբար, թե անգիտակցաբար, գործադրել է հայոց պետականության կործանման մեխանիզմը (ըստ օդում կախված լուրերի), ժողովրդի պատիվը գցել գետնին, որի վրա ամենօրյա ռեժիմով թքում են, մինչդեռ իրեն սիրում են, իր արևով են երդվում, ընդ որում, ոչ թե անդեմ անձինք, այլ որոշակի՝ որոնք կասկածելի պատերազմում կորցրել են իրենց զավակներին, ամուսիններին: Սա ֆենոմեն է, Փաշինյանի ֆենոմենը: Նիկոլն ուրիշ է, արտասովոր, անկրկնելի ու աննախադեպ, անհաղորդ երկրին պատուհասած սպառնալիքների, մարդկային ճակատագրերի հանդեպ, չապաշխարող թույլ տված սխալների կամ գործած մեղքերի համար: Մարդու այդպիսի հատկանիշները գուցե վտանգավոր չհամարվեն, եթե դրանցով օժտվածից կախված չէ ժողովրդի, պետության ճակատագիրը:
Երեք տարին բավական ժամանակ է, որպեսզի մարդիկ, համենայնդեպս՝ սթափ դատողները հասկանան, որ գուցեև Նիկոլը ցանկացել է լավ բաներ անել, բայց չի ստացվել ու չի էլ ստացվելու: Հետևաբար, եկել է ապաշխարելու և դարձի գալու պահը:
Հանգամանքների բերումով, Ծիծեռնակաբերդում վեր խոյացող Հայոց ցեղասպանության հուշահամալիրի խորհուրդն ընդունելի և հասկանալի Հայաստանի նրա օրգանական մասը կազմող Արցախի, աշխարհասփյուռ հայերին և ոչ միայն: Ցավալիորեն, այն միակ բանն է, որի առնչությամբ հայ ժողովուրդը դրսևորում է համընդհանուր համաձայնություն, համերաշխություն, միասնականություն, նրա մեջ արթնանում է դարերի խորքից եկող իր մշակութային ժառանգությունը՝ ինքնանույնականացնելով ժողովրդին, բայց ընդամենը 1 օր՝ ապրիլի 24-ին: Հատկապես այդ օրն է, երբ յուրաքանչյուր հայ, հարգանքի տուրք մատուցելով Եվրոպական երկրների հովանավորությամբ պատմական Հայաստանում իրականացված ցեղասպանության, նրա էթնիկական զտման զոհերի հիշատակին, լռությամբ, իր ամբողջ էությամբ, պարսավում է այդ մեծ մեղքի ոճրագործներին, բայց բարձրունքից ներքև, մնացած 364 օրերին, շարունակում է գործել մեղքեր իր ժողովրդի դեմ ու չի ապաշխարհում դրա համար:
Աստծո պատվիրանների ամբողջ բազմությունը կարելի է հանգեցնել մեկ սկզբի՝ ապաշխարությանը: Մենք դատապարտվում ենք ոչ մեր բազմաթիվ մեղքերի համար, այլ այն բանի համար, որ հրաժարվում ենք ապաշխարել:
Էլ ի՞նչ է անհրաժեշտ, որ այս պարզ ճշմարտությունը հասկանանք, քանի՞ հազար զոհ և քանի՞ հազար քառակուսի կիլոմետր տարածքի կորուստ է ևս պահանջվում, որպեսզի դարձի գանք: Ու այդպես շարունակվում է մեկ դարից ավելի: Նույնիսկ մեր նահատակված որդիների դեռևս չսառչած մարմինները, ավելին՝ նրանցից շատերի մասունքների դեռևս չգտնվելը չեն սթափեցնում մեզ: Այդ ինչքան հզոր է «փաշինյան» ֆենոմենի ուժը, որը մթագնում է պատերազմը, դրանում հերոսացածներին ու դրանից չվերադարձածների հիշատակը: Ինչու՞մ է այդ ֆենոմենի առեղծվածը, ո՞վ կարող է այն բացահայտել:
Թվում է, որ Փաշինյանի ֆենոմենի բացահայտման բանալին նախկին երեք նախագահներն են: Ցանկալի է, որ նրանք միասին այցելեն Ցեղասպանության հուշահամալիր, խոնարվեն, ապաշխարեն ու հայցեն հայ ժողովրդի ներողամտությունը՝ այն ամենի համար, ինչ արել են ի վնաս հայոց պետականության (եթե արել են) և այն ամենի համար, ինչը չեն արել՝ հանուն հայոց պետականության ամրապնդման ու զարգացման գործընթացներն անշրջելի դարձնելու, երկիրը նիկոլատիպ ֆենոմեններից (դժբախտաբար, նիկոլիզմի ջատագովներ կան Նիկոլի շրջապատում, ովքեր ավելի Նիկոլ են, քան Նիկոլը) զերծ պահելու համար: Ակնհայտորեն, ապաշխարանքը հոգևոր ոչ շոշափելի երևույթ է, որին պետք է հետևի նաև «նյութական ապաշխարանքը» (եթե դրա համար հիմքեր կան, ինչի մասին կիմանան ապաշխարողները):
Գործող վարչապետը՝ իր մեձավորների հետ ևս այցելում է համալիր, ապաշխարում: Պետք է ապաշխարենք ազգովի, պետք է ինքնամաքրվենք ու դարձի գանք ազգովի, այլընտրանք գոյություն չունի:
Այդ ամենից հետո, երեք նախագահների ու անկախ Հայաստանի նորագույն պատմության մեջ քաղաքական նշանակալի դերակատարում ունեցող 4 կուսակցությունների հետ (ՀՀՇ-ՀԱԿ, ՀՅԴ, ՀՀԿ, ԲՀԿ) Վարչապետը պետք է քննարկի իր հրաժարականի հարցը և այլևս քաղաքականությամբ չզբաղվելու պայմանները: Պետք է աջակցել Փաշինյանին՝ իրեն և երկիրը «փաշինյանի ֆենոմենից» ազատելու համար:
Այլապես, դժվար չէ կանխատեսել, թե ինչ զարգացումներ են սպասելու մեր երկրին՝ նախատեսվող ձևաչափով արտահերթ խորհրդարանական ընտրություններին գնալու դեպքում. մուտք ենք գործելու հաջորդ և վերջին արատավոր շրջան, որտեղից այլևս ելք չի լինելու:
Հ.Գ. Ստեղծված բարդ իրավիճակի ու լարված բարոյահոգեբանական մթնոլորտի հետևանքով ահագնացող արտագաղթը կարող է հանգեցնել «ժողովրդագրական փոսի» առաջացմանը, ինչը մեծ սպառնալիք կլինի տարածաշրջանում հայոց պետականության ապագայի համար:
Հ.Գ. Վատ չէր լինի նաև, եթե «Իմ քայլը» և «Լուսավոր Հայաստանը» ինքնալուծարվերին և, վերջապես, հասարակության մեջ անհանդուրժողականություն դրսևորվեր կուսակցությունաստեղծ տենդի հանդեպ: Այդ և մյուս ոչ մեծաթիվ կուսակցություններում, անշուշտ, կան վառ անհատականություններ, որոնք կարող են ինքնաիրացվել այլ կուսակցություններում կամ գործունեության այլ բնագավառներում:
Հ.Գ. Կուսակցությունները, որոնք մասնակցելու են արտահերթ ընտրություններին, պետք է մեծ պատասխանատվությամբ կազմեն թեկնածուների ցուցակները: Գուցե այս անցած երեք տարիների նվաճում կարելի է համարել այն, որ բազմաթիվ իրապես հայրենասեր անձինք (իրավաբաններ, քաղաքագետներ և այլն) թեպետ եղել էին նախկինում, բայց երևացին իրենց ողջ «փայլով»: Եթե հնարավոր լիներ ցուցակով նշանակել պատգամավորներին, ապա դա իդեալական կլիներ: Բայց մնում է մեկ տարբերակ. կուսակցությունները կարող են այդպիսիներին ներառել իրենց ցուցակներում՝ առանց ակնկալիքների: Եթե պատգամավորն ունենա մասնագիտական ու մարդկային բարձր որակներ, գործի խղճի մտոք, ապա լավ կլինի ամբողջ հասարակության, այլ ոչ թե նրա այս կամ այն խմբի համար:
Գագիկ Վարդանյան
Կարծիքներ