Դեռ չի ծանոթացել Բագրատյանի ծրագրին
hraparak
16 Հունվար 2013 | 06:39
0
Այս տարվա նախագահական ընտրությունների ինտրիգը կարծես Հայ ազգային կոնգրեսի պառակտումն ու դրանից անջատված ուժերի միջեւ առճակատումն է: Ինչքան մոտենում են ընտրությունները, այնքան թեժանում է միմյանց սեւացնելու գործընթացը Կոնգրեսից անջատված ու չանջատված ուժերի միջեւ: Արդեն բանը հասել է միմյանց բացահայտորեն եւ անխնա վարկաբեկելուն: Ճիշտ այնպիսի տոնով ու բնութագրումներով, ինչպես ժամանակին ընդդիմադիրները պատերազմում էին հանցավոր ռեժիմի դեմ: Սակայն այս մարտահրավերների մեջ հայտնված որոշ գործիչներ իրենց զգում են, այսպես ասած, երկու քարի արանքում: Նրանք չգիտեն ինչպես պահեն իրենց՝ կապված Տեր-Պետրոսյանի չառաջադրվելու, ընդդիմության նահանջի, ԲՀԿ-ի նկատմամբ վերաբերմունքի, Հրանտ Բագրատյանի առաջադրվելու հետ: Այս իրավիճակում հայտնվածների թվում է նաեւ ազատամարտիկ, նախկին պատգամավոր եւ քաղբանտարկյալ Սասուն Միքայելյանը, ով դեռ հայտարարությամբ հանդես չի եկել իր դիրքորոշման մասին, թեեւ խոստացել էր դա անել տարեվերջին: Թե ինչն է խանգարում Սասուն Միքայելյանին ՀԱԿ-ում ստեղծված իրավիճակի վերաբերյալ հայտարարությամբ հանդես գալ, երեկ հետաքրքրվեցինք իրենից:
Սակայն նա վերստին հայտարարեց, որ ամեն ինչ պարզ կլինի առաջիկայում: «Ամեն ինչ իր ժամանակին, ոչ շտապում եմ, ոչ էլ»,- ասաց Միքայելյանը՝ չմատնանշելով հապաղելու պատճառը: Իսկ ընդհանրապես ի՞նչ դիրքորոշում է ունենալու իրենց դաշտի միակ ընդդիմադիր թեկնածուի, ՀԱԿ անդամ Բագրատյանի առաջադրման հետ կապված, կսատարի՞ արդյոք նրան: «Ես հլը ոչ մեկի ծրագրերին ծանոթ չեմ, կնայեմ, կորոշեմ, տեղյակ կպահեմ՝ պաշտպանելու եմ, թե ոչ»,-հերթապահ ֆրազն ասաց Միքայելյանը՝ կրկին հավելելով, թե առաջիկա օրերին հանդես կգա քաղաքական հայտարարությամբ:
Կարծիքներ