Խայտառակ արդյունավետությամբ աշխատող կառավարության հետ ո՞վ կուզենա աշխատել, նրանց հետ պետք է քննիչներն աշխատեն

ԳԽ և ԱԺ նախկին պատգամավոր Ազատ Արշակյանի կարծիքով` նախընտրական այս փուլում տեղի ունեցած իրադարձությունները կարելի է որակել մեկ ձևով՝ պայքար իշխանության համար, ակնհայտ է, որ քրեաօլիգարխիկ համակարգը չի ուզում զրկվել լծակներից, ռեսուրսներից, այդ իսկ պատճառով ամեն ինչի պատրաստ է, որ շարունակի կեղեքել Հայաստանի Հանրապետությունը և նրա քաղաքացիներին. «Հասարակության խնդիրը, իշխանության խնդիրը, եթե ուզում են նրանք ապահովել արդար, թափանցիկ ընտրություններ: Տեղական ինքնակառավարման մարմիններում պետք է ընտրվի տեղական հոգսերով, քաղաքացիների հոգսերով մտահոգ իշխանություն, այսինքն՝ իշխանությունը պետք է ծառայի ժողովրդին, պայքարը կարծում եմ դրա համար է, իսկ նրանք չեն ուզում հանձնվել»:

-Պարոն Արշակյան, ընտրությունների հետ կապված տեղի ունեցած իրադարձություններից ամենաուշագրավը Գյումրու դեպքն էր, Գյումրու քաղաքապետի թեկնածու Վարդևան Գրիգորյանի որդու մահը, Վարդևան Գրիգորյանը իր թեկնածությունը չհանեց. ԲՀԿ-ականներն էլ իրենց հարցազրույցներում նշեցին, որ հանուն Արշակի շարունակվում է պայքարը: Որքանո՞վ էր արդարացված քաղաքապետի թեկնածուի այս քայլը և արդյոք այս քայլը չի՞ ստիպի գյումրեցուն ձայն տալ հենց Գրիգորյանի օգտին:

Ես նախ ցավակցում եմ Վարդևան Գրիգորյանին, կարծեմ՝ մենք Գերագույն խորհրդում միասին պատգամավոր ենք եղել, չափազանց ծանր կորուստ է որդու կորուստը, մնացածը ինչ ձևով ինքը կցանկանա մխիթարվել, եթե մխիթարություն է տեսնում քաղաքական պայքարում, ուրեմն թող դրանով մխիթարվի, իսկ եթե մեկ ուրիշ բանով կուզենա զբաղվել... Այսինքն՝ շահարկել որդու կորուստը, ես կարծում եմ՝ դա անհարիր է և անհնար է, կարծում եմ՝ դա մխիթարվելու մի ձև է, իսկ քաղաքականության մեջ չգիտեմ ինչ կլինի, ես չգիտեմ Գյումրիում ինչ է կատարվում, ես գիտեմ, որ Գյումրին հայտնի է իր ոչ կոռեկտ, ոչ օրինական, ոչ թափանցիկ ընտրություններով, հայտնի է դա, հիմա այնտեղ ինչ տեղի կունենա այդ երիտասարդի զոհվելուց հետո, ես չեմ կարող կռահել:

-Կարեն Կարապետյանի գալուն պես նախարարներ պաշտոնանկ եղան, կարծես՝ նոր կառավարություն է ձևավորվում, ի՞նչ եք կարծում, դրանք կոսմետի՞կ փոփոխություններ են:

Չեմ կարծում, որովհետև կոսմետիկ փոփոխությունը ոչինչ չի փոխում, իսկ փոփոխություն անհրաժեշտ է, թեկուզ հենց մարդկային առումով, ինքը պետք է աշխատի իր թիմի հետ, ուրիշի թիմի հետ ինչի՞ պետք է աշխատի, մանավանդ ձախողված թիմի հետ: Նախորդ կառավարությունը ձախորդված կառավարություն էր, խայտառակություն էր, այդ խայտառակ եղած մարդկանց հետ, խայտառակ վարքագծով, խայտառակ արդյունավետությամբ աշխատող կառավարության հետ ո՞վ կուզենա աշխատել, նրանց հետ պետք է քննիչներն աշխատեն, նրանք հիմա պետք է տեղափոխվեն քննչական մեկուսարան, ինչի՞ պետք է Կարեն Կարապետյանը ուզենա աշխատել քննության հավակնորդների հետ, պետք է փոխի, իր թիմը բերի, իր ծրագրերը իրականացնելու համար, ես հույս ունեմ, որ այդ ծրագրերը բարեփոխման ծրագրեր են:

-Կառավարության նիստի ժամանակ Կարեն Կարապետյանը հայտարարեց, որ անհրաժեշտ է վերացնել պրիմիտիվ գողությունը: Ինչպե՞ս այս հայտարարությունը կմեկնաբանեք:

Նույնիսկ պրիմիտիվ, այսինքն՝ պրիմիտիվ գողեր կան, մենք հասկանում ենք, որ կան խորամանկ, խարդախ, հաշվարկներ անող գողեր, որոնց դեմ հարկավոր է պայքարել, բայց այնքան են լկտիացել, որ գրպաններիցս տանում են, այ, իր ասածը դա է, որ լկտիները, որ արդեն չեն հարգում ընդհանրապես կարգը, կանոնը, ուրիշների շահերը, պետական ունեցվածքի անձեռնմխելիությունը, ես այդպես եմ հասկանում, որ նույնիսկ պրիմիտիվ գալիս, գրպաններիցս փողը հանում-տանում են, ես այդպես եմ հասկացել, հասել են այդտեղ: Ինքս չասված բառեր շատ եմ օգտագործում, բաց թողած բառեր շատ ունեմ իմ խոսքի մեջ, և ես ուրիշին հասկանում եմ:

-Վարչապետի խոսքերով՝ պետք է գան այնպիսի մարդիկ, ովքեր ունեն բիզնես մտածողություն, բայց մյուս կողմից՝ արդյոք բիզնես մտածողությամբ մարդը պետական ապարատը չի՞ ծառայեցնի անձնական շահերին:

Մենք բարդ խնդիր ունենք լուծելու, մի կողմից հասարակության համար անհայտ, չկայացած, չդրսևորված անհատներին բերելով հնարավոր է մենք շահենք, նրանք պարզապես ասպարեզ չեն ունեցել՝ լինելով ազնիվ, աշխատունակ և այլն, այս համակարգի մեջ չեն կարողացել տեղավորվել, որովհետև այս համակարգը լավը չէր, այսպիսի մարդիկ հնարավոր է, որ կան, բայց ճիշտ կլինի մարդիկ գան, ովքեր կենսագրություն ունեն, փորձ ունեն աշխատանքային, նրանք հաջողակ են, նրանք իրենց նախաձեռնություններն ավարտին են հասցնում հաջողությամբ, հիմա այդպիսի հարց կա՝ բերել անհայտ մարդկանց, ովքեր ձեռքերը ծալած նստած են եղել ինչ-որ տեղ, սպասել են ստերիլ վիճակի, դա էլ տարբերակ է, կամ էլ բերել արդեն ինչ-որ բնագավառում հաջողության հասած մարդկանց, որոնց հետ պետք է աշխատել: Ընդհանրապես կառավարման համակարգը բարդ է, դա անընդհատ մշակվում է, մշակման և կատարելագործման կարիք կա: Ես կարծում եմ՝ պետք է լինեն մարդիկ, ովքեր աշխատանքային փորձ ունեն, կենսագրություն ունեն և նրանք այսպես ասած այլմոլորակայինններ չեն, հայտնի մարդիկ են, մութ կենսագրությունով մարդիկ մեզ պետք չեն:

-Պարոն Արշակյան, ևս երկու ամսով երկարաձգվեց Անդրիաս Ղուկասյանի կալանքը, մինչդեռ Արմեն Մարտիրոսյանին, Դավիթ Սանասարյանին, որոնց նույն մեղադրանքն էր առաջադրվել, գրավի դիմաց ազատ արձակեցին: Ի՞նչն է պատճառը Ղուկասյանին կալանավայրում պահելու:

Նույնիսկ եթե կասկածներ կան նրա նկատմամբ, հարկավոր է հաշվի առնել նրա քաղաքական գործիչ լինելու հանգամանքը, ազատության մեջ թողնել, քննությունը թող գնա: Ես կարծում եմ՝ քաղաքական գործիչներն ունեն իմունիտետ, նրանք պետք է ազատ լինեն, եթե կա քրեական գործի վերաբերյալ կասկած, միևնույն է, նրանք պետք է ազատության մեջ լինեն, որովհետև քաղաքական գործիչը պետք է ազատ լինի, խոսքի ազատության խնդիր կա, այդ սահմանը, եթե նույնիսկ խախտվել է, իրավապահ մարմինները պետք է զիջումների գնան:

-Անդրադառնալով այս տարի մեր երկրում տեղի ունեցած թիվ 1 իրադարձությանը՝ «Սասնա ծռեր»-ի գործողություններին, կուլիսային խոսակցությունների համաձայն՝ քննարկվում է նրանց համաներմամբ ազատ արձակելու հարցը: Որքանո՞վ է դա իրատեսական:

Երբ նոր էին այդ գործողությունները սկսվել, ես ասում էի՝ բոլոր նրանք, ովքեր սպանությանը, գույքի ոչնչացմանը չեն մասնակցել, նրանց հարկավոր է անմիջապես բաց թողնել, առանց որևէ տեսակի հետապնդման: Ինչպես եղել է նախկինում՝ 1990 թ ՀԱԲ-ի ժամանակ, ովքեր առանց զենքի տարածքից դուրս կգային, նրանք պետք է գնային տուն, եթե մարդասպանությանը, գույքի ոչնչացմանը չեն մասնակցել, պատանդառու չեն, իսկ նրանք, ովքեր պատանդ են պահել, գույք են ոչնչացրել, մարդ են սպանել, պարզ է, որ նրանք անպայման քրեական պատասխանատվության պետք է ենթրակվեն, որովհետև մարդ են սպանել: Նրանք, ովքեր զենքը վայր են դրել և դուրս են եկել տարածքից պետք է ներվեն՝ առանց ավելորդ քաշքշուկների…: Իշխանությունը արդեն ուժեղ դուրս եկավ, որովհետև չսպանեց, այ դա ուժ ցուցադրելն է, իշխանությունը վրեժ չլուծեց, չսպանեց՝ հնարավորություն ուներ, մենք գիտենք ինչ է լինում նման դեպքերում, իշխանափոխություն չեղավ, դա նշանակում է, որ իշխանության նկատմամբ որոշակի վստահություն կա, հիմա իշխանությունը ինքնավստահ է, հակառակ դեպքում իշխանությունը պետք է հանձնվեր: