Կոտայքի մարզպետարանի  կրթության մշակույթի եւ սպորտի վարչության պետի պաշտոնը թափուր կմա՞

Կոտայքի մարզպետարանի աշխատակազմի կրթության, մշակույթի եւ սպորտի վարչության պետի պաշտոնը 2 տարի եւ ավելի թափուր է: 

Կոտայքի նախկին մարզպետ Կարապետ Գուլոյանի պաշտոնավարման ընթացքում՝ 2016թ.-ի օգոստոսի 5-ին պաշտոնից ազատվեց  Հովհաննես Կոստանյանը, ով այդ վարչության պետ էր աշխատել երկար տարիներ:

1 ամիս անց կրթության, մշակույթի  եւ սպորտի վարչության պետի ժամանակավոր պաշտոնակատար է նշանակվում նախկին մարզպետի հովանավորյալ Հերմինե Ադամյանը:

Չնայած գործադրած ջանքներին  Հերմինե Ադամյանին թույլ չէին տվել մասնակցել քաղաքացիական ծառայության խորհուրդի մրցույթին, քանի որ չէր համապատասխանում ներկայացված չափանիշներին՝ մասնավորապես չուներ քաղծառայության առնվազն 5 տարվա ստաժ, քաղծառայության 2-րդ դասի առաջատար ծառայողի դասային աստիճան, գիտակ աստիճան և այլն:

2018թ-ի նոյեմբերի 13-ին կրթության, մշակույթի  եւ սպորտի վարչության պետի ժամանակավոր պաշտոնակատար նշանակվեց Լիլիթ Ստեփանյանը, ով Հրազդան համայնքի ղեկավարի պաշտոնակատարն էր Արամ Դանիելյանի հրաժարականից հետո:  

Լիլիթ Ստեփանյանի աշխատավարձը կազմում էր 310 հազար 858 ՀՀ դրամ: Այդ  ընթացքում Ստեփանյանը քարոզարշավ է իրականացնում, ապա պարգեւատրվում եւս 270 հազար  460 ՀՀ դրամով, իսկ հունվարի 11-ին կնքած պայմանագիրը լուծարվում է: Ստեփանյանը  պատգամավոր է դառնում, իսկ կրթության, մշակույթի  եւ սպորտի վարչության պետի  պաշտոնը կրկին թափուր է մնում: 

Մեր այն հարցին, թե  մարզպետարանի աշխատակազմի մշակույթի  եւ սպորտի վարչության պետ թափուր պաշտոնի համար մրցույթը ե՞րբ տեղի կունենա,  թե՞ այդ պաշտոնն այդպես էլ թափուր կմա,  մարզպետարանի տեղեկատվության և հասարակայնության հետ կապերի բաժնի պետի պաշտոնակատար` Լուսինե Մանուկյան ասաց, որ հնարավոր է, որ մրցույթ չլինի: