Հավատը լեռ է, իսկ լեռան վրա մրջյունին էլ թևեր են բուսնում․․․

․․․Իսկ ինչու՞ չեք աղմկում, երբ լրագրողը իշխանության մասին հարց է բարձրացնում, իսկ Բագրատ Սրբազանն ասում է՝ օրհնենք նրանց։ Ուզում եմ հասկանալ՝ այդ լավը, բարին չե՞ք տեսնում։ Դա ատելությունը, չարը վարագույրի պես հետ քաշելու միջոց չէ՞։ Այս օրերին, երբ գործի է դրվել իշխանական ողջ քարոզչամեքենան ու արատավորվում է ժողովրդի արթնացման շարժումը, որը առաջնորդում է Սրբազանը, նման պատասխան սպասու՞մ էիք։ Վեց տարի շարունակ ատելությունից, պառակտչական գործողություններից, ստից բացի այլ բան տեսե՞լ եք։ Իսկ այսօր վեց տարի շարունակ ազգը պառակտած իշխանությանը օրհնում է Սրբազանը։ Գոնե հիմա հասկանու՞մ եք, որ դարձի եկած հանցագործին ինչու՞ էր ներում Հիսուսը։ Հասկանու՞մ եք, որ Աստված մեղքից կամենում է ազատել մարդուն, փրկել նրան։ Երբ մարդն իր հավատքը դնում է Հիսուս Քրիստոսի հանդեպ փրկության համար, նրա բոլոր մեղքերը ներվում են: Չէ՜ դա դժվար է հասկանալ, այնպես, ինչպես դժվար է հասկանալ, երբ Սրբազանն ասում է՝ ՔՊ-ականների հետ զրուցե՜ք․․․ Դա համընդհանուր ծաղր է առաջացնում, բայց դրա մեջ խորը իմաստ կա։ Գուցե ՔՊ-ականներ կան, որոնք փրկվել են ուզում։ Տարբեր կաշկանդանքներով, շղթաներով դևը կապել է նրանց, որ փրկվեն չկարողանան։  

Ո՞րն է Բագրատ Սրբազանի ու 2018-ից իշխանության եկածի տարբերությունը։ Նիկոլի աշխարհը ինքն ու իր խմբակն է, Սրբազանի աշխարհը տիեզերական է, որի մեջ մտնում է նաև Նիկոլն ու իր խմբակը։ Դժվար է սա ընդունել ու հասկանալ, բայց փորձե՜ք։   

Ասում են՝ թևերը կտրած արծիվը աչքերով է ճախրում․․․ Կմտածեք՝ ո՞ր սրիկայի ձեռքը կգա ՝ կտրել արծվի թևերը։ Այո, նման ձեռք եղել է։ Կտրել է հայ ազգի ճախրելու թևերը, բայց ազատություն, երկինք տենչողը հոգու աչքերով է ճախրում, մինչև աճեն թևերը․․․ Հավատը լեռ է։ Իսկ լեռան վրա մրջյունին էլ թևեր են բուսնում․․․