Մանկապարտեզները վերանորոգո՞ւմ են, թե՞ յուրացնում
![մանկապարտեզ](/images/2010/09/4-ej-mankapartez-e1285854843366-400x250.jpg)
Սա էլ են որոշել «վերանորոգել», սակայն կարծես թե ծնողներին լավ չեն համոզել իրենց «բարի» նպատակների մասին: Ծնողներից մի քանիսը մեզ էին ահազանգել, թե հերթական մանկապարտեզն են փորձում մեջ-մեջ անել: Այդ նպատակով նախ տարբեր մանկապարտեզներում տեղավորել են երեխաներին, ապա աջակցել աշխատակազմին, որ գործազուրկ չդառնան: Նման հոգատար վերաբերմունքը ծնողներին ավելի է վրդովեցրել, նրանք դա բացատրում են «շուխուր չգցելու» մտադրությամբ: Այլապես դժգոհ մասսան հարամ կաներ «վերանորոգման» գործը:
Մի խոսքով, սեպտեմբերի 10-15-ից հայտարարվել է մանկապարտեզի «հիմնանորոգման» մասին: Մանկապարտեզի գրատախտակին փակցրել են այն մանկապարտեզների ցանկը, որտեղ հնարավոր է երեխաներին տեղավորել, աշխատակիցներին էլ են այստեղ-այնտեղ տեղավորել ու վերջ 1930 թվականից գործող նախադպրոցական հաստատությանը: Մենք ծնողների զանգերից հետո այցելեցինք մանկապարտեզ: Իրոք որ՝ ներսում վիճակն անմխիթար էր. չնայած պատերը կանգուն էին, բայց շենքը վթարային վիճակում էր: Միայն բակն էր բարեկարգված ու գեղեցիկ:
Մանկապարտեզում մարդ չկար, բացի պահակից էր, որը շարունակում է խնամել քանդվող շինության կանաչ բակն ու ծառերը: Նա մեզ ուղեկցեց ներս: Դատարկ մահճակալներ, օրորոցներ, աթոռներ ու սենյակներ: Որոշ սենյակներ կոսմետիկ վերանորոգված էին, նույնիսկ պատուհաններն էին փոխված: Մանկապարտեզի վերջին մոհիկանը պատմեց, որ կարիճներն ու առնետները վերջին շրջանում ազատ ելումուտ են անում շենքում: Նրա վստահեցմամբ, եթե այդպես շարունակվեր, առնետներն ու կարիճները թվով գերազանցելու էին սաներին:
Ի դեպ, մոտ 10 խումբ է եղել այստեղ՝ 2 հարյուրից ավելի երեխա եւ 25 հոգանոց աշխատակազմ: Այլ մանրամասներ շենքի պահապանը չտրամադրեց, նա տեղյակ չէր, թե ինչու են քանդում ու ով է տիրանում շենքին կամ տեղը ինչ է վեր խոյանալու: Այս հարցերի պատասխանը փորձեցինք լսել քաղաքապետարանից: Կրթության վարչության պետ Գայանե Սողոմոնյանը վրդովվեց, երբ հարցրինք՝ ինչո՞ւ են քանդում մանկապարտեզը եւ ի՞նչ է դրա փոխարեն կառուցվելու: «Մանկապարտեզի լուծարման խոսակցություն ու նպատակ չկա:
Շենքը 30-ական թվականների բաղդադի կառույց է, որն ամեն վայրկյան վտանգ է սպառնում երեխաների առողջության համար: Կարիճներով լցված է ամբողջ մանկապարտեզը, նույնիսկ անկողինների մեջ էին մտնում: Մենք համաճարակայինին դիմեցինք՝ վերանորոգման աշխատանքներ կատարելու համար, պարզվեց, որ տանիքի փլվելու վտանգն էլ կա: Մասնագետներ հրավիրեցինք, եւ անհրաժեշտություն եղավ արագ փակել ու շտապ վերանորոգել»:
Սակայն, տիկնոջ վստահեցմամբ, մասնագետները եկել են այն եզրահանգման, որ վերանորոգումը չի փրկի, պետք է շուտափույթ քանդել ու նոր մանկապարտեզ կառուցել: Գայանե Սողոմոնյանը հավատացրեց, որ ոչ ոք դրսում չի հայտնվել, բոլորն էլ տեղավորվել են աշխատանքի այլ մանկապարտեզներում: Մեր այն հարցին, թե արդյոք նպատակն այդ տեղում այլ շինություն, ասենք՝ էլիտար շենք, կառուցելը չէ՞, տիկին Սողոմոնյանը վստահեցրեց, թե «մտքներով անգամ նման բան չի անցել». «Քաղաքապետարանը առաջ է տանում նոր մանկապարտեզների գաղափարը: Սրա փոխարեն էլ հետո նոր մանկապարտեզ պետք է բացվի»: Իսկ մենք կհետեւենք այս մանկապարտեզի հետագա ճակատագրին:
Կարծիքներ