Ռուսական միլիարդները օֆշոր են չվում Մոլդովայի վրայով
![Ռուսական միլիարդները օֆշոր են չվում Մոլդովայի վրայով](https://hraparak.am/uploads/images/a6baed0e1985bda8950462c32fdf7267.jpg)
Ռուսական ծագման ավելի քան 23 միլիարդ դոլար է «լվացվել» մոլդովական բանկերի միջոցով, հայտարարել է Մոլդովայի՝ փողերի լվացման նախազգուշացման և կոռուպցիայի դեմ պայքարի ազգային կենտրոնի պետի նախկին տեղակալ Միխայիլ Հոֆմանը, տեղեկացնում է «Ինտերֆաքսը»՝ հղում կատարելով TV7 հեռուստաալիքին:
Կոռուպցիայի դեմ պայքարի կենտրոնի նախկին աշխատակիցը ասել է, որ 2012-2014 թվականներին Մոլդովայի բանկային համակարգի միջոցով հսկայական գումարներ են լվացվել, այդ թվում և Ռուսաստանից:
«Հանրապետության ղեկավարությունը քաջատեղյակ է, որ 4 տարվա ընթացքում մոլդովական բանկերով 23 միլիարդ դոլար է անցել»,- նշել է Հոֆմանը:
Նա ասել է նաև, որ միայն 2013 թվականին Մոլդովայից օֆշորներ փոխանցած գումարը կազմել է 92 միլիարդ լեյ (մոտավորապես 6 միլիարդ դոլար):
Նշվում է, որ 2014 թվականի աշնանը Քիշնևը արձանագրել է դատական կեղծ որոշումներով փողերի՝ Ռուսաստանից Մոլդովա տեղափոխելու զանգվածային սխեման: Այդ գործում ներգրավված է եղել 21 ռուսական բանկ:
Կարծիքներ