Կեղծ  փաստաթղթեր տրամադրելու վճիռ են կայացրել, դրանից էլ  ազատել ենք աշխատանքից    

  Նոր Գեղի համայնքապետարանի աշխատակազմի քարտուղար Ալինա Առաքելյանին հունվարի 22-ին ազատել  են զբաղեցրած պաշտոնից:  

Ալինա  Առաքելյանին մեղադրանք էր  առաջադրվել այն բանի համար, որ նա 2008թ-ի հուլիսի 10-ից զբաղեցնելով  Կոտայքի մարզի Նոր Գեղիի համայնքապետարանի աշխատակազմի քարտուղարի պաշտոնը կեղծ տեղեկանքներ է տրամադրել  Ղազախստանի Հանրապետության քաղաքացի՝ Գալիմժան Ախիլբեկովին, որ նա   փաստացի բնակվում է գոյություն չունեցող Կոտայքի մարզի Նոր Գեղի համայնքի Երկրաբանների փողոցի 3-րդ շենքի 66-րդ հասցեում, եւ այդ տեղեկանքը  օրեր անց օգտագործվել է Ախիլբեկովի կողմից ՀՀ ոստիկանության ՃՈ Աշտարակի հաշվառման-քննարկման բաժանմունքում՝ ավտոմեքենա ձեռք բերելու գործարքի համար:

 Կոտայքի մարզի ընդհանուր իրավասության առաջին ատյանի դատարանը Ալինա  Առաքելյանին մեղավոր ճանաչել ՀՀ քրեական օրենսգրքի 314-րդ հոդվածի 1-ին մասով նախատեսված հանցագործության կատարման մեջ և նրա նկատմամբ պատիժ նշանակել ազատազրկում` 6  ամիս ժամկետով` զրկելով պետական և տեղական ինքնակառավարման մարմիններում, կազմակերպություններում պաշտոններ զբաղեցնելու իրավունքից` 1  տարի ժամկետով: 
Նոր Գեղի համայնքի ղեկավարի տեղակալ՝ Վանիկ Մնացականյանը, ով դատարանում  ներկա է եղել որպես վկա, մեզ հետ զրույցում ասաց, որ   ուշադրություն չեն դարձրել, եւ  չեն պատկերացրել, որ  Ալինան կարող էր կեղծ տեղեկանքներ տրամադրել: 

«Կա դատարանի վճիռ, որտեղ Ալինա Առաքելյանը իրավունք  չունի պաշտոնավարի պետական հաստատություններում, կեղծ  փաստաթղթեր տրամադրելու հետ վճիռ են կայացրել,  այդ որոշման հետ կապված ազատել ենք աշխատանքից»,-ասաց համայնքի ղեկավարի պաշտոնակատար Վարդան Պապյանը:
Նոր Գեղիի նախկին  գյուղապետ Ֆռունտիկ Թեուսյանն էլ   մեզ հետ զրույցում ասաց, որ  Ալինա Առաքելյանին իրավունք չունեին ազատել աշխատանքից. «Դատավճիռը կայացրել են, բայց դիմել են վերաքննիչ դատարան: Իրենք իրավունք չունեին աշխատանքից ազատել  մինչեւ վերաքննիչ դատարանը  որոշումը,   բայց առաջին ատյանի դատարանի  որոշումով ազատել են աշխատանքից»: