Տնային կալանքի տակ գտնվող փոխնախարարին մահացած են գտել իր տանը

Թաթարստանի առողջապահության փոխնախարար Ելենա Շիշմարևային, որի նկատմամբ դատարանը որպես խափանման միջոց կիրառել էր տնային կալանքը, մահացած են գտել իր բնակարանում: Շիշմարևան մեղադրվում էր խարդախության և պաշտոնեական դիրքի չարաշահման համար, տեղեկացնում է РИА Новости-ն՝ հղում կատարելով իրավիճակին ծանոթ աղբյուրին:



ՌԴ քննչական կոմիտեի Թաթարստանի քննչական վարչությունը փետրվարի 1-ին քրեական գործ է հարուցել Թաթարստանի առողջապահության նախարարության չճշտված թվով աշխատակիցների դեմ՝ որոնք կասկածվում են խարդախության և խոշոր չափերի հափշտակության մեջ:



Այդ գործի շրջանակներում հենց նույն օրը հարցաքննվել է նաև փոխնախարար Շիշմարևան: Հարցաքննությունից հետո նրան ձերբակալել են որպես կասկածյալի: Կազանի Խորհրդային շրջանի դատարանը նրա նկատմամբ որպես խափանման միջոց կիրառել էր տնային կալանքը:



«Շիշմարևային մահացած են գտել իր տանը»,- գործակալությանն ասել է աղբյուրը: