Կաչինսկու հարազատները մեղադրում են ռուսներին լեհ նախագահի սպանության մեջ

«Ներկայումս լեհական նախագահի սպանության վերաբերյալ դավադրության վարկածը շատ ավելի ճշմարտանման է, քան երբեւէ»,- լեհական ԶԼՄ-ներին օրերս հայտարարել է Մարցին Դուբնեցկին` ավիավթարից զոհված նախագահ Լեխ Կաչինսկու եւ նրա տիկնոջ միակ դստեր` Մարթա Կաչինսկայա-Դուբնեցկայայի ամուսինը: «Բազմաթիվ նախանշաններ կան, որոնք վկայում են, որ ռուսներն ուզում էին սպանել Կաչինսկուն»,- ասել է Դուբնեցկին լեհական TVN24 հեռուստաընկերությանը:



Որպես գլխավոր պատճառներ զոհված նախագահի փեսան մատնանշել է Կաչինսկու հնարավոր հաղթանակը հաջորդ նախագահական ընտրություններում, վերաբերմունքը 2008թ. ռուս-վրացական պատերազմին եւ Եվրամիությունում վարած քաղաքականությունը: Դուբնեցկին մեղադրել է ավիավթարն ուսումնասիրած Միջպետական ավիացիոն կոմիտեին` կարեւոր փաստեր կոծկելու մեջ, օրինակ, որ օդաչուները կործանումից 22 վայրկյան առաջ փորձել են հրաժարվել վայրէջքից եւ օդ բարձրանալ: Այդ փորձը չի հաջողվել, քանի որ անձնակազմը չի տիրապետել արժանահավատ տեղեկությունների ինքնաթիռի բարձրության եւ նրա գտնվելու կոնկրետ վայրի մասին: