Քննադատողներն ովքե՞ր են՝ անհայտ ճիվաղներ

Երկու օր առաջ Երեւանում վնասազերծված խմբի, «Հայոց Վահան» կառույցի ներկայացուցիչների, մասնավորապես Արթուր Վարդանյանի մասին ԼՂՀ ԱԺ ընդդիմադիր պատգամավոր Վահան Բադասյանի հայտարարությունները մեծ իրարանցում է առաջացրել հանրային շրջանակներում։

Բադասյանը, հիշենք, գլխավորում էր 2014 թվականին Արցախից Քեսաբ մեկնած հայ կամավորների ջոկատը, որտեղ հանդիպել է Քեսաբի ազատագրությանը մասնակցած
«Հայոց Վահան»-ի ղեկավարի հետ:

Իսկ երեկվա վնասազերծումից հետո Վահան Բադասյանը աղմկոտ հայտարարություններ է արել Արթուր Վարդանյանի մասին՝ ասելով, որ Քեսաբ մեկնելու նրա միակ նպատակն այնտեղ լուսանկարվելն է եղել, այլ ոչ թե հայապաշտպանությունը: Զրուցեցինք Վահան Բադասյանի հետ:

-Պարոն Բադասյան ձեր հայտարարությունից հետո որոշ շրջանակների քննադատության թիրախն եք դարձել, թեեւ թունդ ընդդիմադիրի համբավ ունեք, բայց Ձեր հայտարարությունները սկսել են ցիտել բոլոր իշխանականները։ Եւ համացանցում Ձեզ մեղադրում են իշխանության ջրաղացին ջուր լցնելու մեջ:

-Քննադատողներն ովքե՞ր են, անհայտ ճիվաղներ են: Ես ոչ մի սխալ բան չեմ ասել: Այդ խումբը՝ «Հայոց Վահան», որի անդամները դիմակներով նկարվել են, գնացել են Քեսաբ, բայց շեղվել ու խաչակրաց արշավանք են կատարել: Հարց է առաջանում, եթե գնացել են քեսաբցու կողքին կանգնել, ինչո՞ւ են դիմակներ հագել, թող ափաշքարա իրենց դեմքով կանգնեին, ինչի՞ են երեսները ծածկում, սեւերես են եղել դրա՞ համար: Ուրեմն ինչ որ մի բան այն չի եղել:

-Գուցե դա իրենց ջոկատի ընտրած մարտավարությունն է եղել, ոճը:

-Նրանք ինչ որ բանից ուզեցել են թաքնվել: Ես պնդում եմ, որ նրանք այնտեղ հայանպաստ բան չեն արել: Նրանք ընդամենն օգտագործվել են սիրիական կառավարության այս կամ այն սպայական կազմի կողմից, նույնիսկ ոչ կառավարության: Ես օբյեկտիվ ենթադրություններ ունեմ, որ այդ օգտագործված մարդիկ կարող էին Իսլամական պետության չինովնիկների կամ հրամանատարների ձեռքն ընկնեին, հնարավոր է նրանք էլ օգտագործել են, որպեսզի Հայաստանում զբաղվեն տեռորով: Դեռ ամեն ինչ կպարզվի, բայց ես կարող եմ օբյեկտիվ ենթադրություններ ունենալ:

-Որպեսզի օդում չհնչի, կասե՞ք ինչու եք կարծում, որ «Հայոց Վահանը» օգտագործվել է սիրիական սպայական խմբերի կողմից:

-Հագել են սիրիական տարազ, զենք են վերցրել, կատարել են նրանց հանձնարարությունները: Հիմա Քեսաբից հետո ո՞ւր են գնացել նրանք, ես չգիտեմ, կարող է ուրիշ վայրեր եւս գնացել են: Ես լուր ունեմ, որ նրանցից ոմանք չեն համաձայնել գնալ Հալեպ, մյուսները գնացել են: Մենք որ Քեսաբ ենք գնացել նման առաքելություն չենք ունեցել՝ կանգնել սիրիական բանակի կողքին, նրանց տարազը հագնել, մենք գնացել ենք, նպաստել, օգնել, որպեսզի շուտափույթ սկսվի Քեսաբի ազատագրման գործը, հարցը քաղաքականացրել ենք ու գործը արագ ավարտին ենք հասցրել: Իսկ նրանք գնացել են, ուրիշ բաներ են արել, ես նրանց արածը նույնիսկ համարում եմ դավաճանություն, դա հայրենասիրություն չի: Անկախ իրենցից նրանք ոչ հայանպաստ աշխատանք են կատարել:

-Իսկ դուք եղե՞լ եք Քեսաբում, Ձեր մասին էլ ասում են, որ չեք էլ եղել, միայն Բեյրութ եք այցելել:

-Քեսաբում միայն ես եմ եղել, եթե ուզում եք ճիշտն իմանալ: Առաջինը Քեսաբում ես եմ եղել եւ այս տխմարները երեւի եկել են ինձ հակակշռելու: Բոլորը գիտեն, որ ես եղել եմ, պարզապես ես ֆոտոներ ու վիդեոներ չեմ գցել: Եթե պետք կլինի, այո, կապացուցենք: Ես ֆոտոյի համար չեմ գնացել, հիմա ես եղել եմ, թե չեմ եղել Քեսաբում, եթե խնդիր լինի, կարող եմ ապացուցել: Հիմա ենթադրենք՝ ես չեմ եղել Քեսաբում, դա նշանակում է, որ Արթուրի օգտագործվելը ճի՞շտ է եղել այնտեղ:

-Դուք եք այդպես կարծում, որ օգտագործվել է՝ որպես Քեսաբի գործողություններին մասնակից, հեռուն գնացող ենթադրություններ անում,
Քեսաբի ազատագրման մասնակիցներից ոմանք էլ ճիշտ հակառակ հայտարարություններն են անում՝ նշելով, որ այդ ջոկատն ու դրա ղեկավարն անձնվիրաբար մասնակցել են Քեսաբի ազատագրմանը, հիմա ո՞ւմ հավատալ:

-Ես չեմ ենթադրում, ես համոզված եմ: Գնալ Սիրիա, հագնել տարազ ու սիրիական տարազով, դիմակներով նկարվել, հետո Հայաստանի իշխանությունների նկատմամբ սպառնալ, որ կոտորելու են, դա դավաճանություն է:
Այո, մասնակցել են, գնացել կցվել են, բայց ամենավտանգավորը՝ օգտագործվել են: Երեւի այդ օգտագործվելու հետեւանքն է, որ այսօր եկել հասել են Երեւան: Տեսանյութ կա չէ՞, որ էդ Արթուրը սպառնում է Հայաստանի իշխանություններին, որ մինչեւ վերջին փամփուշտը կկրակի, չգիտեմ ինչ կանի, կկոտորի միայն թե հայն ուրախ լինի:

-Դուք էլ այստեղ եք հակաիշխանական հայտարարություններ անում, առավել եւս՝ Արցախում, դա կարելի է, իսկ Սիրայից չի կարելի՞:

-Ես այստեղ եմ քննադատում, մեր տանը, մեր լեզվով, մեզ համար:
Հայրենիքից դուրս էլ կարելի է քննադատել, բայց նայած ինչ ձեւով, դու ուրիշի տարազի, ուրիշի դրոշի տակ իրավունք չունես, դա դավաճանություն է, արի այստեղ արա այդ ամեն ինչը:

-Հիմա էլ Ձեզ են նույն կերպ քննադատում, ասում են՝ չի կարելի եւ իշխանության կողմը լինել, եւ ընդդիմություն երեւալ, օրինակ դուք ընդդիմադիր եք, բայց բիզնեսներ ունեք Ղարաբաղում, հողատարածքներ ունեք, ասում են՝ բանակին հաց եք անգամ մատակարարում, այդպիսի ընդդիմություն լինել կարելի՞ է:

-Ես հաց մատակարարում էի մինչեւ 2012 թիվը, իշխանություններն իմ ձեռքից անօրինաբար վերցրեցին դա: Ես ընդդիմադիր եմ, ոչ ֆանատիկ, պատերազմը արդեն 20 տարի է ավարտվել է, եթե մեկը հերոսություն է արել այդ ժամանակ, բայց հետո տխմարություն, նրա արածը զրոյի է վերածվում:

Ես հիմա այլ կերպ եմ փորձում ապրել: Ես հիմա հողագործ եմ, այս պահին էլ սերմ եմ ցանում այն հողերի վրա, որոնք նաեւ ես եմ ազատագրել: Ես իմ կյանքով կարողանում եմ հիմք ստեղծել ու իշխանություններին անվանել ապիկար, հիմար, հրաժարական պահանջել: Եթե ոմանց թվում է, որ ես ընդդիմադիր եմ, ուրեմն պետք է հողի վրա էլ չաշխատեմ, չարաչար սխալվում են: Այս, ես ունեմ բիզնես, ցորեն եմ աճեցնում, հաց եմ թխում, Ղարաբաղում եւ Հայաստանում միակն եմ ես, որ ցորեն եմ աճեցնում ու հաց թխում, դա ազնվագույն գործ է, բայց ոչ եկամտաբեր: Սա այն բիզնեսն է, որ ես հարկային դաշտում ազատված եմ գրեթե բոլոր հարկերից եւ միայն եկամտահարկ ու վարձավճար եմ մուծում: Նախկինում շինարարական բիզնես ունեի, բայց այնպես արեցին, հրաժարվեցի: Ստուգում էին ամեն անգամ, գլխացավանքներ:

-Ի դեպ, իշխանությունների հետ համագործակցելու դրվագներից մեկն էլ ասում են կապված է Ժիրայր Սեֆիլյանի խմբի Արցախ այցելելու հետ։ Ասում են՝ Դուք պետք է դիմավորեիք նրանց Լաչինի մոտ, սակայն վերջին պահին չեք գնացել՝ թերեւս իմանալով, որ ծեծ ու ջարդ է այնտեղ կազմակերպվելու:

-Ոչ, ես , անշուշտ, կանխավ հայտարարել էի, որ դիմավորելու եմ, բայց հետո հետաձգվել էր երթը…Ես միշտ իրենց հետ եմ, հիմա էլ եմ իրենց հետ, ես չպիտի դիմավորեի իրենց: Բայց երբ որ ծեծել էին մեր ընկերներին, ես եմ գնացել մեր մեքենայով բերել եմ մեր ընկերներին հիվանդանոց: Դե, եթե ես կարողանում եմ հայհոյել իշխանություններին ու միեւնույն ժամանակ իրանց հետ լինել, թող հալալ լինի, ո՞ր մեկը թույլ կտա այդպես:

-Ինչու, այնուամենայնիվ չգնացիք Սեֆիլյանի խմբին դիմավորելու:

-Դա ներքին խնդիր է, ես այլ կարծիքի էի:

-Բայց ասացիք, որ նախապես խոստացել էիք, որ գնալու եք:

-Ոչ նախապես չէի խոստացել: