Մի կողմից՝ չխկչխկան, մյուս կողմից՝ դխկդխկան
«Ղարաբաղ կոմիտեի» անդամ Աշոտ Մանուչարյանը մի քանի օր առաջ Նորքի «բանդայի» գործով ձերբակալված պաշտպանության նախկին փոխնախարար Վահան Շիրխանյանին պաշտպանող հայտարարություն էր արել, ինչին արձագանքել էր ԱԱԾ-ն՝ քաղաքական գնահատականներ հնչեցնելով։ Եվ սա երկրորդ դեպքն է, որ ԱԱԾ-ն իր բանուգործը թողած՝ քաղաքական հայտարարություններ է անում։ Նախորդը Զարուհի Փոստանջյանի մասին էր։
Աշոտ Մանուչարյանը կարծում է, որ այդ հայտարարությունը գրվել է նախագահականում կամ ՀՀԿ գրասենյակում։ Եվ զարմանում է, թե ինչպես է ստացվում, որ «բանդայի» գործով ինֆորմացիայի արտահոսք է տեղի ունենում, եւ համոզված է, որ «արտահոսքը կազմակերպված է նախագահի նստավայրից»։ Իսկ դա նշանակում է, որ այդ գործը ծառայեցվում է ներքին քաղաքական հարցեր լուծելուն։ «Որպեսզի երկրի ամբողջ հատուկ ծառայություններն զբաղված լինեն այդ «չխկչխկան-դխկդխկանով», ինչպես այսօր Հայաստանն է զբաղված, ամբողջ ուշադրությունը դարձնեն դրա վրա, իսկ դրա քողի ներքո իրականացվի լրիվ ուրիշ օպերացիա։ Սա ԱԱԾ-ի պրոֆեսիոնալները շատ լավ գիտեն... Ես գնահատել եմ այդ գործողությունները որպես երկրի դեմ կատարվող երկրորդ քայքայիչ գործողություն այս կարճ ժամանակահատվածում՝ սահմանադրական հանրաքվեից հետո»։
Այն հարցին, թե ինքը պաշտպանում է Վահան Շիրխանյանին, մտավախություն չունի՞, որ ԱԱԾ-ն մի օր էլ իր հետեւից կգա, Մանուչարյանն ուշագրավ պատասխան տվեց. «ԱԱԾ-ն իմ հետեւից կգա միայն Սերժ Սարգսյանի հետեւից գնալուց հետո։ Ուրեմն Աստված գիտի՝ ում հետեւից եւ երբ կգան եւ ինչ մեղադրանքով»։
Վահե ՄԱԿԱՐՅԱՆ
Կարծիքներ